“Maysaak a Disipulo ni Jesucristo,” Para iti Pigsa dagiti Agtutubo, Ene. 2024.
Binulan a Mensahe iti Para iti Pigsa dagiti Agtutubo , Enero 2024
Maysaak a Disipulo ni Jesucristo
Mabalinyo a suroten ti Mangisalakan ken isaknap dagiti balikasna kadagiti dadduma.
Napanunotyo kadin no apay a kalpasan ti panangagasna kadagiti tattao, imbilin ni Jesus iti dadduma kadakuada a saanda nga ibaga iti uray asinoman (kitaen iti Marcos 7:36)? Ti maysa a rason ket mabalin nga adda pakainaiganna iti kita dagiti pasurot a kasapulanna. Mabalin a panunotenyo a no pagsasaritaan dagiti tao maipapan kadagiti panangagasda ket nasayaat dayta a wagas para ken Jesus a mangallukoy kadagiti pasurotna. Nupay kasta, saan laeng a dagiti pasurot ti kasapulan ni Jesus. Kasapulanna dagiti disipulo.
Imbaga ni Jesus kada Pedro ken Andres, “Umaykay sumurot kaniak” (Mateo 4:19). Iti Patarus ni Joseph Smith daytoy a bersikulo mabasa a, “Siak ti insurat dagiti propeta; umaykayo sumurot kaniak,” (Patarus ni Joseph Smith, Mateo 4:18 [iti Mateo 4:19, footnote a]). Ti awis ket saan a makikadua laeng Kenkuana iti apagbiit. Kayatna nga agbalinda a disipulona iti agnanayon.
Saanna laeng a kayat a buyaenda Isuna a mangisuro kadagiti tao, agayat kadagiti tao, ken agaramid kadagiti milagro. Kayatna a kasta met ti aramidenda. Kayatna nga agbalin a trabahoda ti trabahona. Ti kaipapanna ti panangpilida ken Cristo ket masursuroda ti agserbi a kas iti panagserbina ken agpanunot a kas iti panagpampanunotna. Sanayendanto ti panagbiag a kas iti panagbiagna, ket isurona ida ken itedna ti tulong a kasapulanda tapno agbalinda nga ad-adda pay a kas Kenkuana.
Ti Griego a sao ti disipulo ket mathetes. Saan laeng a pasurot wenno estudiante ti kayatna a sawen. Masansan a maipatarus dayta kas aprentis. Idi panawen ni Cristo, gagangay a pilien dagiti disipulo ti maestro a kayatda a pagsursuruan tapno maipamaysada ti agbalinto met a maestro. Saan a sinurot ni Cristo ti gagangay a nakaugalianda. Binalbaliwanna ket sinapulna ketdi dagiti disipulona. Ita, awisennatayo ni Jesucristo nga umasideg Kenkuana. Awagannatayo nga agbalin a disipulona ken iwaragawag ti balikasna kadagiti taona tapno maaddaanda iti agnanayon a biag (kitaen iti 3 Nephi 5:13).
Impakita ti maysa nga agtutubo a babai manipud Haiti iti Caribbean ti tarigagayna nga agbalin a disipulo ni Cristo babaen ti panangawisna iti gayyemna a saan a kameng ti Simbaan a kumuyog kenkuana iti FSY conference. Idi damo, saan a kayat ti ama ti gayyemna a palubosanna ti anakna a mapan. Inlawlawag dagiti lider ti Simbaan maipapan kadagiti positibo a padas nga agur-uray kenkuana ken dagiti nasayaat a young adult counselors a mangaywanto kenkuana. Impalubos ti ama a tumabuno ti balasangna, ket kalpasan a nakitana ti nagbanagan daytoy iti biagna, impalubosna pay a tumabuno kadagiti miting ti Simbaan ken—innem a bulan kalpasanna—mabuniagan.
Impakita ti maysa nga agtutubo a lalaki manipud Argentina idiay South America ti tarigagayna nga agbalin a disipulo ni Cristo babaen ti panangibingayna iti sumagmamano a kendina iti maysa a gayyemna bayat ti panagluganda iti bus nga agturong iti eskuelaan. Idi nakitana ti maysa nga addaan iti raman ti kape, inlawlawagna a dina pulos napatanor ti panagramanna iti dayta a raman gapu ta awan ti siasinoman iti pamiliana nga umin-inum iti kape. Dayta ti nangiturong iti saritaan maipapan iti Simbaan, a nangiturong iti awis nga umay kadagiti miting, a nangiturong idi agangay iti pannakikameng ti gayyemna iti Simbaan ken panagserbina iti mision idiay Chile.
Saan nga amin a kasaritam maipapan iti Simbaan wenno awisem nga umay iti maysa nga aktibidad ti Simbaan ket agkamengda. OK dayta. Saan met a nagkameng ti amin a nakasarita ni Cristo bayat ti naindagaan a panagserbina. Kaskasdi, bayat ti panangpilitayo nga agbalin a disipulo ni Jesucristo ken iwaragawag ti balikasna, ikkannatayo iti tured ken nadiosan a tulong. Masursurotayo no kasano ti agbalin pay nga ad-adda a kas Kenkuana, ket dayta ti ar-aramiden dagiti disispulo.
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, January 2024. Language. 19273 864