“!Mi Mi Wari Bigwan! Wanem Nao?,” Blong Ol Yut Oli Kam Strong, Maj 2024.
Paoa long Taem blong Bigfala Wari
!Mi Mi Wari Bigwan! ?Wanem Nao?
Hemia sam tingting blong helpem yu blong yusum paoa blong Sevya blong kamaot long bigfala wari.
Ol pikja droing oli kam Uran Duo
Wari. Bigfala Wari. Wari Presa. Trabol. Wari.
Wanem nem yu givim, hem i pat blong bodi blong mit mo bun stat long taem we Adam mo Iv oli lego Garen. I no gat wan resipi blong wan “laef we i fri long wari.” !I tru, wan laef olsem bae i save winim stamba tingting blong laef! (Luk long 2 Nifae 2:11–12.)
From we yumi no save karemaot evri wari, yumi sud lukluk nomo long olsem wanem yumi handelem. Plante stamba blong wari yumi save seperetem long tu kategori:
-
Ol samting we yu save kontrolem
-
Ol samting we yu no save kontrolem.
1. Ol samting we yu save kontrolem
Blong plante yia, plante man blong ol defdefren fet oli faenem kamfot taem oli talem wanem oli singaot “Serenity Prayer”: “God, givim mi pis blong akseptem ol samting we mi no save jenisim, mi gat strong tingting blong jenisim ol samting we mi save mekem, mo waes tingting blong save difens.”1
Profet Josef Smit i bin givim long ol eli Sent semmak advaes long olsem wanem blong handelem ol plante jalenj blong olgeta: “Ol dia brata we mi lavem tumas, letem yumi glad blong mekem evri samting we i stap long paoa blong yumi; mo afta yumi stanap kwaet, wetem bigfala tras, blong luk fasin blong God blong sevem man, mo blong i soemaot han blong Hem ” (Doktrin mo Kavenan 123:17; oli ademap).
Long narafala toktok: Mekem evri samting we yu save mekem, mo letem God i tekem long ples we yu stop long hem i go. Lukluk long wanem we yumi save kontrolem, olsem:
Ol joes blong yuwan
From Atonmen blong Jisas Kraes, yumi “fri blong mekem joes blong [yumiwan], be i no blong man i mekem joes blong yumi” (2 Nifae 2:26). Yumi sud “lukaotem evri samting we i blong laef long wol ia” blong mekem i gud oltaem (Doktrin mo Ol Kavenan 58:27).
Fasin blong yu
Man Amerika we i stap raetem poem i raetem se, “Wanem we yu sapos blong mekem taem yu no laekem wan samting, i blong jenisim. Sapos yu no save jenisim, jenisim wei we yu tingting long hem.”2 Lukaot gudfala samting long ol pipol mo ol situesen. Tanem ol wok blong haos i kam ol gem. Taem yu sore long yuwan from hamas yu no laekem wan situesen bae i no mekem samting i kam gud.
Ansa blong yu long ol samting we yu no save kontrolem
Yu no save stopem ol hariken, be yu save givim taem, mane, o wok blong helpem olgeta we hariken i spolem olgeta. Yu no save stopem wan fren blong lego Jos, be yu save gohed blong lavem olgeta mo stap wan gudfala eksampol long olgeta. Yu no save stopem wan man blong talem nogud yu, be yu save jusum olsem wanem blong givimbak long man ia.
Mo long evri samting ia, tingbaot wan samting we yu save mekem oltaem: prea. Askem God blong mekem ol samting we yu no save mekem—blong jenisim ol samting we yu no save jenisim. Nomata long risal blong hem, Sevya i save helpem yu blong filim pis.
2. Ol Samting We Yu No Save Kontrolem
Hemia i wan isi kategori blong wok long hem from wei blong wok i simpol:
Sapos yu no save kontrolem, no wari abaot hemia.
Be, eksasaesem fet long Jisas Kraes mo lukluk long wanem yu save mekem blong kontrolem. No letem wari i spolem yu.
I isi blong talem bitim blong mekem, i tru. (?Yu no gat tingting ia blong wantem blong gat wan “wari” swij we yu save onem mo ofem?)
Blong akseptem se problem i bigwan bitim kontrol blong yumi hem i fas step blong no letem wari i spolem yu. Afta yu putum fet blong yu long Jisas Kraes.
Ol samting we yumi no save kontrolem i foldaon long wan long tufala kategori ia:
I hapen we man i no mekem
Nogat inaf kaekae, bigfala drae taem, disasta we man i no mekem. Bigfala wol sik. Sam limit long saed blong bodi blong mit mo bun, mo ol kondisen long saed blong helt. Fasin blong man i save afektem ol samting ia, mo i gat ol step we yumi save tekem blong rere from olgeta o katem daon paoa blong olgeta. Be yumi no save kontrolem evri dei.
Joes blong ol narafala man
Fasin blong pipol onlaen Nomata oli ol fren blong yu we oli stap long Jos o nogat. Wanem ol pipol oli talem biaen long bak blong yu. Ol desisen we ol kot mo ol gavman oli mekem. Wanem i kamaot long TV. Praes blong samting i olsem wanem. Yu save givim tingting blong yu, be long en, evri joes we wan man i mekem we i no yu yu mekem i ova long kontrol blong yu.