“Faasoa Mai Mea E Te Fiafia i Ai,” Mo Le Malosi o le Autalavou, Iulai 2023.
Faasoa Mai Mea E Te Fiafia i Ai
O lou alofa mo le talalelei, mo isi, ma mo le Alii e faamalosia ai oe e faasoa atu le talalelei.
Mo Lenei Faamoemoe, saunia e Yongsung Kim, Havenlight.com
Sa ou asiasi muamua i le Vaitafe o Ribble e lata i Preston, Egelani, a o avea ma se faifeautalai talavou i le Misiona a Peretania. O iina, na papatiso ai e le Aposetolo ma le faifeautalai o Heber C. Kimball uluai tagata liliu mai i le Ekalesia toefuataiina a Iesu Keriso i fafo atu o Amerika i Matu ia Iulai 1837.
A o ou tu i luga o se alalaupapa e tilotilo atu i le vaitafe ma mafaufau e uiga i le mea na tupu iina, sa ou maua se molimau malosi ia Iesu Keriso ma Lana talalelei toefuataiina.
O la’u misiona o se aafiaga matagofie ma le mamana i lo’u olaga. O le asō, e masani ona ou mafaufau ai, o se olioli tele mo au le faaaluina o le tele o lo’u olaga e faasoa atu ai le talalelei a Iesu Keriso. E le mafai ona ou mafaufau i se mea e sili atu ona taua.
O Le Manaomia ona Faasoa Atu le Talalelei
Vaaifaalemafaufau e faapea sa avea oe o se soo o Iesu Keriso i le taimi o Lona Toetu. Mata o le a se matagofie o le vaai atu ia te Ia ma faalogo i Lana savali?
O le savali lofituina a le Alii toetu o se valaaulia ma se poloaiga e faasoa atu Lana talalelei. Na Ia fetalai, “O lenei, ia outou o atu e fai nuu uma lava ma soo” (Mataio 28:19), ma “o atu ia outou i le lalolagi uma, ma talai atu ai le talalelei i tagata uma lava” (Mareko 16:15).
Na folafola mai Peresitene Russell M. Nelson peresitene e faapea “e lei manaomia lava le talalelei a Iesu Keriso e sili atu nai lo le taimi nei. … Ua ia i tatou le tiutetauave paia e faasoa atu le mana ma le filemu o Iesu Keriso i tagata uma o le a faalogo ma ē o le a faamuamua le Atua i o latou olaga.”1
Ua Manaomia Nei Oe e le Alii
Ua outou ola i se taimi tulagaese ma le taua—o le tisipenisione mulimuli a o lei oo i le Afio Mai Faalua o Iesu Keriso. Na vavalo mai le Perofeta o Iosefa Samita ao lei toe afio mai le Alii, “o le upu moni a le Atua o le a agai atu i luma ma le malosi, mamalu, ma tutoatasi, seia ulufia konetineta uma, asia nuu uma, ufitia ai atunuu uma, ma lagonaina i taliga uma, seia faataunuuina uma fuafuaga a le Atua, ma o le a fetalai mai Ieova Silisili ua maea le galuega.”2
O ai o le a fesoasoani e ausia lenei mea? O oe!
E le faapea e mana’omia ona avea oe ma se faifeautalai faamisiona e faasalalau atu le talalelei. E manaomia oe e le Alii i le taimi nei e faasoa atu Lana talalelei olioli ma le taua e faavavau i upu ma galuega o se ituaiga olaga ma se vaega o le tagata ua avea ai oe.
Taulai atu i le Alofa
O le mafuaaga sili ona taua tatou te faasoa atu ai le talalelei ona ua fetalai mai le Alii ia i tatou e fai. O nisi taimi e mafai ona faigata lenei mea, ae ou te folafola atu ao e taulai atu i le Alii o Iesu Keriso ma le tele o lou alofa ia te Ia ma le tele o Lona alofa ia te oe, o le a taialaina oe i au taumafaiga.
Ua Toetu o Ia, saunia e Greg Olsen
O lou alofa mo le talalelei, mo isi, ma le mea aupito taua, o lou alofa mo le Alii o le a faamalosia ai oe e talia Lana valaaulia paia e faasoa atu Lana talalelei.
