Izindawo ezivela emiBhalweni eNgcwele

iGetsemane

Funda kabanzi ngendawo lapho uMsindisi aqala ukusizwela khona ubuhlungu.

Ngabe Ikhuphi Na?

Emehlelweni eNtaba yemiHlwathi, empumalanga neJerusalema (ngakwesokudla komfanekiso, lapho kukhona khona umuthi omkhulu).

Umfanekiso webalazwe lezwe laseJerusalema wenziwe nguJim Madsen

Kwakukhona Ini Lapho Na?

Isixhobo semithi yomhlwathi futhi mhlawumbe nesikhamo sokuthola amafutha omhlwathi.

Ngabe Kwenzeka Ini Lapha Na?

Emva kweSidlo Sakusihlwa, uJesu Kristu kanye nabafundi Bakhe abayishumi nanye baya eGetsemane. Wabe eseya eceleni ukuyokhuleka wathatha uPetru, uJakobe, kanye noJohane ukuba babe Naye.

“Waqala ukubhocobala nokuba nosizi.” Wathi kubo, “umphefumolo wami ulusizi kakhulu kuze kube sekufeni” (NgokukaMakhu 14:33–34).

Wakhuleka ethi, “Baba, uma uthanda, yisuse kimi le ndebe, nokho kungabi ngokwentando yami, kube njengokuba kuthanda wena.

“Kwabonakala kuye ingelosi ivela ezulwini, imqinisa.

“Esosizini olunzima, wakhuleka eqinisela: izithukuthuku zakhe zaze zaba njengamathonsi egazi, aconsela emhlabathini” (NgokukaLuka 22:42–44).

Emva kokuba uMsindisi ezwe lobu buhlungu obukhulu, Wakhashelwa nguJudasi waphinde waboshwa yizikhulu zamaJuda nebutho lamasosha aseRoma.

Uthi Ubuwazi Nje?

Le nsimu eseNtabeni yemiHlwathi kwakuyindawo lapho uJesu ayevame ukuya kuyo (bheka ezincwadini NgokukaLuka 22:39; NgokukaJohane 18:2).

“Ngesi-Aramu, igama elithi getsemane lisho ‘isikhamo somhlwathi.’”¹

Lapho imihlwathi igaywa ngesikhamo somhlwathi, amafutha aphumayo abomvu, njengegazi.

Ngesikhathi sikaMsindisi, ukukhiqiza amafutha omhlwathi kwakwenziwa ngokucindezela ngokuphindelela ukuze uputshuze amafutha amaningi:

1. Gaya imihlwathi ngetshe elikhulu.

2. Faka imihlwathi egayiwe kobhasikidi abathungiwe, bese ubabeka omunye phezu komunye.

3. Beka isigodo phezu kobhasikidi.

4. Beka amatshe ekugcineni kwesigodo.²

Amafutha omhlwathi kudala ayesetshenziselwa ukukhanyisa amalambu, ukupheka, ukudla, insipho, izimiso zenkolo kanye nokwelapha izilonda.

Eminyakeni eminingi ngaphambi kokuza kuka Jesu, ingelosi yatshela inkosi uBenjamini mayelana nokuzwa ubuhlungu kukaJesu eGetsemane, ithi “Luyoba lukhulu kakhulu usizi kuyo, kangangoba igazi liyophuma kuzo zonke iziqu zoboya” (Mosiya 3:7).

Ukusizwela ubuhlungu kukaMsindisi kubandakanya ukuzwa Kwakhe ubuhlungu eGetsemane nasesiphambanweni, lapho afela khona. Wathwala zonke izono zethu, izinhlungu, izinkathazo, izilingo, ukugula kanye nobuthakathaka (bheka ku-Alima 7:11–12).

iGetsemane, nguMichael T. Malm

Khumbula iGetsemane

“Khumbula, njengomhlwathi owawucindezelwa ukuze kuphume amafutha ayenika ukukhanya, wacindezelwa kanjalo noMsindisi. Kuzo zonke iziqu zoboya kwaphuma igazi likaMhlengi wethu. … Lapho indebe yakho yenjabulo ichichima, khumbula indebe Yakhe yosizi eyakwenza kwenzeke lokho. Futhi lapho izivivinyo ezinzima zikwehlela, khumbula iGetsemane.”

UMongameli uRussell M. Nelson, “Why This Holy Land?” Ensign, ngoDisemba. 1989, 18.

© 2023 by Intellectual Reserve, Inc. All rights reserved. Ishicilelwe eMelika. Usuku okuvunywe ngalo ukuba lesi sifundo sikhishwe ngesiNgisi: 6/19. Usuku okuvunywe ngalo ukuba lesi sifundo sihunyushwe: 6/19. Ukuhunyushwa kwe Monthly For the Strength of Youth Message, April 2023. Language. 19026 783

Amanothi

1. IziHloko zemiBhalo eNgcwele, “Getsemane.”

2. Bheka inkulumo kaD. Todd Christofferson, ye ngqungquthela yebandla lonke ka-Okthoba 2016 (i-Ensign noma iLiyahona, kaNovemba 2016, 50).