O Iesu Keriso O Lou Malosiaga Lea
Tauagafau: O La’u Malaga Umi
“Tina, aumai ia te au se mafuaaga lelei lava se TASI e tatau ai ona ou ofu tauagafau. Ua ou faalogo uma lava i ai.” (Pe o le tulaga lea sa ou manatu ai.)
Maimau pe ana mafai ona ou faapea atu sa ou ola ae ma fiafia i le mataupu faavae o le tauagafau, ae o le mea moni, e leai. E ui ina sa aoaoina a’u e o’u matua e taua le tauagafau, ae sa ou manatu o ofu e le tauagafau i luga o faaaliga sa ou matamata ai, sa sili atu ona aulelei nai lo se isi lava mea tauagafau.
Sa ou faalogo i le tele o mafuaaga mo le laei tauagafau lea sa le talafeagai ia te a’u, mai le “O le tauagafau e matua maoae lava” i le “O lou tiutetauave le laei tauagafau e taofia ai mafaufauga o tama mai manatu le talafeagai.” O le auala le tauagafau sa ou faia ai o’u lavalava na ou maua ai le gauaiga sa ou manao ai. Sa ou le manao foi e mafaufau i faamanuiaga o le laei tauagafau, ma sa ou lagonaina le ita tele pe a uunaia au e tagata e faia.
“Aumai ia te A’u Se Mafuaaga Lelei e Tasi ”
I se tasi tau mafanafana, sa matou tafafao ai ma ni nai uo. Sa vaai mai lo’u tina i le ofu e le tauagafau sa ou ofuina ma fai mai, “Elizabeth, ua e latalata atu i le tulaga faatagata matua. E matuā manaomia lava ona e mafaufau e uiga i le ituaiga tagata e te manao e avea ai oe, ma o lena mea e aofia ai ma foliga vaaia e te manao e tuuina atu i tagata.” Ina ua ia fai mai lenei mea, sa ou sauni e tau.
“Tina, aumai ia te a’u se mafuaaga lelei se tasi e tatau ai ona ou ofu tauagafau. Ua ou faalogo uma i ai. Ma o loo ou faatalitali pea e faalogo i se mea e le aofia ai tama ma o latou manatu. Tuu mai ia te au se mea, soo se mea lava, e talafeagai.”
Sa ia tilotilo atu i fafo i le faamalama mo sina taimi. Ina ua mavae sina taimi le leoa, sa ia tilotilo mai ia te au ma le alofa ma ia faapea mai i se leo filemu, “Ona o se mataupu faavae o le usiusitai, ma e te alofa i le Tama Faalelagi.”
Sa matuai aveesea lagona uma o le fia sii taua atu, ma sa le mafai ona ou toe tali atu. O ana upu na totoina ai le fatu sa ou manaomia e amata faatoilaloina ai lenei tauiviga.
O le Mea Moni e uiga i le Tauagafau
Sa amata ona ou iloaina o le tauagafau sa le na o le ala sa ou faia ai ou lavalava. E pei o lapataiga i tusitusiga paia e faasaga i le ofuina o ofu taugata (tagai i le Alema 5:53; Mamona 8:36–39), o la’u filifiliga o lavalava ua na o se faailoga o le faamaualuga i mafaufauga ma amioga. Ma o lena faamaualuga o se mea sa ou taofi mau i ai mo le tele o tausaga. Sa ou le manao e tuu ese le mea sa ou manao i ai, o le faamaoniga moni ma le gauai atu, mo le mea na finagalo ai le Tama Faalelagi mo a’u.
Fai mai le taiala Mo Le Malosi o le Autalavou., “E finagalo le Tama Faalelagi ia tatou vaai atu i le tasi ma le isi po o ai moni lava i tatou: e le na o ni tino faaletino ae o Ana fanau pele e i ai se taunuuga paia” ([2022], 24). Sa amata ona ou vaai i lo’u tino o se mea paia, o se mea sa manaomia ona ou faaaogaina e viia ai le Atua, ae le o a’u lava.
Faatumuina i Lona Alofa
Ina ua amata ona ou salamo, sa faatumuina e le Tama Faalelagi vaega o lo’u loto sa manao i gaua’iga, i Lona alofa. Sa matuai mamana lenei mea, ma sa ou maua ai le faamoemoe tele lea na amata ai ona tuua e le manao i le le tauagafau lo’u agaga.
O le auala na ou talanoa atu ai na amata ona suia, sa tuputupu ae lo’u alofa mo isi, ma sa faateleina lo’u manao e auauna atu. Sa le na ona ou faaaogaina le mataupu faavae o le usiusitai i le Atua i lou olaga; sa amata ona ou fiafia i ai. Sa mafai ona ou lagonaina lona mana puipui. O lenei suiga na fesoasoani ou te saunia ai e alu i le malumalu ma osia feagaiga matagofie ma paia i Lona maota.
Ua ou fiafia nei i le tauagafau auā ou te fiafia i le mataupu faavae o le usiusitai, o se mea ou te lei mafaufauina lava o le a tulpu. Ae e lei fiu lava le Tama Faalelagi ia te a’u, ma o le a Ia le fiu lava ia te oe i soo se mea o loo e tauivi ai, e tusa lava pe o se malaga umi, ma patupatu.