ເຈັດ ມື້ແຫ່ງການແບ່ງປັນ

ໂດຍ ແຊນດຣາ ເອັດເວີດສ໌

ວາລະສານຂອງສາດສະໜາຈັກ

ເຈົ້າສາມາດແບ່ງປັນພຣະກິດຕິຄຸນໄດ້ ໃນວິທີທີ່ປົກກະຕິ ແລະ ເປັນທຳມະຊາດ. ເຈົ້າພ້ອມສຳລັບການທ້າທາຍແລ້ວບໍ?

ເມື່ອເຮົາເວົ້າກ່ຽວກັບການແບ່ງປັນປະຈັກພະຍານຂອງເຮົາ, ເຮົາມັກຈະຄິດເຖິງການກ່າວປະຈັກພະຍານຂອງເຮົາໃນກອງປະຊຸມສິນລະລຶກ ຫລືຶ ໃນສະຖານທີ່ທີ່ເປັນທາງການອື່ນໆ. ແຕ່ເຮົາໄດ້ຮັບການຊຸກຍູ້ໃຫ້ “ຊອກຫາໂອກາດສະເໝີ ທີ່ຈະສະແດງສັດທາຂອງທ່ານ ໃນວິທີທາງແບບທຳມະຊາດ ແລະ ປົກກະຕິ.”¹

ໃນການທ້າທາຍເຈັດມື້ຢູ່ຂ້າງລຸ່ມນີ້, ເຈົ້າສາມາດແບ່ງປັນປະຈັກພະຍານຂອງເຈົ້າໃນວິທີທີ່ແຕກຕ່າງກັນໃນທຸກໆມື້ ເປັນເວລາໜຶ່ງອາທິດ. ເຈົ້າສາມາດເຮັດສິ່ງເຫລົ່ານີ້ໃນລຳດັບໃດກໍໄດ້, ຫລື ເຈົ້າຍັງສາມາດອອກແນວຄິດຂອງຕົນເອງກໍໄດ້! ເຈົ້າພ້ອມສຳລັບການທ້າທາຍແລ້ວບໍ?

ມື້ທີ 1: ໂບດ

ໃຫ້ພິຈາລະນາທີ່ຈະກ່າວປະຈັກພະຍານຂອງເຈົ້າໃນກອງປະຊຸມຖືສິນອົດເຂົ້າ ແລະ ສະແດງປະຈັກພະຍານຢູ່ໂບດ ຖ້າມັນເປັນສິ່ງທີ່ເຈົ້າສາມາດເຮັດໄດ້ຢ່າງສະບາຍໃຈ. ຖ້າບໍ່ດັ່ງນັ້ນ, ເຈົ້າກໍສາມາດແບ່ງປັນປະຈັກພະຍານຂອງເຈົ້າຢູ່ໂບດ ໂດຍການມີສ່ວນຮ່ວມໃນຫ້ອງຮຽນຂອງເຈົ້າໃນວັນອາທິດ ແລະ ໃນຫ້ອງຮຽນສາດສະໜາຂອງເຈົ້າ. ຄວາມຄິດເຫັນທີ່ເຈົ້າແບ່ງປັນຢູ່ທີ່ນັ້ນ ສາມາດເຊີດຊູໃຈຄົນອື່ນ ແລະ ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງພວກເຂົາ ເຊັ່ນດຽວກັບຂອງເຈົ້າ.

ມື້ທີ 2: ໝູ່ເພື່ອນ

ເຈົ້າໄດ້ຮຽນຮູ້ຫຍັງແດ່ຢູ່ໂບດໃນວັນອາທິດ? ເຈົ້າມັກສິ່ງທີ່ບາງຄົນໄດ້ແບ່ງປັນໃນຄຳປາໄສຂອງກອງປະຊຸມສິນລະລຶກ ຫລື ໃນການສົນທະນາໃນຫ້ອງຮຽນຂອງເຈົ້າບໍ່? ບາງເທື່ອ ເພງເປີດເປັນໜຶ່ງໃນເພງສວດທີ່ເຈົ້າມັກ. ເລົ່າໃຫ້ໝູ່ຟັງ! ແລ້ວຖາມກ່ຽວກັບວັນທ້າຍອາທິດຂອງພວກເຂົາເຊັ່ນກັນ.

