Kalig-on diha sa Kahuyang

Ang Pagbuntog sa Kahuyang Mao ang Talagsaong Kahanas sa Manluluwas

Ni Tyler ug ni Kiplin Griffin

Si Jesukristo makatabang kanato nga molambo latas sa mga panglimbasog, dili lang sa paglatas niini.

Mga paghulagway pinaagi ni Uran Duo

Si Mason wala mobati sa gugma sa Dios sama sa nangagi. Siya nakigbisog sa depresyon sulod sa pipila ka tuig nga may gamay lang nga kalamposan, ug siya nabalaka nga ang iyang mga damgo tingali wala nay katumanan.

Si Anna nakadungog sa ubang batan-on nga naghisgot og mga kasinatian uban sa pagpadayag ug mga milagro. Bisan og siya naningkamot, siya wala mobati nga daw nakadawat og mga tubag o nakabaton og espirituhanong mga kasinatian sama sa ubang tawo.

Naghunahuna si Ethan kon mobati pa ba kaha siya og kalimpyo o katakos. Siya nagpadala ngadto sa piho nga mga tentasyon sa makadaghan kaayo nga higayon nga siya mibati nga nawad-an og kontrol ug naghunahuna kon siya permanenteng nawad-an sa iyang gisaad nga mga panalangin. Siya naghunahuna kon siya mapasaylo ba ug nagkadako ang mga pagbati nga sad-an diha sa simbahan.

Si Madison nanlimbasog sa ka walay ganang mokaon. Si Olivia adunay kakulangan sa pagkat-on. Si Conner nanlimbasog sa hilabihan nga pagbati nga sad-an (tumang pagbati sa moral nga sala). Si Abigail naabusaran ug gibati nga daw siya walay bili. Ang mga ginikanan ni Jake misinati og diborsiyo, ug siya mibati nga nasakitan ug nalibog. Si Jayden giluiban ug gibati nga siya dili makapasaylo.

Ang mga tawo adunay daghan kaayo nga mga panlimbasog, apan adunay usa ka solusyon. Kana nga solusyon adunay ngalan—Jesukristo. Kining tanan nga mga tawo gustong mobati og kalig-on, kalimpyo, kalipay, ug mamaayo pag-usab, apan sila dili makasulbad sa ilang mga problema sa ilang kaugalingon nga sila lang. Apan si Jesukristo nagtanyag og tabang. Gani, ang pagbuntog sa kahuyang mao ang Iyang talagsaong kahanas. Ang Iyang tabang dili kasagaran moabot kon unsaon o kanus-a nato gusto, apan kini moabot.

Ania ang pipila ka mga baroganan nga motabang kanato nga modawat sa imbitasyon sa Manluluwas sa paglakaw uban Kaniya (tan-awa sa Moises 6:34), ilabi na kon nakigbisog sa kahuyang.

Ang Kinabuhi Gituyo nga Mahimong usa ka Pagsulay

Ang Dios nahigugma kaninyo labaw pa kay sa Iyang paghigugma sa inyong pagbati og kahupay ug kasayon. Pila man sa inyong mga bayani nga nakasinati lang og kahupay ug kalamposan? Ang kalagmitan mao nga, sila balik-balik nga nag-atubang og grabe nga oposisyon ug kalisdanan. Isip kabahin sa atong pagsulay sa kinabuhi “ang Ginoo nakakita nga angay ang pagpanton sa iyang mga katawhan; oo, siya misulay sa ilang pailob ug sa ilang hugot nga pagtuo” (Mosiah 23:21). Kita mahimong dili ganahan niini, apan kasagaran ang atong labing lisod nga mga pagsulay maghatag kanato og talagsaon nga mga oportunidad sa paglambo.

Ang Kahuyang Dili Timailhan sa Pagdumili sa Dios

Daghang karaan nga mga tawo mituo nga ang pisikal o mental nga kasakit mao ang timailhan sa pagsilot sa Dios (tan-awa sa Juan 9:2). Apan ang kahuyang usa ka bahin sa kinabuhi nga sangpotanan sa Pagkapukan. Bisan og ang pakigbisog sa mga hagit normal lang ug mahinungdanon nga bahin sa plano sa Langitnong Amahan, ang pagsagubang nianang mga panlimbasog nga mag-inusara dili. Si Jesukristo wala gipadala sa pagkondinar kanato; Siya gipadala sa paghigugma ug pagtabang sa pagpabalik niadtong kinsa nangawala, huyang, o nag-inusara—nga mao kitang tanan (tan-awa sa Juan 3:16–17; Lucas 15).

Ang Huyang nga mga Butang Himoong Lig-on pinaagi ni Kristo

Importante nga kita moila sa atong kaugalingon pinaagi sa atong koneksiyon sa pakigsaad ngadto ni Kristo ug sa atong pagsalig sa Iyang kahingpit kay sa maila pinaagi sa atong pagkadili hingpit. Si Jesukristo wala gayod mibiya sa huyang kinsa makugihon sa pagpangita Kaniya diha sa hugot nga pagtuo. Ang Dios naghatag sa mga tawo og “kahuyang nga sila mahimo nga magpaubos; ug ang [Iyang] grasya igo alang sa tanan nga mga tawo nga magpaubos sa ilang mga kaugalingon sa [Iyang] atubangan … ug magbaton og hugot nga pagtuo [Kaniya],” ug kon ila kanang buhaton, “niana [Siya] mohimo sa mahuyang nga mga butang nga mahimo nga malig-on ngadto kanila” (Ether 12:27). Kon kita modala sa atong mga panglimbasog ngadto sa Ginoo nga may masulob-ong kasingkasing ug usa ka mahinulsolon nga espiritu (tan-awa sa 3 Nephi 9:20), Mahimong dili Niya kini dayon kuhaon, apan Siya motabang ug molig-on kanato.

Pagmapailobon sa Imong Kaugalingon

Ang dalan sa pakigsaad usa ka taas kaayong panaw, dili lumba sa kapaspason. Ang pagsunod niana nga dalan magtabang kanato agi sa daghang liko-liko, saka ug kanaog, mga kulbahinam ug kapiligro, kahayag sa adlaw ug mga unos sa kinabuhi. Daghang mga leksiyon ang mahimong makat-onan sa matag lakang niana nga panaw. Ang grasya ni Jesukristo kasagaran hinayhinay nga ipadayag sa taas nga panahon, dili lang sa panagsa nga higayon o sa milagroso nga panghitabo.

Pakigsuod kang Kristo

Kon kamo mobati og kahuyang o nanglimbasog, dawata ang imbitasyon sa Manluluwas: “Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo” (Mateo 11:28). Pangita og paagi nga matabangan kamo nga mokonektar ngadto Kaniya. Samtang kamo mangayo sa Iyang tabang, inyong masuta nga Siya naningkamot sa pagtabang kaninyo ug dili gayod moundang sa pagtabang kaninyo! Ang kinabuhi dili hingpit, ni kini gawasnon sa kahuyang, kasakit, ug panglimbasog. Apan mas maayo kini inubanan sa Agalon nga Tig-ayo diha sa inyong kiliran aron sa pagbayaw kaninyo kon kamo mapukan, mobugkos sa inyong mga samad ug mogiya kaninyo diha sa dalan nga padulong sa malungtaron nga hingpit nga kalipay.

Si Jesukristo eksperto sa pagbuntog sa kahuyang. Eksperto Siya pagtabang kaninyo!