“Mwe Ahkkweye Mwet Fuhsr: Kahs lal Mwet lahngo nuh Sum,” Mwe Ahkkweye Mwet Fuhsr, Mahs 2024.
Pweng ke Mwe Ahkkweye Mwet Fuhsr Mahlwem Nuhkwewa, Mahs 2024
Mwe Ahkkweye Mwet Fuhsr: Kahs lal Mwet Lahngo nuh Sum
Ma se inge kahsre kom in kapsruh sulaclah lom in kuhpahsr nuh sel Jisus Kraist ac mwe lutlut lal.
Nga tulac ke sruhnguhl uh ac tongtong, sel J. Kirk Richards
Nuhnkuh muh kom muhta Galilee yac 2,000 somlah ah. Kom ac kawuhk lom suliyuhk in wi toeni se ke lohm alu se ac mwet se ma sramsram ingacn pa Jisus. Ac ke el sramsram ah, asr puhluhn pacl se el suli mwet fuhsr in kihsensiyuhk nuh sel.
Kihsensiyuhk fuhkah kom nuhnkuh tuh kom e lohng uh?
Sahp kuhtuh kihsensiyuhk inge e kuhpahsr nuhke ohiyacn moul lalos ac puhluhn pacl uh. Tuhsruhk nga luhlahlfongi na upac muh puhkantwen ma e oacna kihsensiyuhk lasr in pacl inge uh.
Ke Wuhlweacng Sasuc an, mwet uh siyuhk sel Mwet Lahngo kain kihsensiyuhk inge:
-
Meac nga enenuh in oruh in eis moul ma pahtpaht?1
-
Yac kom eis yuc? Fal nga in oasr ke acn nga oasr kac ingena?2
-
Fin tamuhlwel se wiyuhk oraclah ma koluk se nuh sihk, pacl ekahsr nga enenuh in nuhnak muhnahs nuh sel?3
-
Meac e sikyak nuhke facluh se inge ke pacl fahsruh uh? Yac nga e sukohsohklah liki ongaiyac?4
-
Kom kuh in onwelah mwet sacohk se luhk inge?5
-
Meac ma pwacye?6
-
Nga e etuh fuhkah fin nga fahsr ke inkacnek pwacye?7
Yac tiac kuht nohfohn nuhnkuh ma inge ke puhluhn pacl nuhke pacl? Tukun yac pohs, wacngihn eklac ke kihsensiyuhk inge. Luhngse luhn Mwet Lahngo lasr nuh sin mwet siyuhk inge tiac pac eklac. El etuh elyahiyacn ac fohsiyacn moul se inge. El etuh lah fihsrwacsr mwet uh in fahsr liki inkacnek pwacye. El etuh lah kuhtuh pacl uh kuht elyah ke pacl fahsruh uh. Ac el fahk nuh sum ac nuh sihk, oacna ke el tuh fahk nuh sin mwet e met ah:
Ke oasr sulaclah yohk srihpac kom enenuh in oruh, Jisus Kraist ac wosasuc fohlohkihnyuckyak Lal pa acn se emeet kom suk uh. Ke oasr kihsensiyuck lom uh, Jisus Kraist ac wosasuc fohlohkihnyuckyak Lal pa top wowo nuh kac uh.
Pa inge srihpac se oruh nga luhngse Mwe Ahkkweye Mwet Fuhsr: Mwe Kolyuck in Oraclah Sulaclah. El pwen kuht nuh yohrohl Jisus Kraist tuh kuht in kuh in eis kuh lal. Nga us puk se inge lun pakiht luhk uh pacl nuhkwewa. Ke nga sun mwet fin facluh suc luhngse etuh lah efuh kuht mempuhr ke Alu luhn Jisus Kraist oruh ma kuht oruh uh, nga ahkacsruhi puk se inge nuh selos.
Mwe Ahkkweye Mwet Fuhsr luti ma pwacye kacl Mwet Lahngo ac ke Inkacnek lal. El suli kom in oruh sulaclah lom in ukwe ma pwacye inge. El oacyacpac akacsruhi ke mwe insewowo ma el sang nuh sin mwet ma fahsr tohkohl uh. Nuhnakmuhnahs riti, nuhnkuh kac, ac akacsruhi nuh sin mwet sahyac puk se inge!
Suhlwacl nuh yurum.
Jisus Kraist el ke wi kom in moul lom—ke pacl wo ac pacl koluk. El tena tu ke sahflahiyacn inkacnek soko ngacn muhkwena, tuhpan kom in sonol. El ac wi kom fahsr pacl nuhkwewa. El pa inkacnek pwacye!
