“Pito nga Aldaw a Panagbibinninglay,” Para iti Pigsa dagiti Agtutubo, Hulio 2023.
Binulan a Mensahe iti Para iti Pigsa dagiti Agtutubo , Hulio 2023
Pito nga Aldaw a Panagbibinninglay
Maibinglaytayo ti ebanghelio kadagiti gagangay ken natural a wagas. Nakasaganakayo kadin a maipasango iti karit?
No pagsasaritaantayo maipapan iti panangibinglay kadagiti pammaneknektayo, masansan a panunotentayo ti panangiburay kadagiti pammaneknektayo iti miting ti sakramento wenno iti dadduma pay a pormal a kasasaad. Ngem naparegtatayo nga “agsapul kadagiti gundaway a mangpapigsa iti pammatiyo kadagiti natural ken gagangay a wagas.”1
Iti pito nga aldaw a karit iti baba, mabalinyo nga ibinglay ti pammaneknekyo iti sabali a wagas iti inaldaw iti uneg ti makalawas. Mabalinyo nga aramiden dagitoy a banag iti aniaman nga urnos, wenno mabalinyo pay ketdi ti mangpataud kadagiti bukodyo nga ideya! Nakasaganakayo kadin a maipasango iti karit?
Dagiti panangiladawan ni Emily Davis
Umuna nga Aldaw: Simbaan
Ibilangyo ti panangiburay iti pammaneknekyo iti miting ti panagayuno ken panagpaneknek iti simbaan no dayta ti maysa a banag a komportablekayo. No saan, mabalinyo met nga ibinglay ti pammaneknekyo iti simbaan babaen ti pannakipasetyo kadagiti klaseyo iti Domingo ken iti seminary. Dagiti komento nga ibinglayyo sadiay ti mangitag-ay iti dadduma ken mangpapigsa kadagiti pammaneknekda kasta met dagiti pammaneknekyo.
Maika-2 nga Aldaw: Gagayyem
Ania ti nasursuroyo iti simbaan iti Domingo? Nagustuanyo kadi ti imbinglay ti maysa a tao iti palawag iti miting ti sakramento wenno iti panaglilinnawag ti klaseyo? Mabalin a ti panglukat a kanta ti maysa kadagiti paboritoyo a himno. Ibagayo iti maysa a gayyem maipapan iti daytoy! Kalpasanna damagenyo met ti maipapan iti udi ti lawasda.
Maika-3 nga Aldaw: Social Media
Ti social media ti maysa a nasayaat a lugar a pangibinglayan kadagiti naespirituan a banag iti gagangay ken natural a wagas. Para iti daytoy nga aldaw ti karit, ibilang ti panangibinglay iti maysa a post maipapan iti:
-
Maysa kadagiti paboritoyo a bersikulo ti nasantuan a kasuratan.
-
Maysa a makaitag-ay nga adaw manipud iti sapasap a komperensia.
-
Maysa a naespirituan a kapanunotan wenno padas.
-
Maysa a banag a magustuan wenno pagyamananyo maipapan iti Mangisalakan.
-
Maysa a wagas a nangtulonganna kadakayo itay nabiit wenno maysa a kababalin a dayawenyo Kenkuana ken apay.
Maika-4 nga Aldaw: Text wenno Video
Mangipatulod iti makaitag-ay a mensahe iti maysa a gayyem babaen ti text wenno video. Mabalinyo nga ibinglay ti maysa a mensahe iti komperensia a panagkunayo a magustuanda, ibagayo kadakuada ti maysa a banag a dayawenyo maipapan kadakuada, wenno ibinglayyo ti maipapan iti pammatiyo ken ni Jesucristo. Kas pagarigan, mabalin a kasapulanda a maammuan maipapan iti ayat ti Nailangitan nga Ama para kadakuada. Kanayon a maibagayo pay kadakuada iti personal!
Maika-5 nga Aldaw: Serbisio
Mabalin a panunotenyo no kasano a ti panagserbi iti dadduma ket mabalin a maysa a wagas a pangibinglayan iti pammaneknekyo. Imbaga ni Apostol Pablo ken ni Timoteo, “Sika koma ti ulidan kadagiti mamati, iti sao, iti panagbiag, iti ayat, iti pammati, iti kinadalus” (1 Timoteo 4:12). Isu a maipakitam dagiti panamatiyo babaen ti pagwadanyo, babaen ti panagserbi iti dadduma a kas iti panagserbi ti Mangisalakan kadakuada.
Maika-6 nga Aldaw: Arte
No dadduma usaren dagiti tao ti arte a kas sabali a wagas a pangibinglayan kadagiti kapanunotan ken riknada. Mabalinyo nga usaren dagiti naipinta a ladawan, eskultura, daniw, musika, wenno ania man a dadduma pay a kita ti arte a pangibinglayan no kasano ti riknayo maipapan ken ni Jesucristo ken ti ebangheliona.
Maika-7 nga Aldaw: Dagiti Gagangay a Panagsasarita
Dikayo agbuteng a mangdakamat kadagiti panamatiyo kadagiti gagangay a kasasaad, kas koma iti panangibinglayyo iti ania man a dadduma pay a kapanunotanyo maipapan iti naited a topiko.
Siempre, mabalinyo ti agsarita maipapan kadagiti aktibidad ti Simbaan wenno maysa a nasantuan a kasuratan a nabasayo itay nabiit, ngem mabalin met nga ad-adda pay a gagangay ngem iti dayta. Kas pagarigan:
-
No mariknayo a naparegtakayo iti nakaparsuaan, ipeksayo ti panangdayawyo kadagiti pinarsua ti Dios iti maysa a tao.
-
Mabalin nga adda nalamiis a naespirituan a padasyo itay nabiit. Ibagayo iti maysa a gayyem maipapan iti daytoy no saan unay a personal.
-
Agsapulkayo kadagiti analogia ti ebanghelio iti libro wenno pelikula a magustuanyo, ken ibinglayyo dagiti kapanunotanyo.
Gagangay ken Natural
Bayat ti panangsapulyo iti nadumaduma a wagas a pangibinglayan kadagiti panamatiyo, agbalin nga ad-adda pay a natural nga aramidenyo dayta. Mabalin a marikna a makauma iti damo, ngem okey laeng dayta! Laglagipenyo, ti pammaneknekyo mismo ket naturalen kadakayo—paset dayta ti kinasiasinoyo. Ti panangiburay iti daytoy ket makapagbalin met a natural. Kasapulan laeng ti panangipeksa iti daytoy iti nabaybayag bassit iti inaldaw.
Kasano a maibinglayyo ti pammaneknekyo ita?
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, July 2023. Language. 19045 864