Bulanan nga Mensahe sa Para sa Kusog sang mga Lamharon, Pebrero 2024

2 Nefi 5

Nagakabuhi Bala Ako “suno sa Paagi sang Kalipayan”?

Ni Eric D. Snider

Mga Magasin sang Simbahan

Ari ang pila ka mga ideya nga makapangabuhi kamo sa paagi nga siling ni Nefi ang iya katawhan nagpangabuhi.

Drowing ni Alyssa Gonzalez

Wala madugay pagkatapos nagsipak halin sa mga Lamanhon, nagsiling si Nefi nga ang iya katawhan “nagpangabuhi suno sa paagi sang kalipayan” (2 Nefi 5:27). Tungod may isa ka grupo sang katawhan nga gusto sila pamatyon (tan-awa sa 2 Nefi 5:1-6, 14), daw makakilibot ina. Paano mangin malipayon ang bisan sin-o sa amo sina nga mga sirkumstansya?

Una sa tanan, tandai nga ang “nagkabuhi kami suno sa paagi sang kalipayan” wala nagakahulugan nga “ang tagsa ka Nefinhon malipayon sa tanan nga oras adlaw-adlaw.” Buot silingon sini nga nagkabuhi sila sa paagi, kag naghimo sang mga butang, nga sa kabilogan nagapadulong sa kalipayan. Sa kabug-osan, bisan pa nga may mga hangkat sila, malipayon ato nga tion.

Gani ano ang “paagi sang kalipayan”? Paano naton masunod ini sa aton kaugalingon nga mga kabuhi, nga may mga hangkat man? Hambalan naton!

• Mangin matinumanon. “Kag amon ginbantayan ang pagtuman … sang mga kasuguan sang Ginuo” (2 Nefi 5:10).

  Ang pagpangabuhi sang ebanghelyo amo ang Una nga Tikang. Mahimo nga mangin malipayon ka sa pagpakasala, pero indi ini magdugay. Ang hungod nga pagsupak sa Dios indi “ang paagi sang kalipayan” (tan-awa sa Alma 41:10).

• Tun-i ang balaan nga mga kasulatan. “Ako, si Nefi, … nagdala man sang mga kasulatan nga nakurit sa mga lamina nga saway” (2 Nefi 5:12). “(Amon) … ginsayasat ang mga ini kag nakita nga maayo ang mga ini; huo, bisan nga dako sing bili para sa amon” (1 Nefi 5:21) .

  Ang katawhan ni Nefi may ara sang balaan nga mga kasulatan. Kag indi lang nga ara ang mga ini sa ila—ginsayasat nila ang mga ini.

• Magpamati sa inspirado nga mga lider. “Ako, si Nefi, nagkonsagrar kanday Jacob kag Jose, agud sila magmangin mga pari kag mga manunudlo sa bug-os … sang akon katawhan” (2 Nefi 5:26).

  Ining mga manunudlo naggamit sang balaan nga mga kasulatan bilang ila giya (tan-awa sa 2 Nefi 4:15; 6:4).

• Magkadto sa templo (kag sa iban pa nga balaan nga mga lugar). “Ako, si Nefi, nagpatindog sang isa ka templo” (2 Nefi 5:16).

  Importante nga may balaan nga mga lugar pareho sang mga meetinghouse kag mga templo para sa pagtipon kag pagsimba sang mga disipulo. (Pwede kita maghunahuna nga ang mga Nefinhon indi lang nga may ara sang templo—sa pagkamatuod gingamit gid nila ini.) Kon indi ka personal nga makakadto sa templo, pwede ka gid maghimo sang buluhaton sa family history.

• Mangin mapisan. “Gintudluan ko ang akon katawhan sa pagpatindog sang mga dakbalay, kag sa pagpamanday. … Nagpatuga [Ako] nga ang akon katawhan mangin mapisan, kag magpangabudlay paagi sa ila mga kamot” (2 Nefi 5:15, 17).

  Kabahin sang “paagi sang kalipayan” amo ang pag-angkon sang ulubrahon! Asaynment, trabaho, responsibilidad—bisan ano nga nagahatag sa imo sang tutok kag katuyuan (syempre, nga may nagakaigo nga tiempo sa pagrelaks). Mabudlay ang mangin malipayon kon pirme ka ginatak-an.

Makasiling ka bala nga nagakabuhi ka suno sa paagi sang kalipayan subong? Kon indi, basi ang ehemplo ni Nefi makahatag sa imo sang pila ka mga ideya kon paano mas mag-ayo pa gid.

© 2024 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, February 2024. Language. 19276 861