“Gudfala Jenis we Gladhat blong Kraes i Save Mekem,” Blong Ol Yut Oli Kam Strong, Maj 2024.
Paoa blong Winim Sin
Gudfala Jenis we Gladhat blong Kraes i Save Mekem
Taem yumi andastanem se gladhat blong Sevya yumi no wok from, mo taem hem i stap oltaem, plante gudgudfala samting oli hapen long laef blong yumi.
Pikja droing i kam long Jarom Vogeln
Taem mi bin givim seves olsem wan bisop, i bin gud tumas blong luk Rilif ia we ol yang pipol ol bin filim taem oli mit wetem mi blong talem aot wan sin olsem pat blong fasin blong sakem sin. Be, mi luk wan paten we i gohed blong hapen: ol yang pipol bae ol konfes, filim gud, mo afta—nomata long gudfala tingting we oli bin gat—oli go spolem bakegen. Afta bae oli konfes, filim gud, mo spolem bakegen. Afta tri o fo taem tru long semak sekol ia, oli givap.
Mi glad se ol yangfala pipol ia oli bin tijim olgeta se Jisas Kraes, tru long Atonmen blong Hem, i givim olgeta wan janis blong sakem sin mo stat bakegen. Be, mi wari se lukaot oli no andastanem gud narafala blesing we Sevya i givim: gladhat blong Hem—paoa blong mekem samting1, tabu help, mo “endaomen blong paoa we yumi gro aot long hem long bodi we i no strong mo i no save mekem i go long bodi we i kam olsem wan god”2
Mi wantem tumas blong tij moa klia, olsem Presiden Russell M. Nelson i bin tijim, se “fasin blong sakem sin … hem i wan proses”3 we i tekem taem mo efot blong ripit.4 Mi wantem ol memba blong wod blong mi oli save se God i mitim yumi weaples yumi stap long hem mo i givim gladhat blong helpem yumi truaot long ful proses we i stret evriwan, nomata se bae i tekem taem olsem wanem.
Olsem Wanem Taem Yu Andastanem Gladhat I helpem Yu
Sam yia i pas, wan stadi, we i tekem kolosap 600 yang adalt long Brigham Yang Yunivesiti i bin soem se olgeta we oli save mo andastanem gladhat i ripotem se level blong sik blong tingting i fasfas, wari, wantem mekem samting i stret gud oltaem, mo sik blong stap sem, oli smol nomo.5 Wan niufala stadi afta long faswan i soem se bilif long gladhat i konek long ol hae level blong fasin blong talem tangkyu, fasin blong biliv long yuwan, gat mining long laef, laef i fulap long glad, mo gat hop abaot fiuja.6
Long narafala toktok, pipol oli no sem tumas mo gat moa fasin blong biliv long olgetawan taem oli andastanem se gladhat i fri enitaem—yumi no mekem wan wok blong kasem. Taem yumi save se God i helpem yumi nomata wanem yumi bin mekem o hamas taem yumi filim se yumi no mekem wanem God i askem, yumi kasem insperesen blong gohed mo traem.7
“Mi Bin Mekem Papa long Heven I Harem Nogud”
I no longtaem i pas, wan misinari i kasem kil long wan aksiden long dei blong rere we i spot aktiviti dei mo oli sendem hem i go long haos blong spel. Hem i gat ol hae gol blong kasem help long saed blong bodi blong mit mo bun we hem i nidim mo afta kambak long misin. Be, from hem i gat plante fri taem hemwan mo no gat plan, kwiktaem i lidim hem long ol nogud olfala fasin blong hem.
Hem i spolem hemwan long sin we hem i save se hem i bin sakem ol sin ia finis biaen long hem bifo i go long misin. Hem i lusum hop mo harem nogud abaot fasin blong no save kontrolem hemwan. Moa wari ia i kam bigwan, moa hem i faenem ol wei blong ronwe long ol nogud fasin ia. Hem i wan sekol we i stap tekem hem i go daon mo lus kwiktaem.
“Mi filim olsem se mi mekem Papa long Heven i harem nogud,” yangfala man ia i talem long prishud lida blong hem. “Mi sakem sin long hemia bifo, mo God i bin fogivim mi. Mi promes blong neva mekem bakegen, be afta mi mekem bakegen olsem we mi neva sakem sin long fas ples. Mi no inaf blong kasem fogivnes blong God o help blong Hem. I no naoia Neva.”
Prishud lida blong hem i talem se, “Be yu no glad blong save se gladhat hem i wan presen? Yu no nid blong wok blong winim. Yu nid blong jusum nomo blong kasem taem yu glad blong gohed blong traem mo no givap.”8 Lida ia i serem ol toktok blong Elda Neil L Andersen blong Kworom blong Olgeta Twelef Aposol: “Yumi save glis i gobak, be kwiktaem yumi mas gobak long ol ni blong yumi, mo muv bakegen long raet daereksen.”9
Wan moa taem, yang man ia i lukluk i go long heven mo Sevya i stap blong help. I no kil nomo we yang man ia i kasem hiling long hem, be hat blong hem tu. Wan smol gol long wan taem, mo wetem gladhat i mekem i posibol tru long Jisas Kraes, hem i stat blong kam antap bakegen. Smol taem afta hem i gobak long misin blong hem wetem fasin blong talem tangkyu, fasin blong biliv long yuwan, gat gol long laef, wan laef we i fulap long glad, mo gat hop abaot fiuja. Hemia i wanem we bigfala lav blong Kraes i save mekem.