Ainikien Jodikdik ro

An Jab Jetjet Aō M̧ōn̄ā ņae. Lukkuun Wōn N̄a

Ium̧win juon iien eo eaitok, ikar en̄taan kōn juon nan̄inmej in an jab jetjet aō m̧ōn̄ā ņae etan anorexia nervosa, me ej dikļo̧k im dikļo̧k wōt am̧ m̧ōn̄ā im inepata kōn am̧ eddoļo̧k. Ej jelet eok ilo kōļmenļo̧kjeņ—kwoj jino en̄jake ke ej am̧ bōd kōn am̧ m̧ōn̄ā im kwoj jab meļeļe aikuj ko an ānbwinnum̧. Ejjab jipan̄ n̄e baj loe jon̄ak ko rejjab jejjet online ak ilo jikuuļ, im ikar keidi n̄a make n̄an baam̧le eo aō im ro jet ipeļaakū.

An jab jetjet aō m̧ōn̄ā ekar lukkuun juon men eo ikar ņo̧je. Ak jino ekar kile oktak ko ilo imminene ko n̄e ij m̧ōn̄ā. Ekar jijet ippa im letok n̄an eō eļap iien jon̄an wōt aō aikuji n̄an jiron̄ e kōn ta eo ej waļo̧k. Ekar ļap dān in kōmjaļaaļ, ak ij ļōmņak Jetōb eo ekar jipan̄ e jeļā ta eo ij aikuj jipan̄ kake. Ippān doon, kōm̧ ar kōm̧m̧ane juon karōk im kar jino jerbal kake.

Ilo iien jab in, ikar barāinwōt pepe n̄an bōk kōjeraam̧m̧an in petriak eo aō. Ikar kōņaan jeļā ta eo ilo mour eo aō emaron̄ in āinwōt itulikin maroklep eo ikar en̄jake. Ikar itok ilo kajjitōk n̄an Anij, “Wōn n̄a?,” “Kwoj Ke Iakwe Eō?,” im “Etke Ij Pād Ijin?” Men eo jinoin tata petriak eo ekar ba ekar juon uwaak n̄an kajjitōk ko. Kōjeraam̧m̧an eo aō ej jipan̄ eō katak kōn lukkuun wōn n̄a im ta eo Anij ekar kakoņ n̄an n̄a. Jabdewōt iien ij riiti, ij en̄jake iakwe eo an Rilo̧mo̧o̧r eo n̄an n̄a im keememej ta eo imaron̄ erom̧ Ippān.

Aaet kōn jipan̄ eo an kōjeraam̧m̧an eo an petriak eo aō, baam̧le eo aō, Jema Ilan̄, im aō Rilo̧mo̧o̧r, ekar bōk juon iien eaitok n̄an eō n̄an en̄jake en̄jake ko aō kōn ānbwinnū. Jet iien ej pen wōt n̄an aō errā kōn wōn n̄a im paaktokū. Ak kōnke iien ko aō rekar remarok, ij jino eddōkļo̧k im meram eo me ej itok jān aō kile lukkuun wōn n̄a. Ij juon leddik nejin Jemedwōj Ilan̄. Ij juon rikaļoor an Jisōs Kraist. Rej reitok n̄an iō kōn iakwe im rōjan̄, im men kein raorōkļo̧k jān naan ko an jabdewōt armej.

Annalise B., iiō 17, Georgia, USA

Em̧m̧an ippān jerbal ilo hospital intership eo an im kōm̧m̧an pija im al n̄an kautiej Anij im kōm̧am̧an ko An.

Jet armej ro rej en̄taan kōn jab jetjet m̧ōn̄ā emaron̄ in aikuj n̄an pukot jipan̄ an ro retijem̧ļo̧k ilo kakkobaba n̄an kōnono n̄an ro jineer im jemāer im ritōl ro an Kabun̄ in.