Bōjrak jān An̄ūr in Alooje Pija ko Renana
Ikar en̄jake aō make iaō im ejjeļo̧k jipan̄. Ak bisop eo ekar kakeememej eō kōn jet kii ko n̄an pukot kōjatdikdik im jipan̄.
Kōmeļeļe eo jān Sue Teodoro
Ikar jino leļo̧k aō n̄an pija ko renana ke 13 iiō detta. Ikar jirilo̧k im loe ilo social media, jab jeļā kar ta eo im jab meļeļe kake. Ekar oktak aō kōļmenļo̧kjeņ ālkin jirilo̧k eo ikar jab kōtmāne im wōr aō ikdeleel n̄an lale.
Ilo iien eo, ennaan eo an ritōl ro kōn pija ko renana āinwōt n̄e rej ba bwe ekar juon men ļaddik ro wōt rej en̄taan kake. Menin ekar kōm̧m̧an bwe en ļap aō jook. Ikar ļōmņak iban maron̄ jiron̄ļo̧k jabdewōt kōn ̧ļon̄tak in aō. Ikar jeļā kōn Pinmuur eo an Jisōs Kraist, ak kōnke ikar ļōmņak bwe ikar leddik eo wōt ej ļon̄tak kōn menin, ikar en̄jake jekjek eo aō ke Rilo̧mo̧o̧r eo ettoļo̧k n̄an tōpare. Ikar en̄jake āinwōt ikar make iaaō.
Opiij eo an Bisop
Ilo iiō ko, ilo jikin ko āinwōt jemenere ak nokon ko—jabdewōt jikin Jetōb eo ekar pād—emakijkij an itok n̄an kōļmenļo̧kjeņ eo aō n̄an kōm̧m̧ane juon kweilo̧k ippān bisop eo aō. Ium̧win juon iien eaitok, ta eo ekar dāpij eō jān aō kōm̧m̧ane menin ej ļōmņak in ke ewōr juon aō tōmak n̄an rie āinwōt juon ajri em̧m̧an jān juon baam̧le eniknik ilo Kabun̄ in. Ikar ļōmņak enaaj loe eō kōn wōn n̄a—im ikar jab tōmak bwe armej eo ekar jeļā ņae armej. Ikar ļōmņak inaaj kar kweilo̧k im jelm̧ae kaje eļap.
Āliktata ke ikar kōm̧m̧ane kweilo̧k eo, ekar lukkuun oktak jān wāween aō kar kōtmāne. Ijjelo̧kin letok kaje, bisop eo aō ekar jiron̄ eō: “Kwoj wōt juon leddik nejin Anij. Ej iakwe wōt eok, im Ej kaorōk wōt eok.”
Ij keememej aō obrak kōn iakwe. Ekar kein kajuon in aō kar en̄jake kajoor in Pinmuur eo an Rilo̧mo̧o̧r lukkuun kajoor in mour eo aō. Reilikļo̧k, ij meļeļe etke naan ko an bisop eo aō rekar lukkuun in aorōk.
Leddik Nejin Anij
N̄e kwoj en̄taan kōn pija ko renana, kwoj jelm̧ae juon jon̄ak in en̄jake ko rekajokook ejjeļo̧k jem̧ļo̧kier. N̄an n̄a, inaaj maron̄ en̄jake im bōk ļōmņak eo ke ijjab jeļā kadkad eo aō make innām kōjerbale pija ko renana n̄an jelm̧ae en̄jake renana. Innām inaaj en̄jake aō jook im kamakeļo̧k n̄a make jān ro jet, im jekjek in ej bar waļo̧k im bar waļo̧k.
Ium̧win juon iien eaitok, ikar kajjieon̄ in pedped ioon aō kōjerbal kajoor eo aō make n̄an “baj bōjrak.” Ak ikar jab maron̄ kōm̧m̧ane ippa make. Bisop eo aō ekar jipan̄ eō keememej kadkad eo aō—ke ij juon leddik jitōn bōro nejin Anij. Ke ikar kweilo̧k ippān im keememej m̧ool in, ikar jino kōm̧m̧an juon eddōkļo̧k eo em̧m̧an.
Pija ko raorōk an Madelyn im baam̧le eo an
Madelyn ejeļā ke pija ko renana reban wōt toļ eo an de eo aikuj in tallōn̄e. Kōn jipan̄ eo an Rilo̧mo̧o̧r im kein jerbal ko rejim̧we, enej loe kajoor n̄an anjo̧ jān apan̄ ko an mour. Pija in kar bōke m̧okta jān kar tallōn̄e juon toļ aiij ilo Alaska, USA!