ມື້ທີ 3: ສື່ສັງຄົມ

ສື່ສັງຄົມ ເປັນບ່ອນທີ່ດີສຳລັບການແບ່ງປັນເລື່ອງທາງວິນຍານຢ່າງເປັນປົກກະຕິ ແລະ ທຳມະຊາດ. ສຳລັບການທ້າທາຍໃນມື້ນີ້, ໃຫ້ພິຈາລະນາທີ່ຈະແບ່ງປັນໂພສກ່ຽວກັບ:

ໜຶ່ງໃນຂໍ້ພຣະຄຳພີທີ່ເຈົ້າມັກ.
ຖ້ອຍຄຳອ້າງອີງທີ່ເຊີດຊູໃຈຈາກກອງປະຊຸມໃຫຍ່ສາມັນ.
ຄວາມຄິດ ຫລື ປະສົບການທາງວິນຍານ.
ສິ່ງທີ່ເຈົ້າຮັກ ຫລື ຊາບຊຶ້ງໃຈກ່ຽວກັບພຣະຜູ້ຊ່ວຍໃຫ້ລອດ.
ວິທີທີ່ພຣະອົງໄດ້ຊ່ວຍເຈົ້າເມື່ອບໍ່ດົນມານີ້ ຫລື ຄຸນສົມບັດທີ່ເຈົ້າຊື່ນຊົມໃນຕົວຂອງພຣະອົງ ແລະ ເຫດຜົນ.

ມື້ທີ 4: ຂໍ້ຄວາມ ຫລື ວິດີໂອ

ສົ່ງຂ່າວສານທີ່ເຊີດຊູໃຈໄປໃຫ້ໝູ່ຄົນໜຶ່ງຜ່ານທາງຂໍ້ຄວາມ ຫລື ວິດີໂອ. ເຈົ້າສາມາດແບ່ງປັນບົດປາໄສຂອງກອງປະຊຸມໃຫຍ່ທີ່ເຈົ້າຄິດວ່າເຂົາອາດມັກ, ບອກເຂົາເຖິງສິ່ງທີ່ເຈົ້າຊາບຊຶ້ງໃຈກ່ຽວກັບເຂົາ, ຫລື ແບ່ງປັນກ່ຽວກັບສັດທາຂອງເຈົ້າໃນພຣະເຢຊູຄຣິດ. ຍົກຕົວຢ່າງ, ເຂົາອາດຕ້ອງການທີ່ຈະຮູ້ກ່ຽວກັບຄວາມຮັກຂອງພຣະບິດາເທິງສະຫວັນທີ່ມີຕໍ່ເຂົາ. ເຈົ້າສາມາດບອກເຂົາແບບຕົວຕໍ່ຕົວໄດ້ສະເໝີ!

ມື້ທີ 5: ການຮັບໃຊ້

ເຈົ້າອາດສົງໄສວ່າ ການຮັບໃຊ້ຄົນອື່ນ ສາມາດເປັນວິທີໜຶ່ງໃນການແບ່ງປັນປະຈັກພະຍານຂອງເຈົ້າໄດ້ແນວໃດ. ອັກຄະສາວົກ ໂປໂລ ໄດ້ບອກ ຕີໂມທຽວວ່າ, “ຈົ່ງເປັນຕົວຢ່າງໃຫ້ຄົນທີ່ເຊື່ອທັງຫລາຍ ໃນທາງກິລິຍາ ແລະ ວາຈາ ໃນຄວາມຮັກ ໃນຄວາມເຊື່ອ ແລະ ໃນຄວາມບໍລິສຸດຂອງເຈົ້າ” (1 ຕີໂມທຽວ 4:12). ສະນັ້ນ, ເຈົ້າສາມາດສະແດງຄວາມເຊື່ອຂອງເຈົ້າ ຜ່ານທາງຕົວຢ່າງຂອງເຈົ້າ, ໂດຍການຮັບໃຊ້ຄົນອື່ນ ດັ່ງທີ່ພຣະຜູ້ຊ່ວຍໃຫ້ລອດຈະຮັບໃຊ້ພວກເຂົາ.

