Àwọn ibìkan láti inú Àwọn Ìwé-mímọ́

Gẹ́tsémánì

Kẹkọ si nípa ibi tí àwọn ìjìyà Olùgbàlà ti bẹ̀rẹ̀ ní ìtìlẹhìn wa.

Ibo Ló Wà?

Ní orí gẹ̀rẹ́gẹ̀rẹ́ Òkè Ólífì, ní ìlà-òrùn Jérúsálẹ́mù (ọ́wọ́ ọ̀tún nínú ìjúwé, tí a fi àmì sí nípa igi tí ìwọ̀n rẹ̀ tóbijù).

Àwòrán ìjúwe Jérúsálẹ́mù láti ọwọ́ Jim Madsen

Kíni Ó Wà Níbẹ̀?

Igbó-ṣúúrú ti àwọn igi ólífì kan àti bóyá ìtẹ̀ kan fún gbígba òróró láti inú àwọn òlífì.

Kíní Ó Ṣẹlẹ̀ Nihin?

Lẹ́hin Oúnjẹ Alẹ́ Ìkẹhìn, Jésù Krístì lọ pẹ̀lú mọ́kànlá nínú àwọn Àpóstẹ́lì Rẹ̀ sí Gẹ́tsémánì. Lẹ́hìnnáà Ó lọ sí ẹ̀gbẹ́ kan láti gbàdúrà ó sì mú Pétérù, Jákọ́bù, àti Jòhánù pẹ̀lú Rẹ̀.

Ó “bẹ̀rẹ̀ sí ní ìyàlẹ́nú gidigidi, àti láti di rírẹ̀wẹ̀sì gan-an.” Ó wípé, “Ọkàn mi kẹ́dùn gidigidi dé ikú” (Márkù 14:33–34).

Ó gbàdúrà, “Baba, bí ìwọ bá fẹ́, gba ago yí lọ́wọ́ mi: ṣùgbọ́n ìfẹ́ ti èmí kọ́, bíkòṣe tìrẹ, ni kí a ṣe.

“Ángẹ́lì kan si yọ sí i láti ọ̀run wá, ó ngbà á níyànjú.

“Bí ó sì ti wà ní ìwàyà-ìjà ó ngbàdúrà sí i kíkankíkan: òógùn rẹ̀ sì dàbí ìró ẹ̀jẹ́ nlá, ó sì nkán sílẹ̀” (Luku 22:42–44).

Lẹ́hìn ìjìyà líle yí láti ọ̀dọ̀ Olùgbàlà, a fi I hàn nípasẹ̀ Júdásì ó sì di mímú nípasẹ̀ àwọn olóye Júù àti ọ̀gbà àwọn ológun Rómù.

Njẹ́ O Mọ̀?

Ọgbà yí ní Òkè Olífì ni ibi tí Jésù máa nlọ nígbà-púpọ̀ (wo Luku 22:39; Jòhánù 18:2).

“Ní Aramaic, ọ̀rọ̀ náà gẹ́thsémánì túmọ̀ sí ‘ìtẹ̀ òlífì.’”¹

Nígbàtí a bá kọ́kọ́ gún àwọn ólífì nínú ìtẹ̀ ólífí kan, òróró tí ó nṣàn jáde jẹ́ pupa, bí ẹ̀jẹ̀.

Ní àkókò Olùgbàlà, mímú òróró ólífì jáde jẹ́ ètò ti mímú títẹ̀ pọ̀ sì ní ìgbésẹ̀ kọ̀ọ̀kan ní ètò láti fún òróró jáde bí ó ti ṣeéṣe lati pọ̀ tó:

1. Gígún àwọn ólífì lábẹ́ òkútá nlá kan.

2. Fífi àwọn ólífí tí a ti gún sínú àwọn apẹ̀rẹ̀ híhun, kí a sì to àwọn apẹ̀rẹ̀ náà lé orí ara wọn.

3. Gbé ìtì-igi nlá tàbí igi kan sí orí àwọn apẹ̀rẹ̀ tí a ti tò sílẹ̀.

4. Síso àwọn òkúta mọ́ ara òpin kan ìtì-igi náà.²

Òróró òlífì ni à nlò ní ìgbà àtijọ́ fún òróró fìtílà, òróró ìdáná, oúnjẹ, ọṣẹ, àwọn ayẹyẹ ẹ̀sìn, àti ìkúnra fún títọ́jú àwọn ọgbẹ́.

Ọ̀pọ̀lọpọ̀ ọdún ṣíwájú bíbọ̀ Krístì, ángẹ́lì kan wí fún Ọba Benjamin nípa ìjìyà Krístì ní Gẹ́tsémánì, wípé, “Ẹ̀jẹ̀ sun jáde láti inú gbogbo ojú ihò ìlàágùn ara rẹ̀, títóbi tóbẹ́ẹ̀ ni àròkàn rẹ̀ yío jẹ́” (Mòsíàh 3:7).

Ìjìyà Olùgbàlà ní ìtìlẹhìn wa ní ìjìyà Rẹ̀ ní Gẹ́tsémánì àti lórí àgbélèbú nínú, níbití Ó kú sí, Ó gbé gbogbo àwọn ẹ̀ṣẹ̀, àwọn ìrora, àwọn ìpọ́njú, àwọn àdánwò, àwọn àìsàn, àti àwọn àìlera wa lé Ararẹ̀ (wo Álmà 7:11–12).

Gẹ́tsémánì, láti ọwọ́ Michael Malm

Rántí Gẹ́tsémánì

“Rántí, gẹ́gẹ́bí ara ólífì, èyítí a tẹ̀ fún òróró tí ó fúnni ní ìmọ́lẹ̀, bẹ́ẹ̀ ni a tẹ̀ Olùgbàlà. Láti gbogbo ojú ihò ìlàágùn ni ẹ̀jẹ̀-ìyè ntú jáde lára Olùràpadà wa. … Nígbàtí ago ìdùnnú yín bá kún àkúnwọ́ sílẹ̀, ẹ rántí ago ìkorò Rẹ̀ èyí tí ó mu un ṣeéṣe. Àti pé nígbàtí àwọn ìdánwò gidigidi bá wá sórí yín, ẹ rántí Gẹ́tsémánì.”

Ààrẹ Russell M. Nelson, “Kínìdí Ilẹ̀ Mímọ́ Yí?” Ẹ́nsáínì, Oṣù Kejìlá. 1989, 18.

© 2023 nípasẹ̀ Intellectual Reserve, Inc. Gbogbo ẹ̀tọ́ ní a pamọ́. A tẹ̀ẹ́ ní USA. Àṣẹ Èdè Gẹẹsì: 6/19. Àṣẹ Ìyírọ̀padà: 6/19. Ìyírọ̀pada ti Ọ̀rọ̀ Oṣooṣù Fún Okun àwọn Ọ̀dọ́, Oṣù Kẹfà 2023. Language. 19026 779

Àwọn Àkọsílẹ̀ ránpẹ́

1. Ìtọ́sọ́nà sí àwọn Ìwé Mímọ́, “Gẹ́tsémánì.”

2. Jeffrey R. Holland, ìpàdé àpapọ̀ gbogbogbò Oṣù Kẹwa 2016 (Ẹ́nsáìnì tàbí Làìhónà,, Oṣù Kọkànlá, 2018, 50).