Bōk—im Leļo̧k—Jipan̄ kōn Ājmour ilo kōļmenļo̧kjeņ
N̄e ej itok n̄an ājmour ilo kōļmenļo̧kjeņ, kwomaron̄ kajjitōk kōn jipan̄ im leļo̧k n̄an ro jet barāinwōt.
Kōmeļeļe jān Simona Love
Ta eo kwoj aikuj in kōm̧m̧ane n̄e kwoj būrom̧ōj, n̄ūrbōkta, nana mour, inepata, ak jab m̧ōņōņō.
Kwomaron̄ kōtmāne uwaak eo n̄an erom āinwōt in: Mour kōn gospel. Jar. Riiti jeje ko rekwojarjar. Bōk kwojkwoj eo. Im wōnm̧aanļo̧k n̄an kōm̧m̧ane men kein ej em̧m̧an im mennin aikuj im ej ņamejļan (im bōbrae) elōn̄ jorrāān ko. Ak jet n̄ūrbōktak ko rej aikuj bar jet kijejeto ko.
Aolep rej en̄jake inepata ak būrom̧ōj jet iien, ejim̧we. Ej m̧ōttan wōt mour. Elōn̄ wāween ko reājmour ilo jelm̧ae men kein. Ak eļan̄n̄e inepata ak nana mour elukkuun ļap ak ejjeļo̧k jem̧ļo̧kin ilo an jelōt mour eo am̧ im bōbraeik eok jān en̄jake Jetōb eo, innām komaron̄ pād ilo wāween eo me epen tōpare ilo kōtmāne n̄an em̧m̧anļo̧k ijjeļo̧kin wōt bar jet jipan̄ ko.
Ājmour ilo kōļmenļo̧kjeņ ej ājmour in ānbwin (lale N̄an Kōkajoorļo̧k Jodikdik ro: Juon Unin Tōl n̄an Kōm̧m̧ani Jokāālet ko [2022], 29). Chemical ko ilo kōmālij eo ad rej jipan̄ kōjparok en̄jake ko ad, im kōmālij eo m̧ōttan wōt ānbwin eo. Jabdewōt eo ej bar nana mour ak inepata ej “aolep pād ilo bōram̧” ej pād wōt ioon en̄jake: bōram̧, ilo m̧ool, ijo kōmelij eo am̧ ej pād ie. Ak jorrāān ko rejjab kiiō ilo kōļmenļo̧kjeņ jān juon ne ebwilo̧k ak ebbōj ko ilo m̧ōjn̄al.
Pukot Jipan̄
Bok in Mormon ej ba bwe Rinipai ro rekar jeraam̧m̧an “kōnke jon̄an em̧m̧an eo an mennin eddek ko rellōn̄ ko Anij eaar kōpooj n̄an kōm̧akūt unin nan̄inmej ko,” (Alma 46:40). Rainin, jemaron̄ ņaetan men kein uno.
Rainin, Anij ekar kōpooje aaet elōn̄ļo̧k wāween ko n̄an tariņaeiki nan̄inmej im jorrāān, ekoba metak ko ilo kōmālij im en̄jake. Ewōr kiiō ippād kōm̧admōd ko kiiō me riNipai ro—im ro jibūd im jim̧aad, n̄an wāween in—kar ettōņak wōt kaki. Jej mour ilo juon iiō in kabwilōn̄lōn̄ ko! Im Jemādwōj Ilan̄ ekōņaan bwe jen kōjerbali.
Ejjab meļeļein menin bwe aolep ro rej en̄taan kōn aer in kōļmenļo̧kjeņ ak nana aer mour rej aikuji uno ak taktō in therapy ro. Aolep roktak. Ak jekdo̧o̧n ta jekjek eo kwoj pād ie, juon men em̧ool: Ejjeļo̧k juon un n̄an en̄taan make iaad. Jem̧ōm̧ Ilan̄ ej m̧ōņōņō n̄an jipan̄.
Jemōm̧ Ilan̄ ejeļā ta eo enaaj jipan̄ eok. Men̄e en̄taan ko am̧ remaron̄ in ņamejļaer kōn jar im tōmak, ak m̧en̄e kwoj barāinwōt aikuj kappukot kōjeraam̧m̧an ko kōn jet kobain uno ko, taktō ro, m̧am̧a im baba, ro m̧ōttam̧, bisop ro, ritōl ro an jodikdik ro, rūkaki ro, mejatoto eo ekāāl, im kājjimourur jān iien ko reppen, kajjitōk kōn jipan̄ eo An. Jab lukkuun ļap am̧ inepata kōn wāween an ro jet kōn ejja jorrāān kein wōt ņamejļāer. Jemedwōj Ilan̄ enaaj jipan̄ eok pukot uwaak ko n̄an tōpar jekjek eo am̧.
Kwōn Lukkuun Jipan̄
Aolepān gospel in ej kōn jipan̄ ro jet, anōke wāween eo Rilo̧mo̧o̧r ekar jipan̄ kōj kōn Pinmuur eo An. Kwoj aikuj aolep iien kajjieon̄ “pukotļo̧k ro rej en̄jake aer ajimakeke, make iaer, ak ejjeļo̧k jipan̄ n̄an er. Jipan̄ er en̄jake iakwe eo an Jemedwōj Ilan̄ kōn kwe” (N̄an Kōkajoorļo̧k Jodikdik Ro:Juon Unin Tōl n̄an Kōm̧m̧ane Jokāālet ko, 12). Kwomaron̄ bōlen jab juon taktō ak juon therapist, ak kwoj juon rikaļoor an Kraist “jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an,” (Mosaia 18:9).
Juon iaan men ko raorōk tata kwomaron̄ kōm̧m̧ane n̄e juon eo kwoj iakwe ej en̄taan kōn aer in kōmālij, nana an mour, ak nan̄inmej ko jet an kōmālij ej n̄an ron̄jake.
Emakijkij, men eo me juon armej ej en̄taan kōn ājmour ilo en̄jake im aikuji am̧ tūiam̧o̧ im kwaļo̧k am̧ iakwe. Rej jab kōtmāne kwe bwe en kajju wor juon am̧ uwaak me enaaj ņamejļan men otemjej. Er rej aikuj in kwaļo̧ki. Er rekōņaan bwe juon armej en pād ippāer, ron̄jake er, im kwaļo̧k naan in kaenōm̧m̧an—n̄an ba, “Ij errā, ta eo kwoj jelm̧ae āinwōt elukkuun nana. Joļo̧k aō bōd. Ikōņaan bwe in kar kōm̧admōde. Jouj kōm̧m̧an bwe in jeļā ewi wāween aō jipan̄.”
Im keememej …
Mekarta kwe eo kwoj leļo̧k jipan̄ ak armej eo ej aikuj jipan̄, keememej bwe ewōr jet men ko Anij wōt emaron̄ kōm̧m̧ani. Kōtļo̧k bwe En kōm̧m̧ani. Ilo tōre in, kōm̧m̧ane ta eo komaron̄e n̄an kōjparok eok make im armej ro ipeļaakūm̧.