Bulanan nga Mensahe sang Para sa Kusog sang mga Lamharon, Agosto 2023

Magpangita sang Paghangop

Ni Elder Ulisses Soares

Sang Korum sang Dose ka Apostoles

Gikan sa pamulong-pulong sang Abril 2019 nga pangkabilogan nga komperensya.

Mga ilustrasyon ni Emily Jones

Ang aton tuyo sa pagpangita sang paghangop sang ebanghelyo ni Jesucristo amo ang madugangan ang pagtuo sa Dios kag sa Iya diosnon nga plano sang kalipayan kag kay Jesucristo kag sa Iya nagabayad-sala nga sakripisyo kag agud maagom ang nagadugay nga pagbag-o. Inang mas dako nga pagtuo kag pagbag-o magabulig sa aton nga maghimo kag magtuman sang mga kasugtanan sa Dios, gani nagapabaskog sang aton handum nga sundon si Jesus kag nagaresulta sa aton matuod-tuod nga espirituhanon nga pagbaylo. Ini nga pagbaylo magadala sa aton sing mas malipayon, mabungahon, kag mapagros nga kabuhi kag magabulig sa aton sa pagmentinar sang wala katapusan nga panan-aw.

Agud matigayon ini, kinahanglan naton sundon si Jesucristo paagi sa aton pagpaayaw sa balaan nga mga kasulatan, nga nagakasadya sa mga ini, nga nagatuon sang Iya doktrina, kag nagatinguha nga magpangabuhi pareho sa Iya. Sa sina gid lang nga makilala naton Sia kag makilala ang Iya tingug, nga nakahibalo nga kon magpalapit kita sa Iya kag magpati sa Iya, indi na gid kita paggutumon kag indi na gid pag-uhawon (tan-awa sa Juan 6:35).

Wala ina nataboan lang. Ang pagbagay sang aton mga kaugalingon sa pinakamataas nga mga impluwensya sang pagkadiosnon indi simple nga bagay; nagapangayo ini sang pagpangamuyo sa Dios kag pagtuon kon paano dal-on ang ebanghelyo ni Jesucristo sa sentro sang aton mga kabuhi.

Nagapamatuod ako sa inyo nga kon hugot, mainit, malig-on, kag sinsero naton nga ginatinguhaan nga hangpon ang ebanghelyo ni Jesucristo kag itudlo ini sa isa kag isa nga may sinsero nga katuyoan kag sa impluwensya sang Espiritu, ining mga panudlo makabaylo sang mga tagipusuon kag makainspirar sang handum nga magkabuhi suno sa mga kamatuoran sang Dios.

Pagbag-o: Ang proseso sang pagbaylo, lakip na ang pagbaylo nga nagakatabo kon magpalapit kay Cristo kag magbaton kag magsunod sang Iya mga panudlo kag mga kasugoan.

Pagpaayaw: Mangin masyado ka imbolbado sa isa ka hilikuton ukon ulobrahon. Ang pagpaayaw nagakahulugan man sang pagtugmaw sa likido, pareho sang tubig. Kon ginabunyagan kita, ginabunyagan kita paagi sa pagtugmaw.

Pagbagay: Ang magbaton ukon maghibalo sang isa ka butang.

Hugot: Ang maghimo sang isa ka butang nga may seryoso, sinsero kag mabaskog nga pamat-od.

© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, August 2023. Language. 19046 861