Ewi Wāween Kōm̧m̧an an Kweilo̧k eo Lapļo̧k Meļeļe in n̄an Kwe
Kajjieon̄e ļōmņak kein jilu n̄an juon en̄jake eļapļo̧k an em̧m̧an kōn kweilo̧k eo.
Kōmeļeļe ko jān Jarom Vogel
Kweilo̧k eo eļap ej pojān waļo̧k, im ej meļeļe in en wōr juon jelet me enaaj pād ālkin wiikān in kweilo̧k eo! Menin jijpan̄ kein jilu rej kōm̧m̧an bwe kweilo̧k eo en ļapļo̧k meļeļe in n̄an eok.
1. Kōpooj Eok Make ilo Jetōb
M̧okta jān kweilo̧k eo eļap, kwomaron̄ kōpooje jetōb eo am̧ kōn men ko reļam waan āinwōt katak jeje ko rekwojarjar im jar ilo bōro em̧ool. Kwomaron̄ in aaet kōm̧m̧an juon jitlo̧k jān social media ak kōm̧m̧ane juon tūreep eaorōk n̄an tampeļ eo. M̧aanjabpopo ilo jetōb enaaj jipan̄ eok en̄jake kareel in tōl eo an Jetōb Kwojarjar eo.
2. Likūt juon Kajjitōk ilo Kōļmenļo̧kjeņ
Ta eo ekar baj pād ilo kōļmenļo̧kjeņ eo am̧? Emaron̄ wōr juon am̧ jokāālet eaorōk n̄an kōm̧m̧ane, juon n̄ūrbōktak an baam̧le, ak juon kajjitōk an gospel eo. Jar n̄an Jemādwōj Ilan̄ kake, im ron̄jake kōn tōl eo ilo kweilo̧k eo eļap.
Baj lale mōk en̄jake in an James iiō eo ļo̧k!
Ke kweilo̧k eo ekar itok, ikar kōņaan jeļā ewi wāween aō maron̄ em̧m̧anļo̧k aō kōjerbale kajoor in pinmuur eo an Kraist ilo mour eo aō. Ikar lukkuun kajjitōk ippān Jemedwōj Ilan̄ n̄an jipan̄ eō ron̄jake Jetōb eo, jeļā ewi wāween aō kōm̧m̧an kālet ko rem̧m̧anļo̧k, im jeorļo̧k bōd kōn kālet ko aō rebōd.
Iien eo Elder Dieter F. Uchtdorf ekar kōnono, menin ekar makeļo̧k n̄an n̄a:
“Bwe iien eo wōt kwoj kāālet n̄an bar jepļaak im etetal ilo iaļ in an Am̧ Rilo̧mo̧o̧r im Ripinmuur, kajoor eo An enaaj deļo̧n̄e mour eo am̧ im ukote.”
Ikar jeļā menin ekar ta eo Irooj ekar kōņaan bwe in ron̄, im ikar maron̄ en̄jake an Jetōb eo kam̧ool n̄an eō kōn m̧ool eo an. Jān m̧aanjabpopo kōn juon kajjitōk ilo kōļmenļo̧kjeņ, ikar maron̄ in bōk juon uwaak aō make n̄an jar ko aō.
James M., 16, North Dakota, USA
3. Kōjerbale juon Pedped in Katak ak Karuwainene
Ron̄jake juon katakin ak pedped in katak eo ej alikkar n̄an eok. Innām kōm̧m̧ane juon kōttōbar n̄an kōjerbale ilo mour eo am̧. Kwomaron̄ in barāinwōt lukkuun ron̄jake kōn karuwainene ko rej kajju waj jān rikanaan ro im rijjilōk ro. Je im jerbale diktata juon iaan karuwainene kein. M̧akūtkūt ilo tōmak enaaj jipan̄ eok en̄jake m̧ool eo im kajoor in katak ko jān kanaan ko.