“Agkiddaw iti Pannakaawat,” Para iti Pigsa dagiti Agtutubo, Ago. 2023.
Binulan a Mensahe ti Para iti Pigsa dagiti Agtutubo , Agosto 2023
Agkiddaw iti Pannakaawat
Manipud iti maysa a mensahe iti sapasap a komperensia ti Abril 2019
Dagiti panangiladawan ni Emily Jones
Ti panggeptayo bayat ti panagkiddawtayo iti pannakaawat iti ebanghelio ni Jesucristo ket masapul a mangpapigsa iti pammati iti Dios ken iti nadiosan a planona iti ragsak ken ni Jesucristo ken iti makasubbot a sakripisiona ken tapno magun-od ti manayon a kumbersion. Ti kasta a napapigsa a pammati ken kumbersion ket tulongannatayto nga agaramid ken agtungpal kadagiti katulagan iti Dios, iti kasta mapatibker ti tarigagaytayo a sumurot ken ni Jesus ken mangpataud iti pudno a naespirituan a panagbalbaliw kadatayo. Daytoy a panagbalbaliw ket mangyeg kadatayo iti naragragsak, nabungbunga, ken nasalsalun-at a biag ken tulongannatayo a mangtaginayon iti agnanayon a pannirigan.
Tapno maragpat daytoy, kasapulan nga agtalinaedtayo ken Jesucristo babaen ti panangirarem iti bagbagitayo iti nasantuan a kasuratan, panagrag-o kadagitoy, ken panagsursuro iti doktrinana, ken agkagumaanan nga agbiag iti wagas ti panagbiagna. Kalpasanna laeng a maam-ammotayo Isuna ken mabigbigtayo ti timekna, nga ammotayo a bayat ti yaasidegtayo Kenkuana ken mamati Kenkuana, saantayto a pulos a mabisin wenno mawaw (kitaen iti Juan 6:35).
Saan a naiparparana a mapasamak dayta. Ti panangitunos iti bagitayo kadagiti kangatuan nga impluensia ti kinadios ket saan a simple a banag; kasapulanna ti panangawag iti Dios ken panagsursuro no kasano nga iyeg ti ebanghelio ni Jesucristo iti sentro ti biagtayo.
Paneknekak kadakayo a no sipapasnek, naimpusuan, sititibker, ken sipupudno a kiddawentayo ti pannakaawat iti ebanghelio ni Jesucristo ken isurotayo daytoy iti tunggal maysa nga addaan iti pudno a panggep ken iti babaen ti impluensia ti Espiritu, dagitoy a pannursuro ket mabalin a mangbalbaliw kadagiti puso ken mangtignay iti tarigagay nga agbiag a mayannurot kadagiti kinapudno ti Dios.
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, August 2023. Language. 19046 864