M̧ool eo kōn Anij im Rilo̧mo̧o̧r
Ilo jinoin, ikar mijak in jar. Ikar loe Jemedwōj Ilan̄ āinwōt juon Anij an riekajet im illu. Bōtaab dibuk jekjek eo an ukweļo̧k ejjab bōjrak ekar jipan̄ eō meļeļe lukkuun piktok eo an Jemādwōj Ilan̄ im Jisōs Kraist. Jeļā bwe ukweļo̧k juon kōttan ejjab kōm̧m̧an aō bōk kōjparok n̄an en̄taan in ekar kōtļo̧k aō wōnm̧aanļo̧k im pedped ioon jipan̄ an kwojarjar eo Aer. Jemedwōj Ilan̄ ekar kadede jeļā kōn im meļeļe melijjon̄ ko aō, ij aikuj in baj pukotļo̧k E.
Ikar ekkatak bwe jim̧or Jemedwōj Ilan̄ im Jisōs Kraist rej tūriamo̧ im meļeļe. Ilo am̧ oktakļo̧k n̄an Er, Renaaj etetal itūrim im kotak peim̧ ilo aolep bun̄tōn ko an iaļ eo.
Tariņaeiki Kōppeļaak ko an Setan
Meļeļe paotok eo an Anij ekar barāinwōt jipan̄ eō meļeļe kōn Setan im kein jerbal ko an im wāween aer jerbal in jum̧ae kajju n̄an Anij. Juon an Setan kein jerbal ekajoor ej jook, eo me ej oktak jān bōd ak “būrom̧ōj ekkar n̄an Anij” (2 Korint 7:10). N̄e kwoj en̄jake būrom̧ōj, kwoj kile ke kwaar kōm̧m̧ane juon bōd. Ak jook ej kobaiki en̄jake ko renana kwoj en̄jaki kōn kwe make n̄e kwoj jerawiwi n̄an kadkad eo am̧, āinwōt kwe eo kwoj en̄jake kein.
Setan ekōņaan bwe in tōmak bwe imaron̄ anjo̧ jān en̄jake kein kōn n̄a make. Riab in ekar juon men ekar dāpij aō kōnono n̄an bisop eo aō kōn en̄taan eo aō kōn pija ko renana. Ikar en̄jake ke ikar jab maron̄ ioon e m̧ae iien ikar maron̄ ba ekar juon men eo ikar ļon̄tak kake ilo kar tōre ko m̧okta. Setan ej kōjerbal m̧ōjņo̧ ko am̧ kajjojo n̄an kōm̧m̧an am̧ en̄jake am̧ jar erreo n̄an kappukot kajoor in kōmour eo an Rilo̧mo̧o̧r.
Ikar ekkatak bwe Setan ej jerbal ippād n̄e jej makeļo̧k iaad, kōn menin bōbrae eo ad ekajoor ej koba ippān doon. Jet iien ebaj pidodo āinwōt pukotļo̧k ro jet im joļo̧k iien ko raorōk ippān ro m̧ōttad. Ikkeijel ippān Jemedwōj Ilan̄, ippam̧ make, im ippān ro jet (eļaptata ippāņ ro rej loe eok āinwōt an Jemedwōj Ilan̄ loe eok) ej wāween eo em̧m̧antata n̄an keememej kadkad eo am̧ em̧ool: juon ajri eaorōk nejin Anij.
Juon Kōttōpar Eutiejļo̧k
Ilo jem̧ļo̧kin ikar jino ebbōk unoojdikdik n̄an jipan̄ bar juon jiron̄ eo ekar en̄taan kōn pija ko renana. Ikar en̄jake juon kōttōpar eutiejļo̧k. Ikar pepe bwe in kea eļapļo̧k kōn ta eo Jemedwōj Ilan̄ ej ļōmņake jān ta eo ro jet ipeļaakū remaron̄ ļōmņake, kōn menin ikar jino kōnono kōn en̄jake ko aō.
N̄e kwoj en̄jake lan̄lōn̄ eo ban kariabe an ukweļo̧k ej wōnm̧aanļo̧k, kwoj kōņaan kwaļo̧ke ippān ro jet! Kiiō ij wōnm̧aanļo̧k wōt n̄an kwaļo̧k lan̄lōn̄ in ilo aō jerbal āinwōt juon mijenede ej jerbal aolep raan.
Madi kar jitōn̄ e n̄an jerbal āinwōt juon mijenede ej jerbal aolep raan ilo Singapore Mission, kōnono kajin Malay.
Ennaan eo Aō
Kwoj jāmin make iaam̧, im ewōr kōjatdikdik.
En̄taan in ej juon men eo komaron̄ anjo̧ jāne kōn jipan̄ eo an Rilo̧mo̧o̧r, lōke ro kwoj iakwe im ritōl ro, im kein jerbal ko rejim̧we. Bōkļo̧k eok make jān makeļo̧k iaam̧ im pukotļo̧k juon eo kwoj loe kōn mej ko mejān Anij. Kajjitōk ippāer ta eo rej loe ilo kwe!
Jekdo̧o̧n ta eo kwoj tariņaeiki, kwoj jāmin ettoļo̧k n̄an tōpare jān Rilo̧mo̧o̧r im Pinmuur eo An. Jemedwōj Ilan̄ ej lukkuun iakwe eok, im ewōrtokjen wōnm̧aanļo̧k im ukwelo̧k.