“Ren ewe Pochokunen Serafo: An ewe Chon Amanau Porous Ngonuk,” Ren ewe Pochokunen Serafo, Mar. 2024.

Poraus Ren ewe Pochokunen Serafo Iteiten Maram, March 2024

Ren ewe Pochokunen Serafo: An ewe Chon Amanau Porous Ngonuk

Seni Elter Dieter F. Uchtdorf

Seni ewe Mwichen Ekkewe Engon me Ruemon Aposel

Ei emwen a anisuk kopwe apacha finiom kewe ngeni Jises Kraist me An annuk.

Ekieki nge en mi nom non Galilee me nom, 2,000 ier ano. En me chienom oua etiwetiw ngeni eu mwichen serafo non ewe neni, nge kopwe ausening ngeni emon chon afanafan mi auchea: Jises ewe re Nazareth. Me non och fansoun non An porous, Jises a etiwa ekkewe serafo non ewe mwich pwe repwe kapas eis Ngeni.

Met sokkun kapas eis ka ekieki pwe kopwe rongorong?

Ua ekieki ekkoch kapas repwe wewe ngeni ewe oreni me nonomun na fansoun. Nge ua wesen ennetin nuku pwe chommong me neir epwe ngingin usun ach kapas eis ikenai.

Ren awewe, non ewe Testamen Sofo, aramas ra eisini ewe Chon Amanau sokkun ekkei:

Met upwe fori ai upwe ani manau ese much?¹
Ngang mi ketiw? Ngang mi ketiw non?²
Ika pwi we a foffor mi ngaw ngeni ei, fan fite upwe omusano?³
Met epwe fis ngeni ei fonufan non fansoun mwach? Upwe tumun?⁴
En mi tongeni echikara ekkewe ua men tonger?⁵
Met ewe ennet?⁶
Pwata upwe sinei ika ngang mi fetan non ewe an mi pung?⁷

Sise ma aureki ekkewe chok mettoch nonno non fansoun me fansoun? Non fansoun me fansoun, napengeni kapas eis rese ekkesiwin. Usun chok an Kraist we umoumoch ngeni ekkewe ra eis ekkena kapaseis. A sinei usun fitikoko me osukosuk non manauach. A sinei usun mecheresin ach sipwe mworukono. A sinei pwe sia nuokus fan ekkoch usun kan fansoun mwach. Me A kapas ngonuk me ngang, usun chok An apasa ngeni Noun chon tapweno mwirin me nom:

“Ousap osukosuka netipemi.”⁸
“Ngang ewe an [me] ewe ennet.”⁹
“Tapweto mwiri.”¹⁰

Nupwen a wor ami auchean finata oupwe fini, Jises Kraist me An ewe kapas allim mi niwinsefanito ikana ekkana murinon finata. Nupwen a wor ami kapas eis, Jises Kraist me An ewe kapas allim mi niwinsefanito ikana ponuwan mi auchea.

Iei popun ua men sani Ren ewe Pochokunen Serafo: Eu Emwen ren om kopwe fini mochenum. A itini ngeni kich Jises Kraist pwe sipwe tongeni angei An pochokun. Ua onomu echo kapin non pwekitei non fansoun meinisin. Nupwen ua churi aramas non unusen fonufan ekkewe ra mochen sinei kich ion, ren sounengin ewe Mwichefenin Jises Kraist, fori met sia fori, Ua nounou ngenir ei puken emwen.

Ren ewe Pochokunen Serafo a aiti kich ennet esemuch usun ewe Chon Amanau me An we An. A etiwok kopwe fori met met kopwe fori anongong won ekkewe ennet. Me a ngeni kich pwonen feioch pwe Mi fang ngeni ekkewe ra tapweno Mwirin. Kose mochen anea, ekipwichi, me nounou aiti ekkoch ei puken emwen!

Etiwanong I

Jises Kraist amen mochen epwe nonom non manauom—epwe sopwosopw, nonom iteitan, non fansoun murino me ngaw. Ese chok uta me nesopun ewe an, utuk om kopwe tikeri. Epwe fituk ne fetan anen om eipweipw. I chok ewe An!

