Forcë për t’u Përgatitur dhe për t’u Bërë

T’ia Dalësh Mbanë me Shpëtimtarin

Nga Dejvid A. Eduards

Revistat e Kishës

Shpëtimtari po të ndihmon të përmbushësh dëshirat e tua të drejta për të ardhmen tënde.

“Përgatitu për të ardhmen tënde.” Duket sikur ky është mesazhi i nënkuptuar për jetën e një të riu ose të reje – në shkollë, në kishë, në punë, në shtëpi. Mund të fillosh të mendosh: “Po, po. E kuptoj.” Sigurisht e di që e ardhmja po vjen dhe ti duhet të përgatitesh për të. Dhe thellë brenda vetes dëshiron ta bësh të ardhmen tënde të shkëlqyer.

Po arrin ta njohësh vetë zemrën tënde. Po mëson se çfarë dëshiron vërtet. Dëshiron të bësh gjëra të mira dhe domethënëse me jetën tënde, të bësh diçka të rëndësishme dhe afatgjatë në botë dhe në jetën e njerëzve të tjerë, t’i shërbesh Perëndisë dhe t’u shërbesh bashkëqenieve të tua njerëzore. Do të arrish të dish se kjo është e drejtë dhe do të të bëjë vërtet të lumtur.

Prandaj, këtu janë disa gjëra të tjera të rëndësishme për t’i ditur teksa rritesh dhe përgatitesh për të ardhmen:

• Zoti e njeh zemrën tënde gjithashtu (shih te Doktrina e Besëlidhje 6:16). Ngaqë dëshirat e tua të thella dhe të çiltra për jetën tënde janë të mira dhe të drejta, Jezu Krishti është atje me ty për të të forcuar teksa përgatitesh.

• Nuk po përgatitesh thjesht që të bësh gjëra; ti po bëhesh personi që Ati Qiellor dhe Shpëtimtari e dinë se mund të bëhesh.

• Mund të kënaqesh me të tashmen ndërkohë që gjithashtu përgatitesh për të ardhmen. Kjo kohë në jetën tënde është e pashoqe dhe zgjedhjet e mira që bën, të përgatitin për një të ardhme të mirë.

Teksa mendon për atë që po përgatitesh, gjithashtu mendo rreth mënyrës se si Shpëtimtari po të forcon gjatë gjithë udhës. Dhe mendo se çfarë po të ndihmon Ai të bëhesh.

Për Çfarë po Përgatitesh?

Këtu janë vetëm disa shembuj:

• Më shumë arsim

• Besëlidhjet e tempullit

• Misionin

• Martesën

• Punën dhe karrierën

• Familjen dhe të qenit prind

• Dishepullimin gjatë gjithë jetës

Si të Forcojnë Ati Qiellor dhe Jezu Krishti teksa Përgatitesh?

Këtu janë vetëm disa shembuj:

1. Ata të dërguan Frymën e Shenjtë, i cili mund:

   1. Të të ngushëllojë.

   2. Të të udhërrëfejë.

   3. Të të frymëzojë.

   4. Të të kujtojë gjërat që ke mësuar.

   5. Të të japë vetëbesim.

   6. Të të japë paqe.

   7. Të ta qetësojë frikën.

2. Ata i frymëzojnë profetët që të të japin mësim nëpërmjet:

   1. Konferencës së përgjithshme.

   2. Revistave të Kishës.

   3. Transmetimeve të veçanta.

   4. Faqeve në internet të Kishës dhe mediave shoqërore.

   5. Materialit Për Forcën e Rinisë: Një Udhëzues për Bërjen e Zgjedhjeve.

3. Ata i frymëzojnë njerëz të tjerë që të të ndihmojnë dhe të të përkrahin, përfshirë:

   1. Prindërit.

   2. Miqtë.

   3. Udhëheqësit.

   4. Mësuesit.

Jezu Krishti po të Ndihmon të Bëhesh. Kush të Bëhesh?

Jezu Krishti po të ndihmon që të bëhesh më shumë si lloji i qenies që Ai është, më shumë si Ati yt Qiellor.

Ata gëzohen me çdo hap të vogël që bën, për çdo shkrim të shenjtë që lexon, për çdo detyrë që përmbush në Kishë, për çdo detyrë në shkollë që punon fort, për çdo provim për të cilin studion, për çdo stërvitje ku merr pjesë, për çdo fjalë dashamirëse që thua, për çdo veprim shërbimi që jep, dhe kështu me radhë.

Me forcën e Shpëtimtarit, ti do të përgatitesh më mirë për të ardhmen tënde sesa mund të përgatiteshe ndonjëherë pa Të. Dhe do të bëhesh dikush më i lartë.

Përgatitja është pjesë e qëllimit të broshurës Për Forcën e Rinisë: Një Udhëzues për Bërjen e Zgjedhjeve. Leximi i saj mund “t’ju ndihmojë të përgatiteni që të bëni besëlidhje të shenjta në tempull, të përgatiteni për të shërbyer në një mision dhe të gjeni gëzim duke e ndjekur Jezu Krishtin gjatë gjithë jetës suaj”. Atëherë mund të “keni fuqi prej Tij për të përmbushur qëllimet e Tij për ju” ([2022], f. 2).

Ungjilli i Jezu Krishtit: Një Plan për t’u Bërë

“Urdhërimet, ordinancat dhe besëlidhjet e ungjillit nuk janë një listë depozitash që na kërkohet t’i derdhim në ndonjë llogari qiellore. Ungjilli i Jezu Krishtit është një plan që na tregon si të bëhemi ajo çka Ati ynë Qiellor dëshiron të bëhemi.”

Presidenti Dallin H. Ouks, Këshilltar i Parë në Presidencën e Parë, konferenca e përgjithshme e tetorit 2000 (Ensign, nëntor 2000, f. 32).

Vazhdo të Përgatitesh

“E ardhmja do të jetë e lavdishme për ata të cilët janë të përgatitur dhe që vazhdojnë të përgatiten për të qenë mjete në duart e Zotit.”

Presidenti Rasëll M. Nelson, “Përqafojeni të Ardhmen me Besim”, konferenca e përgjithshme e tetorit 2020 (Liahona, nëntor 2020, f. 75–76).

“Nuk e mora seriozisht organizatën e Të Rejave për njëfarë kohe kur isha adoleshente. Por një ditë pashë mamin tim (që ishte një udhëheqëse e Të Rejave) duke punuar me projekte për programin e rinisë. Kujtoj që u ndjeva kaq e frymëzuar nga shembulli i saj për të përparuar shpirtërisht, sa u përpoqa të ndryshoja sjelljen time.

Fillova vërtet të mësoj se çfarë domethënie kishte ungjilli i Jezu Krishtit për jetën time. Me kalimin e viteve, ndjeva një dëshmi se ungjilli i Jezu Krishtit është i vërtetë. Edhe kur jeta ishte e vështirë, teksa po përpiqesha të kuptoja jetën time pas viteve të mia të adoleshencës, ndërkohë që vazhdoja të mbahesha tek ato gjëra që i dija se ishin të vërteta që kur isha vajzë e re, unë pata shumë përvoja shpirtërore që e kanë bërë dëshminë time atë që është sot.”

Sunde I., Misamisi Oriental, Filipine