Alofa i le Talalelei
Ua fetalai mai le Alii, “Aoao e uiga ia te a’u” (Mataupu Faavae ma Feagaiga 19:23; Mataio 11:29). O le tele o lou suesue i le talalelei ma aoao e uiga ia Iesu Keriso ma Lana misiona paia o le Faaola ma le Togiola, o le tele foi lea o le tuputupu ae o lou alofa mo le talalelei.
E te faasoa atu lou alofa mo le talalelei a o e ola ai. Sa aoao mai le Aposetolo o Paulo, “Ia fai oe ma faaa’oa’o i e faatuatua, i le upu, ma le amio, ma le alofa, ma le loto, ma le faatuatua, ma le le gaoia” (1 Timoteo 4:12). E masani lava ona talia e tagata le talalelei i le aoaoina ona sa latou maua se aafiaga lelei ma tagata o le Ekalesia. Faamolemole aua nei ola i ni taufaasese faaleagaga. “Ia faapea ona pupula atu lo outou malamalama” (Mataio 5:16) ma faaali atu i isi o le talalelei o se vaega taua o le tagata ua avea ai oe ma mea e te faia.
Alofa i Isi
Mafaufau e uiga i au uo. E te faasoaina ata tifaga, musika, ma meaai e te fiafia i ai ia i latou? E te faasoa atu au taleni ma mea e fiafia e fai? Atonu na e mafaufau pe o le a latou tali atu i le talalelei pe afai e te faasoaina atu ia i latou. O le a e le iloa lava sei vagana ua e taumafai. Na aoao mai Peresitene Nelson, “E manaomia e tagata uma le avanoa e iloa ai e uiga i le talalelei toefuataiina a Iesu Keriso.”3
Aapa atu ma le alofa i uo, tagata o le aiga, tuaoi, tagata o le vasega, ma isi—ia manatua o i latou o ou uso ma tuafafine ma fanau faapelepele a lou Tama oi le Lagi—ma o le a faigofie atu ia te oe ona faasoa atu le talalelei ia i latou.
Alofa i le Alii
I le avea ai ma tagata o Le Ekalesia a Iesu Keriso o le Au Paia o Aso e Gata Ai, o la tatou savali i le lalolagi e faapea o loo soifua Iesu Keriso! Ua Ia faia ina ia mafai ai e i tatou taitoatasi ona maua lo tatou faaolataga ma le faaeaga.
O le a e lagonaina le alofa o le Alii mo oe a o e mafaufau loloto i mea uma ua Ia faia mo oe. O le a faatumulia lou agaga i le alofa mo Ia, ma o le a e iloa ai e le mafai ona e faia se isi mea ae faasoa atu upumoni matagofie ua e mauaina mai ia te Ia.
O Le a Tele Lo Oulua Olioli
O lo’u aafiaga musuia faaleagaga i luga o le alalaupapa i luga o le Vaitafe o Ribble a o avea ma se faifeautalai talavou na aumaia ia te au le olioli e faavavau na folafola mai ia i latou o e faasoa atu le talalelei (tagai i le Mataupu Faavae ma Feagaiga 18:15).
I le avea ai ma se Aposetolo a le Alii o Iesu Keriso, ua sili atu ai lo’u mautinoa i le asō o le faasoaina atu o le talalelei o se olioli ma se faailoaga loloto o lo tatou alolofa mo le talalelei toefuataiina, mo fanau a le Atua, ma mo le Alii.
Ua talanoa Elder Cook ma talavou sulufai o le Taal Volcano i Batangas, Filipaina, i le aso 15 o Ianuari, 2020.
Ou te molimau atu a outou talia le valaaulia a le Alii ma faasoa atu mea tou te alolofa i ai, ua outou fesoasoani ia te Ia e fausia Lana Ekalesia ma saunia le lalolagi mo Lona toe afio mai, pe a “pule o Ia o le Tupu o Tupu ma … Alii o Alii.” 4 Ou te tatalo o le a e mulimuli ia te Ia ma faasoa atu Lana talalelei i lou olaga atoa.