O Leo o le Autalavou

Faasoa atu ma Auauna atu

Faia o Mea Lelei i Kana

O iinei i Kana, o le a e maua ai se aganuu lelei, meaai lelei, ma le mea aupito sili ona taua, o ni faauoga lelei ma isi tagata. O le toatele o a’u uo o ni tagata O Le Ekalesia a Iesu Keriso o le Au Paia o Aso e Gata Ai, ma o la’u uo mamae sa papatisoina i ni nai tausaga ua mavae. E fiafia o ia e tausua mai ia te a’u ma fai mai, “Aisea na e le vave fai mai ai ia te au ou te auai i le Ekalesia?” Ma e sa’o lava o ia! O lea la, o loo ou faia nisi mea e aumai ai tagata i le lotu, fesoasoani ia i latou e auai i gaoioiga, ma fesoasoani ia latou iloa mea uma e faatatau i ai.

I la‘u vasega i le aoga, e na o le toalua lava isi tagata o le Ekalesia. O le mea matou te talitonu i ai e pei o se lalolagi fou i nisi o tagata o lau vasega. E masani ona latou fesili mai ia i matou ni fesili e uiga i le talalelei, ma o nisi o na fesili e faigata ona tali. Afai matou te le iloa le tali i se fesili, matou te talanoaina faatasi ma saili le taitaiga mai o matou taitai o le Ekalesia. O le taimi lava matou te iloa ai le ala e tali atu ai, matou te ta’u atu i tagata o le matou vasega e uiga i mea ua matou iloa e moni. Ua ou valaauliaina foi nisi o i latou e o mai ma vaai mo i latou lava pe faapefea ona matou tapuai, ma ua latou maua ni lagona lelei e uiga i le sauniga faamanatuga.

Ua ou aoaoina foi o le tele o le lelei e te faia, o le latalata atili foi lea o le Agaga Paia ia te oe. E masani ona ou fesoasoani i tagata i luga o le auala pe afai o loo latou tauaveina ni mea se tele. Talu ai nei, sa ou vaaia ai se tamaita’i o amo ni mea i luga o lona ulu. Ou te lei iloa le tamaita’i po o se mea e uiga ia te ia, ae sa ou savali atu ia te ia ma fesili atu pe mafai ona ou fesoasoani. Sa ia taliaina, o lea sa ou aveina ai nisi o mea sa ia tauaveina.

Ina ua ma taunuu i lona fale, sa ou iloa ai o ia o se tagata tao meaai. I lena taimi, sa ou le faigaluega, ma sa ou manaomia se auala e sefe ai ni tupe faaopoopo. Na te lei iloa sa ou manaomia se galuega. Ae sa tei lava ua ia fai mai ia te a’u sa ia manaomia se tasi e fesoasoani ia te ia i le taoina o le falaoa ae maua le totogi. Sa ia ofoina mai ia te a’u ni taimi patino lea sa fetaui lelei lava i a’u fuafuaga pisi. Ou te le manatu o se mea na tupu faafuasei ae o se faamanuiaga mai le Atua mo le fesoasoani atu i isi. Ia te au, o le Tama Faalelagi lenei na fetalai mai, “Lo’u atalii e, ua ou vaai i mea lelei o loo e faia!”

Ou te molimau atu o Iesu Keriso o le taula’iga, ma o Ia o le ala. E tatau ona tatou auauna atu ia te Ia ma i latou o siomia i tatou.

Joshua M., 17, Greater Accra Region, Kana

E fiafia e faitau ma taalo i taaloga, aemaise lava le soka.

