“Taem Ol Joes blong Ol Nara Man I Mekem Yu Harem Nogud,” Blong Ol Yut Oli Kam Strong, Julae 2023.
Taem Ol Joes blong Ol Nara Man I Mekem Yu Harem Nogud
Hemia sam samting blong tingbaot taem ol nara man oli yusum fridom blong olgeta blong jus, long ol wei we i mekem yu harem nogud.
Ol droing oli kam long Shana Keegan
Yu stap mekem fulap joes evri dei—wanem blong werem, wanem blong kaekae long moning, wij fren blong folem. Ejensi, o fridom blong jusum mo mekem aksen, i wan long bigfala presen we God i bin givim long yumi.
Ol joes blong yumi tu oli gat ol ansa blong hem, mo samtaem ol joes blong ol nara man i save mekem yumi harem nogud. Sapos oli bin blokem yu blong wokbaot from wan samting we brata blong yu i bin mekem, !yu save stret olsem wanem hem i wan jalenj taem ol nara man oli yusum fridom blong olgeta blong jus long ol wei we yu no laekem!
Be samtaem i gat ol samting we oli moa nogud we ol man oli save yusum fridom blong olgeta jus blong mekem. Maet ol pikinini long skul oli buli long yu, o maet wan memba blong famli i jusum blong aot long Jos. I gat plante taem we i luk olsem laef i no i stret. Afta long evri samting, yu stap traem blong yusum fridom blong yu blong jus blong mekem ol raet joes—?so from wanem olgeta i no mekem semmak?
I tru, yu no save kontrolem ol nara man. Be gud nius i we yu yu save jenisim yuwan. Plan hem i blong tanem we yu stap lukluk moa long hem mo mekem ol gud joes nomata we ol narawan oli no mekem.
Hemia sam samting blong tingbaot taem yu stap muv i go fored wetem fet, nomata we ol narawan oli stap yusum fridom blong olgeta blong jus long ol wei we i mekem yu harem nogud:
-
Setan i stap lukaot blong spolem fridom blong jus (luk long Moses 4:3). Nomata se i had blong lukluk ol narawan oli mekem ol nogud joes, !yu tu yu fri blong mekem ol gud joes blong folem Jisas Kraes mo kam moa olsem Hem!
-
Ol aksen blong yu oli gat paoa. Tingbaot se, “Yumi fri blong jus, be yumi no save jusum ansa blong ol joes blong yumi.”1 Blong stap luk olsem wanem ol joes blong ol narawan i gat paoa long yu, i save stap olsem wan rimaenda long yu blong mekem ol joes we i no mekem yu o ol narawan oli harem nogud.
-
Evriwan i responsibol long ol joes blong olgetawan (luk long Doktrin mo Ol Kavenan 101:78). I no nid blong yu filim hevi blong filim se yu responsibol blong stap jenisim ol narawan o ol joes blong olgeta. Be, yu save lukluk moa blong mekem ol gudfala desisen blong stap folem Jisas Kraes.
-
Yu save jusum blong stap kaen. Maet wan man i no naes long yu, be yu mas gohed blong soem kaen fasin long olgeta. Hem i tekem strong paoa long tingting blong stap kaen long ol pipol mo fogivim olgeta taem oli no stap kaen long yu, be hemia i stret samting we bae Jisas i mekem (luk long Luk 23:34).
-
Yu sapos blong lukluk moa long wanem yu save kontrolem. Eksampol, maet yu no save stopem papa mo mama blong yu blong tufala i divos, be yu save jus blong lukluk moa blong stap long kavenan rod, stap helpem ol brata mo sista blong yu, stap lanem abaot ol helti rilesensip, mo stap putum ol gol blong fiuja famli blong yuwan. Jusum blong tanem ol jalenj blong yu i kam ol janis blong lan aot long hem mo gro.
-
Yu yu gat wan tabu aedentiti mo stamba tingting. Taem yu tingbaot aedentiti blong yu olsem wan pikinini blong God mo luklukbak moa long ol gol blong laef blong yu, yu save luk wan pikja we i moa bigwan. Blong stap lukluk moa long stamba tingting blong yu long wol ia mo blong luksave se ol jalenj ia, oli wan smol pat nomo blong laef stori blong yu, i save help yu blong muv i go fored wetem fet.
-
Tru long fet long Jisas Kraes, yu save faenem pis blong yuwan, nomata we ol samting raon long yu i no gat pis. Presiden Russell M. Nelson i talem, “Yumi save filim pis mo glad we i stap, iven long ol trabol taem.”2 Laef i wan hariken long solwota, mo i isi blong wantem se God bae i mekem ol hariken ia i go daon blong yumi. Be samtaem, Hem i givim pis long yumi we yumi stap long sip, be i no mekem solwota i stap kwaet. Tanem yu i go long Hem wetem ol trabol blong yu, mo bae Hem i helpem yu.
God i givim yu fridom ia blong jus blong mekem se yu save jusum blong folem Hem mo kam olsem Hem. Taem yu mekem olsem, bae yu kam blong lan aot long ol joes mo mistek blong yuwan mo ol joes blong ol narawan long wan fasin we i moa nomol. Nomata se i had blong wajem ol pipol blong mekem ol joes we i mekem yu harem , yu save lan aot long ol eksperiens blong olgeta mo muv i go fored wetem stamba tingting, fet mo glad.