O Le Auaunaga e Faia se Eseesega
Sa lei mautinoa e Amelia pe o le a ia lagona le faaaofia ai o ia i le lotu. Ua fiafia tele o ia ua aapa atu tagata.
Ata na pueina e Daniel Scott
O Amelia, o se tamaitai talavou i Niu Sila, e lei toe alu i le lotu mo le fitu tausaga.
I le taimi o le tatalaga o le faaipoipoga a ona matua, sa tuu ai le aiga o Amelia i se tulaga faigata, ma sa tonu ia i latou e le toe auai i le lotu. “Matou te lei maua le lagolago mai ni tagata,” na manatua ai e Amelia.
Ae i se tasi Aso Sa, i le fitu tausaga mulimuli ane, sa tonu ai i le tina o Amelia e toe taumafai e auai i le lotu. Sa ia maua se aafiaga lelei ma valaaulia lana fanau teine e toe foi mai i le lotu faatasi ma ia. Sa mafaufau Amelia, “O le a se mea o le a aveesea mai ai ia te a’u i lenei mea?”
“Ua Ou Fiafia Lava Ua E I ai Iinei”
“Sa fai si o’u le mautonu i le taimi muamua,” o le tala lea a Amelia. “Sa lei i ai ia te au se mafutaga sili ona lelei ma le Ekalesia.”
Ae sa tonu ia te ia e talia le valaaulia a lona tina, ma e lei faanoanoa ai. “O le taimi lava na ou savali atu ai i le lotu, sa fai mai tagata ia te au, ‘Ou te lei vaai muamua ia te oe iinei’ ma le ‘Susu maia i la matou ekalesia’ ma ‘Ua ou fiafia lava ua e i ai iinei!’” Ua manatua ai e Amelia.
“E leai se tasi na faaesea au. Sa fiafia ma agalelei tagata uma.
Ae a o tilotilo solo Amelia i le taimi o le lotu, sa amata ona ia mafaufau atonu e le i ai lava se tulaga o le auai o ia iina. “Sa ou tuuese a’u lava mai tagata ona sa amata ona ou faatusatusaina a’u lava i mea na iloa e isi tamaiti ma pe o ai na latou iloa,” o le tala lea a Amelia. “O le toatele o tamaiti i la’u uarota o ni aiga pe o ni uo mamae talu mai lo latou laiti, o lea sa foliga mai ai sa latou iloa lelei le tasi ma le isi,” o lana tala lea.
Ina ua uma le sauniga faamanatuga sa sau le epikopo ia Amelia ma fai atu, “Talofa, o au o Epikopo Watts. Ou te fiafia mo oe e te faatalofa atu i tagata uma.” Sa ia aveina o ia i le potu o Tamaitai Talavou ma faailoa atu o ia i isi teineiti. “O se fegalegaleaiga taua tele lena aua na ou maua ai lenei aloiafi o le faamoemoe lea e mafai ona ou faia se nuu i le mea sa ou i ai,” o le faamalamalama mai lea a Amelia.
Ma o lena mea na uunaia ai o ia e toe foi i le lotu i le Aso Sa na sosoo ai.
O Se Lesona i le Agalelei
O le vaiaso na sosoo ai, na feiloai ai Amelia ia India, le afafine o le epikopo. Sa ia fai mai, “Talofa, na ou vaai ia te oe i le isi aso. O lo’u igoa o India. O se mea manaia tele le faamasani ia te oe.”
O lena aso, sa talanoa ai le vasega e uiga i se mea e lei aoaoina muamua e Amelia. Sa faalagolago atu India ma fesili atu, “E te malamalama i lenei mea?” Sa fai mai Amelia, “E leai.” O lea na fesoasoani ai India ia te ia ia malamalama i le lesona.
“Ua ou le manatua le lesona i lenei taimi, ae ou te manatua le auala na ia matauina ai sa ou manaomia le fesoasoani,” o le tala lea a Amelia. “O lona agalelei mai ia te au o le lesona aupito taua lea sa ou aoaoina i lena aso.”
Sa aoao e India ia Amelia i mea uma na te mafaia e uiga i le lotu, ma sa ia fesoasoani ia Amelia e sue tali i ana fesili. I na vaiaso popofou ma masina sa avea ai o ia e pei o se taiala ia Amelia. “Sa ia iloa lelei lava le tala e fai atu,” na manatua ai e Amelia. “Sa o se mea aupito sili lea ona faaleagaga na ou oo i ai i le tele o tausaga.”
A o taumafai Amelia e faaaofia faatasi ma tagata fou, sa faamautinoa atu e India ia te ia e leai se tasi e faamasinoina o ia ona o lona tulaga fou i le lotu. “Sa ia faia ia ou lagona le toafimalie i lou tulaga fou (i le lotu),” o le tala lea a Amelia.
Sa faailoa atu e Amelia ia India ni nai vaega e uiga i ona tauiviga i le tulaga o lona aiga, e aofia ai le nonofo faatasi ma se tama sauā a o lei tatalaina le faaipoipoga a ona matua. “O India o le tagata muamua lea sa ou faatuatuaina i lena siosiomaga,” o le tala lea a Amelia. “Ou te iloa e galue le Tama Faalelagi i vavega, aua soo se taimi lava ou te talanoa ai ia India, e na te fai mai lava se mea e fesoasoani ai. Sa ia faamautinoa ou te le lagonaina lava le tuuatoatasi.”
Fai mai Amelia na tuuina atu e India lana faamautinoaga e mafai ona ia toe foi atu i le ala i le mea na finagalo ai le Tama Faalelagi mo ia. “Ou te manatu e le mafai ona ou toe foi mai i le lotu pe ana leai India po o Epikopo Watts,” o le tala lea a Amelia.
Sa fesoasoani India (i le itu agavale) ia Amelia ia lagona le toe talileleia i le lotu.
E faatatau i le Aapa Atu
O le faigauo a Amelia ma India na fesoasoani ia Amelia e latalata atili atu ai i le Faaola. “Ina ua ou toe foi mai i le lotu, sa ou le mautinoa pe faapefea ona maua se sootaga ma Iesu Keriso. Sa fesoasoani mai India ia te au ia malamalama e ui lava sa le mafai ona ou vaai i le Faaola, ae sa mafai lava ona ou lagonaina Lona alofa, faatosinaga, ma vavega i lou olaga,” o le faamalamalama mai lea a Amelia. “Sa ia faaali mai ia te au le alofa faaKeriso. O lenei la, ou te fia avea ma se India i se isi tagata. Ou te fia i ai iina mo se tasi pe a latou manaomia au.”
E talitonu Amelia o le auaunaga e sili atu lona uiga nai lo le faia o se tofiga—o se mea e faatatau i le aapa atu i tagata. “O le auaunaga o le vaaia lea o se tasi i se tulaga faigata ma, nai lo le faatalitali mo i latou e fesili atu mo se fesoasoani, o le i ai iina pe a mafai ona manuia ai se isi tagata,” o le tala lea a Amelia. “Sa auauna mai India ma Epikopo Watts ia te a’u ao ou popole i le leai o se nuu. I le taimi nei la lea ua i ai, ua ou fiafia lava sa aapa mai se tasi.”
E manao Amelia i isi talavou ia iloa e alolofa le Tama Faalelagi ma Iesu Keriso ia i latou, e tusa lava pe latou te lagona le le faaauaiina o latou. “Afai e te lagona e le lava lou lelei, pe e te le auai iinei i lenei Ekalesia, ia manatua o lou nofoaga foi lenei,” o lana tala lea.
“Ma e mafai lava ona e toe foi mai.”