O Se Faamanuiaga o le Tausaga Fou i Atenitina

Sa ou valaauliaina se uo i se pati o le Po o se Tausaga Fou i le lotu. E le o ia o se tagata O Le Ekalesia a Iesu Keriso o le Au Paia o Aso e Gata Ai ae e i ai sona vaaiga lelei e uiga i le ekalesia. Ina ua sau, sa ‘ōna o ia. Sa amata ona i ai ia te ia se lagona atuatuvale faafuasei lava, ma sa amata ona ia faamatala mai ia te a’u ni tulaga faigata o lo’o feagai ma ia ma lona aiga. Sa ou iloaina e tatau ona ou fesoasoani ia te ia.

Sa ou aveina o ia i lo’u tamā. Sa ou talosaga atu ia te ia pe mafai ona ia tuuina atu ia te ia se faamanuiaga faaleperisitua. Sa ou ta’u atu ia te ia nai vaega itiiti lava e uiga i faamanuiaga, ma sa ia fai mai e manao i se faamanuiaga. Ina ua uma le faamanuiaga, sa le toe tagi o ia ma sa ataata foi!

Ina ua mavae lenei aafiaga, sa ia fesilisili mai ia te au e uiga i le perisitua. Faatasi ai ma se isi uo, sa ou faasoa atu ai le auala ua faamanuiaina ai i matou ma o matou aiga e le talalelei.

Sa ia te au se lagona lelei i le faasoaina atu o le talalelei i si a’u uo. Ia te au, o se so’o o Iesu Keriso e taumafai ia avea e faapei o Iesu Keriso ma faia mea sa Ia faia, aemaise lava pe a tatou matauina se tasi o feagai ma se taimi faigata.

José J., 14, Buenos Aires, Atenitina

E fiafia e ta le piano, tietie i lana uila, pese, kuka, faatufugaga, ma musika.

Tatalo a le Peresitene o le Vasega

O se aso malulu o Ianuari ina ua talosagaina au e auauna atu o se peresitene o le vasega a Tamaitai Talavou. O lo’u tausaga muamua lea i le polokalama a Tamaitai Talavou, ma e ui ou te lei faamoemoe e avea ma peresitene o le vasega, ae sa ou matuai fiafia lava. Sa ou ataata ma lue lo’u ulu.

Ona ta’u mai lea ia te a’u e amata ona tatalo po o ai o’u fesoasoani.

Sa vave ona mou atu lo’u fiafia ma liua i le popole. Sa ou popole ina nei o’u filifilia tagata sese, pe sili atu foi ona leaga, o le a le mafai lava ona ou filifili!

Mulimuli ane i lena po, sa ou tau atu i lo’u tina sa ou popole o le a le mafai ona ou faia se faaiuga. Sa ia fai mai ou te alu i lo’u potu, fai se tatalo, ma faitau ni nai fuaiupu mai le Tusi a Mamona.

Sa ou alu i lo’u potu, ma le popole pea. Sa ou faia se tatalo, ma ole atu i le Tama Faalelagi e fesoasoani mai ia te au e faia le filifiliga sa’o. Ona ou susueina lea o tusitusiga paia i le mea na gata ai la’u faitau ma faitau le fuaiupu muamua na ou vaai i ai. Sa fai mai: “Ma ua fetalai mai Keriso: Afai tou te faatuatua mai ia te a’u o le a outou maua le mana e fai ai soo se mea e tatau ai ia te a’u” (Moronae 7:33).

O le taimi lava na ou faitauina ai lena fuaiupu, sa ou iloa ai sa tali mai le Tama Faalelagi i la’u tatalo. Sa ia silafia a’u ma sa manao e fesoasoani mai ia te a’u. Pau le mea e tatau ona ou faia o le tuu atu o lo’u faatuatua ia te Ia, ma o le a Ia fesoasoani mai ia ou iloa le mea e fai.

Ou te iloa e silafia i tatou e le Atua ma o le a Ia fesoasoani mai ia i tatou pe afai tatou te naunau e tuu atu lo tatou faatuatua ia te Ia.

Emmeline K., 14, Iuta, ISA

E fiafia e tusitusi, faatufugaga, ma musika, e aofia ai le tusia o pese mo le piano ma le kitara.