Nge esap echimok epwe tonong non manauom. Kopwe etiwa I, ren om finata. Iei popun eu puken emwen ren finin foffor, usun Ren ewe Pochokunen Serafo, amen fokkun auchea. Iteiten om fori mi pung anongonong won an ewe Chon Amanau we ennet, ka pwarata nge en mi mochen I non manauom. Ekkei foffor a suki ewe asamen nang, me An pochokun a ninanong non non manauom.¹¹

Fori eu Nefin mi Pochokun

Enip kopwe chechemeni pwe ewe Chon Amanau a anonoi ekkewe ra ausening me fori A apasa ngeni ewe mwan mi tipachem ewe a “oueta imwan we won eu achaw.” A awewei:

“Ewe ran a pungutiw, me ekkewe konik ra puu, me ekkewe asepwan ra enien, me wichi ewe imw; iwe ese turuno, pun a kauuta won eu achaw.”¹²

Eu imw ese tano non ewe asepwan pokiten ewe imw ammen pochokun. Ese chok pwan tano pokiten ewe achaw mi pochokun. Ewe imw a pochokun non ewe asepwan pokiten a nongonong won ewe achaw mi pochokun. Ewe pochokunen ewe nefin ngeni ewe achaw akon auchea.

Usun chok, nupwen sia auweta manauach, a auchea sipwe fori met mi murino. Me a auchea sipwe weweiti an ewe Chon Amanau we ennet. Nge ewe pochokun a namot ngeni kich ach sipwe pochokun ngeni kewe osukosuk epwe fis nupwe sipwe apacha ach foffor ngeni Jises Kraist me An we annuk. Ina met Ren ewe Pochokunen Serafo a anisi kich sipwe fori.

Ren awewe, chienom kewe enip epwe sinei pwe ke sotuni om kosap nounou ekkewe kapas mi ochou me ametek. Enip repwe kuna om chiechi ngeni ewe semirit non sukun minne napengeni aramas rekan omonungaw seni ika turunufasei. Nge ir mi sinei pwe ke fori ekkei pokiten Jises Kraist a ait ngeni kich pwe “meinisin aramas ir pwich me mongeach—pachenong … aramas minne ir mi sokono sonuk”?¹³

Chienom kewe enip repwe sinei pwe kekan no fan iteiten raninfen. Enip repwe kuna nupwen kopwe ofeno echo sokkun kon ika kose etiwa ekkoch etiwetiw ren katon kachito. Nge ir mi sinei pwe ke fori ekkei foffor pokiten mi wor om “eu pwapwan pwon ngeni Samach won Nang me Jises Kraist,” me ina eu ach kewe pwon sipwe tapweno mwirin ewe Chon Amanau, kamen kinisou “an ewe Ngun mi Fel nonnom reom pwe chienom iteitan”?¹⁴

Enip aramas repwe sinei nge kose sakaw ika uun supwa ika angei ekkewe mettoch mi ngaw. Nge ir mi sinei pwe ke fori ekkei foffor pokiten Jises Kraist a ait ngeni kich “inisum mi pin,” “eu auchean niffang seni Samach won Nang,” a for non Napanapan?¹⁵

Chienom kewe enip repwe sinei pwe kose churi ika kapas mwaken me ka ennetin kaeo. Nge ir mi sinei pwe ka fori ei pokiten Jises Kraist a ait ngeni kich “pwe ewe ennet epwe angasakono”?¹⁶

Naponon, chienom kewe mi sinei pwe fan ekkoch ka fori ekkei foffor ese sinneno om kopwe nukuchar ngeni an Kraist kewe annuk pokiten ka sinei pwe “Jises Kraist i om pochokun”?¹⁷

I Om Pochokun

Ua ngeni kemi ai ennetin pwarata pwe Jises Kraist i ewe An ngeni eu saram me ning non fansoun mwach—fansoun mwom. Me I pwan ewe An ngeni eu saram me ning ikenai. Fetan non An an, Epwe fituk ne fetan. Ka tongeni föri ei!

Chienei achengicheng serafo, Jises Kraist is om pochokun. Achocho fiti ne fetan, me I epwe anisuk kopwe asita “won poum poun chon nang usun eagles”¹⁸ ngeni pwapwa ese much minne A amonata fanitom.

© 2024 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiaku ren Porousen Iteiten Maram Ren ewe Pochokunen Serafo, March 2024. Chuukese. 19356 901