Veivanua mai na iVolanikalou

Kecisemani

Vulica vakalevu na vanua a tekivu kina na vakararawataki ni iVakabula ena vukuda.

E tiko evei?

Ena baba ni Ulunivanua ni Veiolive, ena tokalau kei Jerusalemi (na imatau ena iyaloyalo, ka buto tu ena dua na vunikau levu).

Mape ni Jerusalemi mai vei Jim Madsen

Na Cava a Tu e Kea?

E dua na veiolive ka rairai dua na iqaqi me qaqi kina na waiwai mai na olive.

Na Cava a Yaco Eke?

Ni oti na iOtioti ni Vakayakavi, a lako vata kei ira e tinikadua na Nona iApositolo o Jisu Karisito ki Kecisemani. Sa qai gole vakatikitiki me masu ka kauti Pita, Jemesa, kei Joni vata kei Koya.

A “tekivu me kidacala sara, ka yaluma sara.” A sa kaya Ko Koya, “Sa rarawa vakalevu na yaloqu, me vaka kau na mate” (Marika 14:33–34).

A masu Ko Koya, “Tamaqu, kevaka ko ni sa vinakata, ni kauta tani vei au na bilo oqo: ia me kakua ni yaco na noqu lewa, me yaco ga na nomuni lewa.

“A sa rairai mai vei koya e dua na agilosi mai lomalagi, a sa mai vakaukauwataki koya.

“Ia ni sa yaluma sara sa masu vagumatua cake kina: ia na nona buno sa vaka na titiri ni dra ni sa lutu ki na qele.” (Luke 22:42–44)

Ni oti na vakararawataki levu oqo vua na iVakabula, a soli Koya yani o Jutasa ka vesu mai vei ira na Jiu kei na dua na ilala sotia ni Roma.

O Kila Beka Li?

Na were oqo ena Ulunivanua ni Veiolive e vanua dau lako wasoma kina o Jisu (raica na Luke 22:39; Joni 18:2).

“Ena Aramaika, na vosa kecisemani e kena ibalebale na ‘iqaqi ni olive.’”¹

Nira sa dasila na olive ena dua na iqaqi ni olive, na waiwai e drodro mai e damudamu, me vaka na dra.

Ena gauna ni iVakabula, na kena rawati na waiwai olive sa dua na iwalewale ni kena vakalevutaki cake na bibi ena ikalawa yadua me rawa ni boboka na waiwai ena kena levu ga e rawa:

1. Na olive dasila ena ruku ni dua na vatu levu.

2. Biuta na olive dasila ena basikete tali, ka binia vata na basikete me veibikai.

3. Biuta e dua na kau levu se tolo ni kau ena deladra na basikete.

4. Vauca na vatu eso ki na mua ni kau yadudua.²

A vakayagataki e liu na waiwai ni olive me baleta na cina, vakasaqa, kakana, sovu, soqo ni lotu, kei na ilumu ni mavoa.

Ni vo e vuqa na yabaki me lako mai na Karisito, a tukuna e dua na agilosi vei Penijamini na tui me baleta na vakararawataki i Karisito e Kecisemani, ka kaya, “Sa tuturu mai kina na dra mai na veiqara ni dra ka sa levu sara kina na nona yaluma” (Mosaia 3:7).

Na nona vakararawataki na iVakabula ena vukuda e oka kina na Nona vakararawataki e Kecisemani kei na kauveilatai, ka mate kina o Koya. A taura Vua na noda ivalavala ca, mosi, veivakararawataki, veitemaki, tauvimate, kei na malumalumu (raica na Alama 7:11–12).

Gethsemane, mai vei Michael Malm

Nanumi Kecisemani

“Nanuma, me vaka ga na yago ni olive, ka a qaqi me baleta na waiwai ka solia na rarama, sa mani qaqi kina na iVakabula. Mai na veiqara kece oqori sa drodro mai kina na dra bula ni noda Dauveivueti. … Ni sa vuabale tiko na nomu bilo ni marau, nanuma na Nona bilo ni cudru ka rawati kina. Ia ni sa yaco vei kemudou na veivakatovolei mosi, dou nanumi Kecisemani.”

Peresitedi Russell M. Nelson, “Na Cava na Vuna e Vanua Tabu Kina Oqo?” Ensign. Tise. 1989, 18.

© 2023 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. Vakadewa ni Monthly For the Strength of Youth Message, June 2023. Language. 19026 000

iDusidusi

1. iDusidusi ki na iVolanikalou, “Kecisemani.”

2. D. Todd Christofferson, koniferedi raraba ni Okot. 2016 (Ensign se Liaona, Nove. 2016, 50).