“Ngang emon Chon Kuno noun Jises Kraist,” Ren ewe Pochokunen Serafo, Jan. 2024.
Porous Ren ewe Pochokunen Serafo Iteiten Maram, Janurary 2024
Ngang emon Chon Kuno noun Jises Kraist
Ka tongeni tapweno mwirin ewe Chon Amanau me achou fetanei An kapas ngeni ekkoch.
En mi mwo kan ekieki ika pwata, mwirin echikara aramas, Jises a ereni ekkoch me neir pwe resap ereni emon (nengeni Mark 7:36)? Eu popun epwe meni pokiten ekkewe sokkun chon tapweno mwirin a namot ngeni I. Enipw kopwe ekieki pwe ika aramas ra kapas usun ar chikareta epwe iei anen an aramas repwe mochen tapweno mwirin. Nge nengeni, Jises ese chok aucheani repwe tapweno mwirin. A aucheani chon kuno.
Jises a ereni Peter me Andrew, “Tapweto mwiri” (Matthew 4:19). Ewe uwekisin Joseph Smith a chiakuni sia anea, “Ngang I mine ekkewe soufos ra makkei; tapweto mwiri” (Joseph Smith Translation, Matthew 4:18 [non Matthew 4:19, footnote a]). Ewe koko esap ren ach sipwe chok nonnom Ren non ekis fansoun. A mwochen pwe repwe Neun chon kuno fefeino.
Ese chok mochen pwe repwe katon An asukuna aramas, tongei aramas, me fori ekkewe manaman. A mochen pwe repwe pwan fori usun. A mochen An we angang epwe pwan ar angang. Fini Kraist wewen pwe repwe kaeo ar repwe anganga usun An angang me ekieki usun An ekiek. Repwe kaeo ar repwe manaeni usun Manauan, me I epwe aitir usun met mi auchea ngenir ar repwe winiti usun I.
Ewe kapasen Greek ren chon kuno mathetes. Wewen pwe nap seni chon kuno ika chon sukun. Fan ekkoch a chiakun a wewen emon chok kaeo. Non fansoun Jises, chon kuno rachok fini ewe masta seni ion ra mochen repwe kaeo seni me anonga ar repwe tongeni winiti pwisin masta. Kraist ese fiti ei sokkun napanap. Efen sorei me a pusin finata noun kewe chon kuno. Ikenai, Kraist a kokkori kich sipwe feito ngeni I. A kori kich sipwe Noun chon kuno me afanafana An we kapas ngeni Noun aramas pwe repwe ani manau ese much (nengeni 3 Nifai 5:13).
Emon fopun seni Haiti non ewe fonuen Caribbean a pwarano an mochen epwe chon kuno noun Kraist ren an etiwa emon chienan esap chon ei Mwichefen epwe fiti non ewe mwichen FSY. Akomwan semen chienan we ese mochen noun we epwe fiti. Souemwenin Mwichefen ra awewei usun ei mettoch mi murino epwe fisi ngeni me ekkewe murinon chon aninisin serafo repwe anisi me tumunu. Ewe semenap a mutata an noun we fopun epwe fiti, me mwirin an kuna ewe ekkesiwin non manauen ewe nengin, a pwan mut ngeni noun we epwe fiti fan me—onu maram mwirin—a papatais.
Emon onuan seni Argentina non South America a pwarata an mochen epwe emon chon kuno noun Kraist seni an amongoni chienan kewe anan kewe okasi nupwen ar fiti bus ngeni sukun. Nupwen a kuna efou mi nenen kofi, a awewei pwe esap mwo fan eu epwe neni pwe ese wor emon me non an famini e un kofi. A poputani ar aporous usun ewe Mwichefen, a pwan etiwer repwe feito fan, minne a fen pwan emweni emon chienan kewe ne fiti ei Mwichefn me fori an angangen misineri non Chile.
Esap meinisin ekkewe ka kapas ngenir fan iten ei Mwichen ika etiwer ngeni mokutun Mwichefen repwe mochen fiti. Mi chok Och. Esap meinisin Kraist a kapas ngeni nupwen An we nom won fonufan mi pwan fiti. Nupwen sia fini ach sipwe noun Jises Kraist chon kuno me afanafana An kapas, Epwe anisi kich me pesei kich. Sipwe kaeo ach sipwe winiti usun I, me ina met chon kuno ra fori.
© 2024 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porous Iteiten Maram Ren ewe Pochokunen Serafo, January 2024. Language. 19273 901