Lye yo nan Ekriti yo

Jetsemani

Aprann plis sou lye kote soufrans Sovè a te pran pou nou an te kòmanse.

Ki Kote Li Ye?

Sou pant mòn Olivye a, nan pati lès Jerizalèm (adwat nan ilistrasyon an, ki make avèk yon gwo, gwo pyebwa).

Ilistrasyon kat jewografik Jerizalèm nan pa Jim Madsen

Kisa Ki Te La a?

Yon pye oliv ak petèt yon preswa pou ekstrè luil nan oliv yo.

Kisa Ki Te Pase Isi La?

Apre Dènye Soupe a, Jezikri te ale Jetsemani avèk onz Apot Li yo. Apresa Li te ale aleka pou L te priye epi L te pran Pyè, Jak ak Jan avèk Li.

Li “te santi yon frison nan rèl do l ak yon kè sere ki pran li.” Li te di, “Nanm mwen gen gwo lapenn. Mwen santi se mouri m vle mouri” (Mak 14:33–34).

Li te lapriyè: “Papa, si w vle, retire gode sa a devan mwen: sepandan, se pa volonte pa m, men se volonte pa ou ki pou fèt.

“Epi te gen yon zanj ki te parèt devan li ki te soti nan syèl la, pou fòtifye li.

“Epi kè Jezi te sere anpil, li t ap lapriyè pi rèd: swe ki t ap koule sou li te tonbe atè kòmsi sete gwo degout san” (Lik 22:42–44).

Apre gwo soufrans sa a Sovè a pran, Jida te trayi L epi sòlda Juif yo ak yon gwoup sòlda Women te arete L.

Eske ou te konnen?

Jaden sa a nan mòn Olivye a te yon kote Jezi te konn ale souvan (gade Lik 22:39; Jan 18:2).

“Nan lang Arameyen, mo jetsemane an vle di ‘preswa oliv.’”¹

Lè yo kraze oliv pou premye fwa nan yon preswa, luil ki koule a wouj, tankou san.

Nan epòk Sovè a, pwodiksyon luil oliv se te pwosesis pou ogmante presyon nan chak etap nan lòd pou ekstrè plis luil ke posib:

1. Kraze oliv yo anba yon gwo wòch.

2. Mete oliv ki kraze yo nan panye ki tise, epi anpile panye yo youn sou lòt.

3. Mete yon gwo pout anfè oswa an bwa nan panye ki anpile yo.

4. Kole wòch yo nan youn nan pwent poto anfè a.²

Nan tan ansyen, yo te konn itilize lui doliv lontan pou luil lanp, luil pou kuizin, manje, savon, seremoni relijye, epi pou wen pou swanye blesi.

Plizyè ane avan Kris la vini, yon zanj te pale avèk Wa Benjamen sou soufrans Kris la nan Jetsemani, li te di: “San t ap debòde soti nan chak pò, se konsa angwàs li yo ap pi plis toujou”(Mozya 3:7).

Soufrans Sovè a sibi pou nou gen ladan l soufrans Li nan Jetsemani ak soufrans sou lakwa, kote Li te mouri a. Li pran tout peche nou yo, doulè, afliksyon, tantasyon, maladi ak enfimite nou yo sou do L (gade Alma 7:11–12).

Jetsemani, pa Michael Malm

Sonje Jetsemani

“Sonje, egzakteman menm jan ak kò yon oliv, ke yo te prese pou luil la te bay limyè, se konsa yo te prese Sovè a. Nan chak pò, san Redanmtè nou an t ap soti. … Lè koup kontantman ou debòde, sonje se ak koup tristès Li a, Li te rann sa posib. Epi lè eprèv yo tonbe sou ou, sonje Jetsemani.”

Prezidan Russell M. Nelson, “Poukisa Tè Sent sa a?” Banyè, 18 Des. 1989.

© 2023 pa Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Mesaj Mansyèl Pou Fòs Jèn yo, Jen 2023. Language. 19026 036

Nòt

1. Gid ekriti yo, “Jetsemani.”

2. Gade D. Todd Christofferson, Konferans jeneral Okt. 2016 (Ensign oswa Liahona, Nov. 2016, 50).