Mafelo go tswa mo Dikwalong tse di Boitshepo

Gethesemane

Ithute thata ka ga lefelo le dipogisego tsa Mmoloki mo boemong jwa rona di simologileng teng.

sekgwa sa motlhware

Se Kwa Kae?

Mo mokgokologeng wa Thaba ya Motlhware, mo botlhaba jwa Jerusalema (mo mojeng mo setshwantshong, se se tshwailweng ka setlhare se se tona).

mmepe wa bogologolo wa Jerusalema

Setshwantsho sa mmepe wa Jerusalema ka Jim Madsen

Go ne Gona le eng Koo?

Sekgwa sa ditlhare tsa motlhware mme gongwe tshilo ya go tlhotlha leokwane mo motlhwareng.

tshilo ya motlhware

Go Diragetseng Fa?

Morago ga Selalelo sa Bofelo, Jeso Keresete o ne a tsamaya le Baaposetole ba Gagwe ba ba lesome le motso go ya kwa Gethesemane. Ke gone a fapoga go ya go rapela mme a tsaya Petere, Jakobe, le Johane.

A “simolola go tseana mo go botlhoko, mme a imelwa.” A re, “Mowa wa me o hutsafetse mo go golo go ya losong” (Mareko 14:33–34).

A rapela, “Rara, fa e le go rata ga gago, tlosa senwelo se mo go nna: le fa gontse jalo e seng go rata ga me, mme ga gago, a go dirafale.

“Mme koo ga bonala moengele mo go ene go tswa kwa legodimong, a mo nonotsha.

“Mme a le mo khutsafalong a rapela ka tlhoafalo: mme mofufutso wa gagwe wa nna jaaka marothodi a magolo a madi a rothela fa fatshe” (Luke 22:42–44).

Mme morago ga go boga mo go tseneletseng mo ke Mmoloki, o ne a raelwa ke Jutase le go tshwarwa ke ofisara tsa ba Juta le setlhopha sa masole a Baroma.

A O Ne O Itse?

Tshimo e kwa Thabeng ya Motlhware e ne e le lefelo le Jeso a neng a ya kwa go lone gantsi (bona Luke 22:39; John 18:2).

“Ka Seamariki, lefoko gethesemane le raya ‘tshilo ya motlhware.’”¹

Fa motlhware o silwa lwa ntlha mo tshilong ya motlhware, leokwane le le tshologang le tswa le le lehibidu, jaaka madi.

Mo nakong ya Mmoloki, go dira leokwane la motlhware e ne e le tsamaiso ya go oketsa maatla ka kgato nngwe le nngwe o go gamola leokwane le le ntsi jaaka go kgonega:

1. Sila motlhware ka fa tlase ga letlapa le le tona.

2. Tsenya motlhware o o sidilweng mo tlatlaneng e e logilweng, mme o tlhatlaganye ditlatlana mo godimo ga tse dingwe.

3. Baya kota e kgolo kgotsa logong mo godimo ga ditlatlana tse di tlhatlagantsweng.

4. Bofelela matlapa mo ntlheng e lengwe ya kota.²

Leokwane la motlhware le ne le dirisiwa bogologolo e le leokwane la lebone, leokwane le le apayang, dijo, sesepa, mediro ya tumelo, le setlolo sa go fodisa dintho.

Dingwaga tse dintsi pele ga go tla ga ga Keresete, moengele a bolelela Kgosi Benjamine ka ga go bogisega ga ga Keresete mo Gethesemane, a re, “Madi a dule mo lerobeng lengwe le lengwe, khutsafalo ya gagwe e tlaa nna kgolo” (Mosia 3:7).

Go boga ga ga Mmoloki mo boemong jwa rona go akaretsa go boga ga Gagwe kwa Gethesemane le mo mokgorong, kwa A swetseng teng. O itseetse mo go ene dibe tsotlhe tsa rona, matlhoko, dipitlagano, diteko, malwetse le makowa (bona Alema 7:11–12).

Jeso Keresete mo Gethesemane

Gethesemane, ka Michael Malm

Gakologelwa Gethesemane

“Gakologelwa, fela jaaka mmele wa motlhware, o o neng o gatelelwa go ntsha leokwane le le neelang lesedi, jalo Mmoloki o ne a gatelelwa. Mo lerobeng lengwe le lengwe ga a kga madi a botshelo a Morekolodi. … Fa senwelo sa gago sa boitumelo se penologa, gakologelwa senwelo sa Gagwe sa botlhoko se se dirileng kgonagalo ya se. Mme fa diteko tse di botlhoko di tla mo go wena, gakologelwa Gethesemane.”

President Russell M. Nelson, “Why This Holy Land?” Ensign, Sedimonthole. 1989, 18.

© 2023 ka Intellectual Reserve, Inc. All rights reserved. Printed in USA. Tetla ya Sekgoa: 6/19. Tetla ya thanolo: 6/19. Thanolo ya Monthly For the Strength of Youth Message, June 2023. Language. 19026 763

Dintlha

1. Kaelo ya Dikwalo tse di Boitshepo, “Gethsemane.”

2. Bona D. Todd Christofferson, Oct. 2016 general conference (Ensign kgotsa Liahona, Ngwanaatsele. 2016, 50).