“Merikel we Yumi Nidim Evri Dei,” Blong Ol Yut Oli Kam Strong, Maj 2024.
Paoa blong Winim Sin
Merikel we Yumi Nidim Evri Dei
?Sapos God i lavem yumi, ?from wanem nao Hem i askem yumi blong jenis mo sakem sin? Hemia sam trutok abaot sin mo sakrifaes blong atonmen blong Jisas Kraes.
Ol pikja droing oli kam long Adam Howling
?Wanem bae hapen sapos yu witnesem ol merikel blong Jisas Kraes we Hem i mekem long taem we Hem i stap long wol ia? ?Wajem Hem i hilim sikman mo mekem man i laef bakegen long ded? Nomata we yumi no save go bak long taem ia blong luk ol merikel ia, i gat wan long ol merikel blong Jisas Kraes we yumi save luk evri dei. Mo hem i impoten bitim evri narafala wan: Hem i winim sin.
Trutok abaot Sin
Samfala bae oli tingting se be from wanem nao hemia i impoten Long en, iven sapos yumi mekem wan mistek long ples ia o longwe, God i stil lavem yu, ?hemia i tru? Yes, Papa long Heven mo Jisas Kraes tufala tugeta i lavem yumi tumas. Be from Tufala i lavem yumi tumas, i gat moa long stori ia.
Taem Hem i visitim Ol Man blong Nifae, Sevya i bin tijim yumi from wanem fasin blong winim sin hem i impoten tumas: “I nogat wan samting we i no klin we i save go insaed long kingdom blong [God]” (3 Nifae 27:19).
Hem i no talem se “samting we i no klin be nomo olgeta smol mistek bae oraet.” Hem i tijim se eni kaen sin (we man i jusum blong no obei long ol komanmen blong God) i stopem yumi blong gobak stap wetem Hem bakegen.
Hemia i wan problem. Yumi no save folem gud evriwan ol komanmen blong God . Hemia i tru blong evri man—profet we i stret mo gud, rabis man we i mekem plante sin, mo evriwan we i stap long medel blong hemia. From we yumi no save waepemaot evri mistek blong yumi wan, sin bae stopem yumi blong go insaed long kingdom blong God.
Merikel blong Atonmen blong Kraes
Yumi talem tangkyu we Papa long Heven mo Jisas Kraes i save se yumi nidim help. Long Garen blong Getsemane mo long kros, Jisas Kraes i tekem long Hemwan ol soa bodi mo ol sik blong yumi, harem nogud long ol soa blong bodi mo fulap hadtaem, mo ol sin blong yumi (luk long Alma 7:11–13). From we Hem i stret Pikinini blong God mo semtaem pikinini boe blong Meri long saed blong bodi blong mit mo bun, Hem i save pem praes ia blong sin we i nomo gat wan man i save pem.
Hemia nao from wanem Hem i save talem long Ol Man blong Nifae, “From hemia, i no gat eni samting we i go insaed long kingdom blong [God], be olgeta ia nomo we oli bin wasem ol klos blong olgeta long blad blong mi, from long fet blong olgeta mo oli sakem evri sin blong olgeta, mo oli stap fetful kasem en.” (3 Nifae 27:19).
!Tru, hem i wan merikel we from Jisas Kraes, yumi save kam klin long ol sin blong yumi! Taem yumi luksave se sakrifaes blong atonmen blong Sevya hem i impoten long yumi, yumi save dipen long paoa blong Hem taem yumi gat fet long Hem, sakem ol sin blong yumi, mo gohed blong folem Hem wetem fet kasem en. !Hem i wan merikel we i save hapen evri dei taem yu trastem paoa blong Hem mo wok wetem fet!