Itok, Ļoor Eō
Kwonaaj Ke Ron̄jake?
Tōl eo an rikanaan eo emaron̄ kōjparok, kōjeraam̧m̧an, im jipan̄ kōj—eļan̄n̄e jej kōtļo̧k.
Kōmeļeļe eo jān Alyssa Talent
“Kakkure eo ej itok!”
En̄ņe ej juon ennaan enana n̄an bōke. Ak pijaik m̧ōk ilo kōļmenļo̧kjeņ juon eo kar kūri n̄an leļo̧k e!
Samual Rileman eo ekar kūr jān Irooj n̄an kakkōļ Rinipai ro kōn jerawiwi ko aer. Jutak ioon juon wōrwōr, Samuel ekar kwaļo̧k juon raan “tōn̄tōn̄ in ko̧kkure … men in em̧ool enaaj itok ijello̧kūn n̄e kom̧ij ukeļo̧k” (Hilamōn 13:10).
Samuel ekar barāinwōt kanaan bwe ilo ļalem iiō ko enaaj wōr juon bon̄ ilo an ejjeļo̧k maroklep im juon iju ekāāl ilo mejatoto n̄an kōkkaļļeiki ļotak eo an Rilo̧mo̧o̧r (lale Hilamōn 14:2–5).
Ewi wāween an Rinipai ro uwaak n̄an ennaan eo an Samuel?
Rekar makoko in ron̄jake. Raar “kade kōn dekā [Samuel] … im … lippo̧ņ e ke eaar jutak ioon wōrwōr eo;” (Hilamōn 16:2). Kam̧m̧oolol, armej rejjab kadeļo̧k kōn dōkā ak lippo̧ņeļo̧k rikanaan ro rainin, ak elōn̄ armej ro rej wōt kōjekdo̧o̧n im kajirere kōn naan ko an ilo an katakin m̧ool ko rem̧ool an gospel eo an Rilo̧mo̧o̧r eo.
N̄e rikanaan eo ej kōnono, ewi wāween am̧ uwaak? Kwonaaj ke ron̄jake?
Ewōr jilu kakeememej ko kōn kōjeraam̧m̧an ko me rej itok jān an wōr juon rikanaan ioon laļ in im armej rej ron̄jake e
Rikanaan eo ej Iakwe Kōj im ej Jar kōn Kōj
Ilo elōn̄ kōnono ko an kweilo̧k eo eļap, Būreejtōn Russell M. Nelson ekar jiron̄ kōj:
“Ij iakwe kom̧.” “Kom̧ ļak kar pād wōt ilo ļōmņak eo aō im ilo jar ko aō.”
Ej juon kōjeraam̧m̧an n̄an jeļā bwe rikanaan eo ej iakwe kōj im jar kōn kōj!
Enan̄in ļalem iiō ko ālkin kanaan ko an Samuel Rileman eo, jet Rinipai rekar ba bwe iien eo ekar eļļā n̄an an kūrm̧ool naan ko an. Rekar kajjirere kōn ro otemjej rekar tōmak im aaet kar kālet juon raan n̄an m̧an ritōmak ro eļan̄n̄e kōkkaļļe ko an ļotak eo an Rilo̧mo̧o̧r eo reban itok (lale 3 Nipai 1:6–9). Ilo iien in enana, rikanaan Nipai ekar jar aolepān raan eo “ilo etan armej ro an, … ro renan̄in kar itōn ko̧kkure er kōnke tōmak eo aer” (3 Nipai 1:11).
Rainin, jar ko an rikanaan eo ej jipan̄ kōj ilo elōn̄ wāween ko jān ad maron̄ kile. Tōl eo an jetōb ej bōke jān jar in kōjeraam̧m̧an aolepān laļ in.
Rikanaan eo ej Tōl Kōj n̄an Rilo̧mo̧o̧r.
“Kwōn kotak bōram im kwōn m̧ōņōņō,” Irooj ekar jiron̄ Nipai. “Iien eo emoottok, im ilo bon̄ōn in kakōļļe eo naaj lewōj, im ilo raan eo ilju Ij itok ilo laļ in,” (3 Nipai 1:13).
