Jikin ko jān Jeje ko Rekwojarjar

Gethsemane

Ekkatak eļapļo̧k kōn jikin eo jinoin ijo Rilo̧mo̧o̧r eo ekar en̄taan ilo etad.

Ej Pād Ia?

Ilo lōn̄tata in Mount Olives, ilo turear in Jerusalem (ituambwijmaron̄ in pija eo, kar kakōļļeik kōn juon wōjke ekilep).

Mab in Jerusalem pijaik jān Jim Madsen

Ta eo Ekar Pād Ijo?

Juon bukin wōjke in olive im bōlen juon kein ijjiped olive n̄an bōk oil jān olive ko.

Ta eo ekar Waļo̧k Ijin?

Ālkin Kōjota eo Āliktata, Jisōs Kraist ekar etal ippān jon̄ouljuon iaan Rijilōk ro An n̄an Gethsemane. Innām E ekar etal irejetļo̧k n̄an jar im kar bōk Piter, Jemes, im Jon Ippān.

E ekar “jino An kanooj bwilōn̄, im eļap An eddo būruōn.” E ekar ba, “Aō e kanooj būroṃōj āinwōt n̄an mej” (Mark 14:33–34).

E ekar jar, “Jema, eļan̄n̄e Kwō kōņaan, Kwōn bōkļo̧k kab in jān Eō; a en jab ankil Aō a Am̧ wōt.

“Im juon enjeḷ ej weaaktok n̄an E jān lan̄, im kakajoor E.

“Im ilo An en̄taan Ej kaļapļo̧k An jar: im An menokadu āinwōt eļap pilin̄lin̄ in bōtōktōk e wōtlo̧k ioon bwidej” (Luk 22:42–44).

Ālkin en̄taan in ekajoor jān Rilo̧mo̧o̧r eo, E ekar liaakeļo̧k jān Judas im kar kalbuuji jān ritōl ro an Riju im juon jar in tariņae an Rom.

Kwaar Ke Jeļā?

Jikin kallib in ilo Mount Olives ekar juon jikin ijo Jisōs ekar emakijkij an etal n̄an e (lale Luk 22:39; Jon 18:2).

“Ilo kajin Aramaic, naan eo gethsemane meļeļe in ‘olive press (kein ijjiped olive).’”¹

N̄e olive ko rej ilo jinotata kar keeņi ilo juon kein ijjiped olive, oil eo ekar to̧o̧r ej būrōrō, āinwōt būtōktōk.

Ilo tōre eo an Rilo̧mo̧o̧r, kōm̧m̧an olive oil ekar juon jerbal n̄an kōļapļo̧k kajoor eo ilo kajjojo bun̄tōn n̄an maron̄ keeņe bwe en waļo̧k oil:

1. Keeņi olive ko ium̧win juon dekā kileplep.

2. Likūt olive ko keeņi ilo juon iiep ko āji, im ejouji iiep ko ioon doon.

3. Likūt juon biim ekilep ak aļaļ ioon ejouj in iiep ko.

4. Kobaik dekā ko n̄an juon jabōn biim eo.²

Olive oil eo kar kōjerbale etto n̄an oil in ļam̧, oil in kōmat, m̧ōn̄ā, joob, iien ko an kabun̄, im tōļaj n̄an kōm̧adm̧ōdi kinej ko.

Elōn̄ iiō ko m̧okta jān itok eo an Kraist, juon enjeļ ekar jiron̄ Kiin̄ Benjamin kōn en̄taan eo an Kraist ilo Gethsemane, ekar ba, “bōtōktōk enaaj itok jān aolep ānbwinnin, āindein naaj ļap in an en̄taan” (Mosaia 3:7).

En̄taan eo an Rilo̧mo̧o̧r eo ilo etad ektibuuj en̄taan eo An ilo Gethsemane im ioon debwāāl eo, ijo E ekar mej. E ekar bōk Ioon make aolep jerawiwi ko ad, en̄taan ko, kaen̄taanan ko, kapo ko, nan̄inmej, im m̧ōjņo̧ ko (lale Alma 7:11–12).

Gethsemane, jān Michael Malm

Keememej Gethsemane

“Keememej, ejja āinwōt ānbwin in olive eo, eo kar jipede n̄an oil me ekar letok meram, ejja wōt Rilo̧mo̧o̧r eo kar jipede. Jān aolepen ānbwinnin kar to̧o̧r būtōktōk in mour jān ad Ripinmuur. … N̄e kab in m̧ōņōņō eo am̧ elutōkļo̧k, keememej kab eo An emeeo̧ me ekar kapidodoiki. Im n̄e mālijjon̄ ko reļļap rej itok ioom̧, keememej Gethsemane.”

Būreejtōn Russell M. Nelson, “Why This Holy Land?” Ensign, Dec. 1996, 60).

© 2023 jān Intellectual Reserve, Inc. Aolep omālim rej pād ie. Kar būriin ilo USA. Kōmālim ilo kajin In̄lij: 6/19. Kōmālim ukook eo: 6/19. Ukook eo an Monthly For the Strength of Youth Message, June 2023. Language. 19026 874

Kakeememej ko

1. Unin Tōl eo n̄an Jeje ko Rekwojarjar, “Gethsemane.”

2. Lale D. Todd Christofferson, Okt. 2016 kweilo̧k eo eļap (Ensign ak Liaona, Nob. 2016, 50).