Mauaina o le Filemu ina ua Pipili
Ina ua pipili i se faalavelave na taavalevale ai se taavale, sa ou mafaufau pea, “Aisea ua tupu ai ia te au?” Ae o le faia o ni nai mea na fesoasoani ou te lagona ai le filemu.
Atapue mai faaaloaloga a le aiga o Traveller
I le 2022, sa matou tietie ai ma a’u uo i se taavale laitiiti, mo auala gaoa i le toafa ae matou aafia ai i se faalavelave na taavalevale ai le taavale. Sa ou te’i a’e i luga o le eleele, ua ufitia i le toto. Sa le mafai ona ou lagonaina se mea. E lei umi ae sau se vaalele helikopa e ave a’u i se falemai. Sa ou iloa ua gau lua lo’u ua i ni pito se lua ma ua pe atoa lou tino amata mai i ou tauau agai i lalo.
I le taimi muamua, sa mautinoa lava le tofotofoina o la’u molimau. Sa ou mafaufau pea, “Aisea ua tupu ai ia te au?” Ou te lei malamalama pe aisea na faasaoina uma ai au uo mai le faalavelave sei vagana ai a’u. O a’u o se tagata 16 tausaga sa iai i le vaega o tagafiti ma au faafiafia, ma e le o le mea lea sa ou vaai faalemafaufau i ai mo lo’u olaga.
Filifili le Lotofaafetai
I se tasi aso ina ua mavae le faalavelave sa ou i se aso matua faigata lava, ma sa ou le manao e aluese mai le moega ma alu atu i togafitiga faamalositino. Ae sa ou alu, ma sa ou vaai ai i se tamaloa iina sa pipili ma sa mu foi o ia. Sa ataata o ia ma talanoa atu i foma’i uma, ma sa ou mafaufau, “Afai e mafai ona ia faia, e mafai foi ona ou faia.”
Ina ua mavae lena aafiaga, sa mafai ona ou taulai atili atu i le lotofaafetai. Sa ou iloaina lo’u laki tele, ma sa mafai ona ou taliaina atili lo’u tulaga ua i ai. Sa ou iloaina e tatau ona ou filifili e ala i luga ma taulai atu i mea lelei, e pei o lo’u aiga matagofie ma le talalelei a Iesu Keriso.
Vaai i talaatu o Faailoga
Ua ou iloa o le fesoasoani i isi tagata e fesoasoani ai foi ia te au. Ou te manatua le vaaia o ni talavou se toalua i togafitiga, o e sa pipili. Sa ou alu atu ma talanoa atu ia i laua, aua ou te fiafia foi pe ana faapea e faia e se tasi lena mea mo a’u.
E toatele naua tagata o loo feagai ma mea faigata. I togafitiga faamalositino, e te vaaia ai nei tofotofoga uma o siomia ai oe lea e matuai vaaia lava. I le aoga maualuga, o loo feagai foi tagata uma ma le tele o mea, ae e leai se tasi na te iloaina moni lava. Ua sili atu ona natia. O loo i ai uma nei faailoga, e pei o le “tagata taalo lakapi” ma le “tagata faafiafia.” O nisi taimi e taufaafefe le aluese mai igoa ma faailoga, ma faia ni uo fou. Ou te fiafia lava e faafiafia ma ta fiti, ma ou te mafaufau lava i le tele o taimi o mea ia e faamatalaina ai lo’u tagata.
Ae sa ou iloaina o na faailoga e le o mea uma na o le olaga. O foliga o tagata, o le a le ese o i latou mai ia te oe—o na mea e le taua tele. E mafai ona e aapa atu i tagata uma ma taulai atu e fesoasoani ia i latou. Ma o lenei o nisi o a’u uo mamae o ni tagata semanu ou te le mafaufauina o ni uo muamua.
Faalagolago i le Faaola
Ina ua mavae sina taimi i se nofoaga autu e toe faafouina ai le malosi, sa mafai ona ou maua se malosi e gaioi ai o’u lima ma ni lagona i o’u vae. E faaauaua pea ona ou alualu i luma i aso taitasi.
Ou te le iloa pe faapei lou lumanai, ma a aunoa ma le Alii, o le a ou fefe. Ae talu ai nei lava na ou mauaina ai lou faamanuiaga faapeteriaka, ma e fesoasoani lena mea ou te lagona ai le mautinoa po o le a lava le mea e tupu, o le a ou le afaina. O le faitauina o tusitusiga paia ma le faia o a’u tatalo i aso uma ua fesoasoani tele foi ia te a’u. A aunoa ma Iesu Keriso, ou te iloa o le a sili atu le leaga o ou tauiviga. E fesoasoani mai o Ia ia ou lagonaina le filemu e tusa lava pe faigata mea uma.
E alala le tusitala i Iuta, ISA.