Ireo toerana ao amin’ny soratra masina

Getsemane

Mianara misimisy kokoa momba ilay toerana niatombohan’ny fijalian’ny Mpamonjy ho antsika.

Aiza no misy azy?

Eny amin’ilay solampin’ny Tendrombohitra Oliva, eo atsinanan’i Jerosalema (amin’ny ankavanana raha ao amin’ilay sary, voamariky ny hazo mankadiry iray).

Sarintanin’i Jerosalema nataon’i Jim Madsen

Inona no tao?

Sahan’oliva ary mety ho famotsehana hahazoana menaka avy amin’ny oliva.

Inona no nitranga teto?

Taorian’ny Fanasana Farany dia nandeha niaraka tamin’ny Apôstôliny iraika ambin’ny folo tany Getsemane i Jesoa Kristy. Dia nandeha nivavaka Izy ka nitondra an’i Petera sy Jakoba ary Jaona niaraka Taminy.

Nanomboka “talanjona sady ory indrindra” Izy. Hoy Izy hoe: “Fadiranovana loatra ny fanahiko, toy ny efa ho faty” (Marka 14:33–34).

Nivavaka Izy hoe: “Raiko ô, raha sitrakao, dia esory amiko ity kapoaka ity; nefa aoka tsy ny sitrapoko anie no hatao, fa ny Anao.

“Ary nisy anjely avy tany an-danitra niseho teo aminy ka nampahery Azy.

“Ary fadiranovana Izy, ka dia nivavaka mafimafy kokoa; ary ny dininy dia tahaka ny ra nipotrapotraka tamin’ny tany” (Lioka 22:42–44).

Taorian’izany fijaliana mafy nozakain’ny Mpamonjy izany dia namadika Azy i Jodasy ary nosamborin’ny manamboninahitra Jiosy sy ny andiana miaramila Romana Izy.

Moa ve mba fantatrao?

Io zaridaina teo amin’ny Tendrombohitra Oliva io no toerana falehan’i Jesoa matetika (jereo ny Lioka 22:39; Jaona 18:2).

“Amin’ny fiteny Aramianina ny teny hoe getsemane dia midika hoe “famotsehana oliva.’”¹

Rehefa potehina voalohany ao anaty famiazam-boaloboka ny oliva, dia mena toy ny rà ny menaka mivoaka.

Tamin’ny andron’ny Mpamonjy, ny famokarana menaka oliva dia dingan’ny fampitomboana ny tsindry isaky ny dingana mba hamokarana menaka betsaka araka izay azo atao:

1. Poteho eo ambanin’ny vato lehibe iray ny oliva.

2. Ataovy ao anaty harona voatenona ireo oliva voatoto, ary atao mifampitaingina ireo harona.

3. Asio andry na vatan-kazo lehibe eo ambonin’ireo harona mifampitaingina.

4. Hamatory vato eo amin’ny tendrony iray amin’ilay andry.²

Ny menaka oliva dia nampiasaina fahiny ho an’ny menaka jiro, menaka fandrahoan-tsakafo, sakafo, savony, fombafomba ara-pivavahana, ary menaka manitra hitsaboana ratra.

Taona maro talohan’ny fiavian’i Kristy, dia nisy anjely nilaza tamin’ny Mpanjaka Benjamina momba ny fijalian’i Kristy tao Getsemane, nanao hoe: “Mivoaka ny mason-koditra rehetra ny ra, fa ho lehibe loatra ny fitaintainany” (Môzià 3:7).

Ny fijalian’ny Mpamonjy ho antsika dia ahitana ny fijaliany tao Getsemane sy teo amin’ny hazo fijaliana, izay toerana nahafatesany. Nentiny teo Aminy ny fahotantsika, ny fanaintainantsika, ny fahoriantsika, ny fakam-panahy, ny aretintsika ary ny rofintsika rehetra (jereo ny Almà 7:11–12).

Getsemane, nataon’i Michael Malm

Tsarovy Getsemane

“Tsarovy, tahaka ny vatan’ny oliva, izay nopotsehina hahazoana ny menaka nanome hazavana no nanapotsehana ny Mpamonjy. Avy amin’ny mason-koditra rehetra no nibosesika ny ran’ny ain’ny Mpanavotra antsika. … Rehefa feno ny kapoaky ny hafalianao, dia tsarovy ilay kapoaka mangidiny izay nahatonga izany ho tontosa. Ary rehefa tonga aminao ny fahoriana mafy mianjady, dia tsarovy i Getsemane.”

Filoha Russell M. Nelson, “Why This Holy Land?” Ensign, des. 1989, 18.

© 2023 by Intellectual Reserve, Inc. Zo rehetra voatokana. Natonta tany Etazonia. Fankatoavana ny tamin’ny teny anglisy: 6/19. Fankatoavana ny fandikana: 6/19. Fandikana ny Monthly For the Strength of Youth Message, Jiona 2023. Language. 19026 654

Fanamarihana

1. Torolalana ho an’ny Soratra Masina, “Getsemane.”

2. D. Todd Christofferson, fihaonamben’ny Fiangonana maneran-tany ôkt. 2016 (Ensign na Liahona, nôv. 2016, 50).