Tītau i tōna pūai

I roto i te ’Evanelia a Mareko, tē tai’o nei tātou nō te hō’ē vahine tei ma’ihia e 12 matahiti te maoro. ’Ua parau te hō’ē ta’ata iāna nō ni’a ia Iesu. Nō reira, i tōna haerera’a nā roto i tōna ’oire, ’ua pārahi atu ’oia i te hiti porōmu, i te tīa’ira’a. I tō Iesu haerera’a mai, ’ua toro marū noa te vahine i te rima nō te tāpe’a i te hiti o tōna ’ahu.

’Ua ora ’oi’oi ihora te vahine. E ’ere rā ’o ’ōna ana’e tei ’ite i teie temeio ; ’O Iesu ato’a. « ’E ’ite a’era Iesu i roto iāna iho, e mana tei pūpū atu nō roto iāna i reira ra, ’ua fāriu a’era i roto i taua feiā i nene’i mai ra, nā ’ō a’era, ’o vai tei fa’ati’a’ia mai i tā’u ’ahu nei ? » (Mareko 5:30). E nehenehe ato’a te vi’ivi’i ’ore e riro ’ei pūai. ’Ua ’ite ’oi’oi Iesu ē ’ua fa’ari’i te hō’ē ta’ata i te pūai nā roto mai iāna. ’Ua ’imi ’oi’oi ’oia iāna nō te paraparau iāna ’e nō te fa’aha’amana’o iāna i te mana o te fa’aro’o. ʼUa piʼi Iesu iāna tāna « tamāhine ». Nā roto iāna, ’ua ora ’oia.

’Ua ha’api’i mai au ē, e’ita roa te hō’ē pure nō te pūai e vai noa ma te pāhono-’ore-hia. Mai te mea e toro tātou i te rima iāna ra, e « tāpe’a mai ’oia i tō tātou rima » (hi’o Te mau Hīmene, N°62). E fa’aha’amana’o te parau pāpa’i tāta’itahi i roto i te ve’a nō teie ’āva’e i teie parau mau.

I roto i te buka iti Nō te pūai o te feiā ’āpī : E arata’i nō te rave i te mau mā’itira’a, tē ha’api’i nei te Peresidenira’a Mātāmua ē, « te Fa’aora […] ’o te ‘pūai ïa o te feiā ’āpī’ » ([2022], 2). Tē uiui nei paha ’outou nāhea ’ia fa’ari’i i taua pūai ra. Tē ti’aturi nei au ē, e ’ite mai ’outou i roto i teie mau ’api i te hō’ē mea ’o te arata’i ia ’outou ’ia haere atu iāna ra.

’A fa’atorotoro i teie mau ’api. ’A ’imi i te mau parau nō te tīa’ira’a, ’a ’ite mai i te hō’ē pāpa’ira’a mo’a nō te pūai, ’a pāpa’i i te mau muhumuhura’a tei vaiiho mai i te nīno’a i roto i tō ’outou ’ā’au. Maoti Iesu Mesia, e ora ato’a ’outou.

Ma te here rahi,

Emily Belle Freeman

Peresideni rahi nō te Feiā ’Āpī Tamāhine