Ke eaar tulo̧k aļ, ekar jab marok. Kakkaļļe eo ekar itok! (Lale 3 Nipai 1:15.) Jibbon̄ōn̄ eo tok juon, aolep rekar jeļā bwe ekar raan eo Rilo̧mo̧o̧r eo enaaj kar ļotak, im juon iju kāāl ekar waļo̧k (lale 3 Nipai 1:19, 21). Men otemjej Irooj ekar kanaan kake jān Samuel kōn ļotak eo an Rilo̧mo̧o̧r ekar kūrm̧ool āinwōt an baj Irooj ba enaaj kar.
Itok eo an Rilo̧mo̧o̧r n̄an laļ in ekar m̧ōkaj an lo̧mo̧o̧ren ritōmak ro wōj jān mej. Ak ekar jab lo̧mo̧o̧ren wōt er. Jisōs Kraist ekar itok n̄an lo̧mo̧o̧ren kōj aolep jān jerawiwi im mej, letok n̄an kōj kajoor ilo iien ko remenin aikuj, im bōktok kōj im lan̄lōn̄ kōn Pinmuur eo An. Menin ekar lukkuun ennaan eo an aolep rikanaan “eo [ekar] kanaan jān kar jinoin laļ” (Mosaia 13:33). Rikanaan eo ej tōl kōj n̄an Rilo̧mo̧o̧r, eo ej “N̄a iaļ, im m̧ool, im mour” (Jon 14:6).
Rikanaan eo ej Kean̄ kōn Mool eo
Iien kein kajuon in aō kar riiti Bok in Mormon eo ilo high school, juon katak jān Samuel Rileman eo ekar itok n̄an eō. Ekar jiron̄ Rinipai ro bwe eļan̄n̄e renej lem̧aanļo̧k aer ukweļo̧k iien eo enaaj itok n̄e iien eo enaaj erom̧ “iien en rum̧wij indeeo im indeeo.” Ekar ba, “kom̧ ar kappukot aolep raan ko in mour ko ami kōn men eo kom̧ij jab maron̄ bōk e; … kom̧ ar kappukot m̧ōņōņō ilo kōm̧m̧an nana,” men eo āinjuon jān jekjek in weeppān eo an Jemedwōj Ilan̄ (Hilamōn 13:38).
Ilo tōre in ad, Būreejtōn Nelson ekar katakin ejja katak in wōt:
“Ilo an laļin ba bwe kajoor, m̧weie ko, bun̄bun̄ ko, im kam̧ōņōņō ko an kanniōk rej bōktok m̧ōņōņō, rejjab! Rejjab maron̄! …
“M̧ool eo ej bwe eļap ļo̧k an kam̧ōkm̧ōk n̄an kappukot m̧ōņōņō ijo kwoj jāmin lo ie! … Jisōs Kraist … , im E make, [ewōr] kajoor n̄an kotak eok jen anjiwiwi in laļin.”
Jet RiNipai rekar kālet n̄an ron̄jake im tōmak naan ko an Samuel, elōn̄ ro jet rekar jab (lale Hilamōn 16:1–8). Ilo elōn̄ wāween ko, rainin ejjab lukkuun oktak.
Ta eo kwonaaj kāālete? Kwonaaj ke ron̄jake rikanaan eo?
Būreejtōn Nelson ekar katakin:
“[Rikanaan ro, rilolo ro, rikwaļo̧k revelesōn ro] remaron̄ jab aolep iien ba n̄an armej ro ta eo rekōņaan ron̄jake. Rikanaan ro rejjab bun̄bun̄. Ak renaaj aolep iien katakin m̧ool eo!”
Ilo am̧ ron̄jake rikanaan eo im m̧akūtkūt ekkar n̄an naan ko an, kwonaaj loe kanaan in tōl im kōjparok eo an, kōjeraam̧m̧an, im jipan̄ eok ilo aolepān mour eo am̧.