Tuhsruhk el ac tiac sifacna eisacl nuhke moul lom an. Kom pa e solwacl lacn wi kom uh, ke sulaclah lom an. Pa inge sripac se oruh puk se inge Mwe Ahkkweye Mwet Fuhsr, arulacna yohk sripac uh. Pacl nuhkwewa kom sulaclah ma pwacye uh, kom ahkkahlwemye lah kom ke elan asr in moul lom. Sulaclah wo lom inge ac ikuhslah motonwac nuh inkosrao, ac kuh lal e fah puhtat nuh feim ke moul lom.11
Oraclah sie Kuhpahsr Fokoko
Sahp kom esam lah Mwet Lahngo el kapsruh elos suc lohng ac oruh masap Lal nuh sin mwet lahlmwetmwet lah el “muhsaheack lohm sel fin sie yot.” El ahkuhtweyac lah:
“Ac af kahklac, ac sronot tuhkuh, ac eng uh uk, ac srihngihl fin lohm sac; ac tiac na ikori, tuh muhsahiyuckyak fin yot uh.”12
Lohm se tiac kuhtanglah sie pahkah ke srihpen fokoko. Tiac tu na kuh ke srihpen yot se an fac ngacn fokoko. Lohm se ngacn tu na kuh ke pacl pahkah se ngacn ke srihpen el sruokyac na in kuh yot se el an fac an. Kuhiyacn kuhpahsr se luhn lohm se ngacn nuh ke yot se ngacn pa yohk srihpac uh.
Oacpacna ke kuht srihke kuht in kapwack fokokoi uh, yohk srihpac kuht in oraclah sulaclah wo. Yohk srihpac pac kuht in kahlwem ke mwe luti pwacye luhn Leum. Tuhsruhk kuh se kuht e enenuh in kuhtanglah pahkah ke moul se inge uh el tuhkuh ke kuht kuhpahsri sulaclah lasr nuh sel Jisus Kraist ac mwe luti lal. Pa inge ma Mwe Ahkkweye Mwet Fuhsr kahsre kuht in oruh.
Sahp kawuhk lom etuh lah kom srihke in tiac orekmakihn kahskahs koluk kuh kahs ahkngal. Sahp elos liye ke kom lohacng nuh sin tuhlihk se e ke lutlut ah ma mwet uh tiac lohacng nuh se kuh finne in rek kwekwei. Tuh elos etuh lah kom oruh ma inge ke srihpen Jisus Kraist el luti lah “mwet nuhkwewa tamuhlwel ac tahmtahel wiyom—weacng pac … mwet ma siena liki kom”?13
Sahp kawuhk lom ingacn etuh lah kom som wi alu ke sacnri nuhkwewa. Sahp elos akihlen ke kom konwelah on soko kuh ke kom tiac eis suliyuhk se kom in kuh in liye sie petsac. Tuhsruhk yac elos etuh lah kom sulaclah in oruh ma inge ke srihpen “kuhpahsr engan lom nuh sel Pahpah luhng ac Jisus Kraist,” ac ke ipin olwelah lom nuh sel in ukwe Mwet Lahngo, kom kulohkihn “in eis Nguhn Muhtahl in pa kawuhk lom ke pacl nuhkwewa”?14
Mwet uh kuh in etuh lah kom tiac nihmnihm kuh sismohk kuh orekmakihn kuhtwena ono ma e kuh in usot ongaiyac nuh sum. Tuhsruhk elos etuh lah kom oruh ma inge ke sripen Jisus Kraist el luti lah “monum muhtahl,” “ac el mwe sang se sin Pahpah luhng me,” ma oreklac ke luhmahl?15
Kawuhk lom kuh in etuh lah kom e tiac pihsrapasr kuh kikiacp ac kom tiac sritacluh lutlut uh. Tuhsruhk yac elos etuh lah ma ke sripen Jisus Kraist el luti lah “ma pwacye uh e oruh kom in sukohsohklah”?16
Yohkiyac uh na, kawuhk lom an etuh lah kom oruh sulaclah ma kuhtuh pacl e tiac pwengpweng in tu na kuh ac ukwe luhngse lal Kraist ke sripen kom etuh lah “Jisus kraist pa usot kuh nuh sum uh”?17
El pa kuh lom.
Nga usot nuh sum loh fokoko luhk lah Jisus Kraist pa Inkacnek nuhke kahlwem ac wolacna lom nuhke pacl fahsruh uh. Ac el oacyacpac Inkacnek nuhke kahlwem ac wolacna lom ke pacl inge. Fahsr ke inkacnek lal, ac El ac fah wi kom fahsr. Kom kuh in oruh ma inge!
Kawuhk fuhsr sacohk luhk, Jisus Kraist pa kuh lom. Weluhl na fahsr, ac el ac fah kahsre kom in sohksohk “ke mwe sohksohk oacna ke ikihl ngi”18 nuhke engan ma pahtpaht suc el ahkolah nuh sum.
© 2024 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke Englishg: 6/19. Ahkkweyeyucklac ke lweng: 6/19. Lweng nuh ke Monthly For the Strength of Youth Message, Mahs 2024. Kosraean. 19356 868