ມື້ທີ 6: ສິລະປະ

ບາງເທື່ອຜູ້ຄົນກໍໃຊ້ສິລະປະເປັນວິທີທີ່ແຕກຕ່າງໃນການແບ່ງປັນຄວາມຄິດ ແລະ ຄວາມຮູ້ສຶກຂອງພວກເຂົາ. ເຈົ້າສາມາດໃຊ້ຮູບແຕ້ມ, ຮູບປັ້ນ, ບົດກະວີ, ດົນຕີ, ຫລື ສິລະປະປະເພດອື່ນໆ ເພື່ອແບ່ງປັນວ່າ ເຈົ້າຮູ້ສຶກແນວໃດກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ.

ມື້ທີ 7: ການສົນທະນາທີ່ເປັນກັນເອງ

ຢ່າຢ້ານທີ່ຈະກ່າວເຖິງຄວາມເຊື່ອຂອງເຈົ້າໃນສະຖານທີ່ທີ່ເປັນກັນເອງ, ເຊັ່ນດຽວກັບວ່າ ເຈົ້າຈະແບ່ງປັນຄວາມຄິດອື່ນໆທີ່ເຈົ້າມີກ່ຽວກັບຫົວຂໍ້ໃດໜຶ່ງ.

ແນ່ນອນ, ເຈົ້າສາມາດເວົ້າກ່ຽວກັບກິດຈະກຳຂອງສາດສະໜາຈັກ ຫລື ຂໍ້ພຣະຄຳພີທີ່ເຈົ້າຫາກໍອ່ານເມື່ອບໍ່ດົນມານີ້, ແຕ່ມັນກໍຍັງສາມາດເປັນກັນເອງໄດ້ຫລາຍກວ່ານັ້ນອີກ. ຍົກຕົວຢ່າງ:

ຖ້າເຈົ້າຮູ້ສຶກວ່າ ໄດ້ຮັບການດົນໃຈຈາກທຳມະຊາດ, ກໍໃຫ້ສະແດງຄວາມຊາບຊຶ້ງໃຈຂອງເຈົ້າຕໍ່ສິ່ງນິລະມິດສ້າງຂອງພຣະເຈົ້າຕໍ່ຄົນອືື່ນ.
ບາງເທື່ອເຈົ້າຫາກໍມີປະສົບການທາງວິນຍານທີ່ຄັກ. ເລົ່າໃຫ້ໝູ່ຟັງກ່ຽວກັບມັນ ຖ້າມັນບໍ່ແມ່ນເລື່ອງທີ່ສ່ວນຕົວຫລາຍ.
ຊອກຫາການປຽບທຽບພຣະກິດຕິຄຸນຢູ່ໃນປຶ້ມ ຫລື ໜັງທີ່ເຈົ້າມັກ, ແລະ ແບ່ງປັນຄວາມຮູ້ແຈ້ງຂອງເຈົ້າ.

ປົກກະຕິ ແລະ ທຳມະຊາດ

ຂະນະທີ່ເຈົ້າຊອກຫາວິທີທີ່ແຕກຕ່າງກັນໃນການແບ່ງປັນຄວາມເຊື່ອຂອງເຈົ້າ, ການກະທຳເຊັ່ນນັ້ນ ຈະຍິ່ງກາຍເປັນເລື່ອງທຳມະຊາດສຳລັບເຈົ້າຫລາຍຂຶ້ນເລື້ອຍໆ. ມັນອາດຈະຮູ້ສຶກອຶດອັດໃນຕອນທຳອິດ, ແຕ່ກໍບໍ່ເປັນຫຍັງ! ໃຫ້ຈື່ໄວ້ວ່າ, ປະຈັກພະຍານຂອງເຈົ້າ ກໍເປັນເລື່ອງທຳມະຊາດສຳລັບເຈົ້າໃນຕົວຂອງມັນເອງຢູ່ແລ້ວ—ມັນເປັນສ່ວນໜຶ່ງຂອງຕົວຕົນຂອງເຈົ້າ. ການແບ່ງປັນມັນກໍສາມາດກາຍເປັນເລື່ອງທຳມະຊາດໄດ້ເຊັ່ນກັນ. ສິ່ງທີ່ຕ້ອງເຮັດກໍຄື ມີແຕ່ສະແດງມັນອອກມາຫລາຍຂຶ້ນເທື່ອລະໜ້ອຍໃນແຕ່ລະມື້.

ເຈົ້າຈະແບ່ງປັນປະຈັກພະຍານຂອງເຈົ້າແນວໃດໃນມື້ນີ້?

© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, July 2023. Language. 19045 331