“Ya Nonofo ya Banana: Molaetsa wa Mmoloki mo go Wena,” Ya Nonofo ya Banana, Mopitlo 2024.

Molaetsa wa Ya Nonofo ya Banana wa Kgwedi le kgwedi, Mopitlo 2024

Ya Nonofo ya Banana: Molaetsa wa Mmoloki mo go Wena

Ka Mogolwane Dieter F. Uchtdorf

Wa Khoramo ya Baaposetolo ba ba Lesome le bobedi

Kaelo ena e thusa go golaganya ditlhopho tsa gago go Jeso Keresete le thuto ya Gagwe.

Akanya gore o tshela mo Galalea wa bogologolo, dingwaga tse di 2,000 tse di fetileng. Wena le ditsala tsa gago lo laleditswe kobamelo ya banana mo sinagogeng ya mogae, e e nang le sebui se se kgethegileng: Jeso wa Nasaretha. Mme ka nako e e rileng mo molaetseng wa Gagwe, Jeso o laletsa banana mo bareetsing gore ba Mo botse dipotso.

Ke dipotso tsa mefuta efe tseo o akanyang gore o ka di utlwa?

Ke akanya gore dipotso dingwe di tla bontsha setso le maemo a nako eo. Mme ke dumela ka boammaaruri gore bontsi jwa tsone bo tla utlwala thata jaaka dipotso tse re nang le tsone gompieno.

Sekai, mo Kgolaganong e Ntšha, batho ba ne ba botsa Mmoloki dipotso tse di tshwanang le tsena:

Ke tlhoka go dira eng go bona botshelo jo bosakhutleng?¹
A Ke a amogelwa? A Ke nna teng?²
Fa mokaulengwe wa me a nteofela, ke tshwanetse go mo itshwarela makgetlho a le kae?³
Go tla diragalang ka lefatshe le mo isagong? A ke tla bolokesega?⁴
A o ka fodisa ba ke ba ratang?⁵
Boammaaruri ke eng?⁶
Ke tla itse jang gore ke tsamaya mo tseleng e e siameng?⁷

A rotlhe ga re ipotse selo sone seo nako le nako? Mo makgolong a dingwaga, dipotso ga di a fetoga mo go kalo. Mme le fa e le bopelotlhomogi jwa Mmoloki mo go bao ba ba di botsang. O itse ka fa botshelo bo ka tshwenyang le kafa bo tlhakanyang tlhogo ka teng. O itse gore go motlhofo jang go latlhegelwa ke tsela ya rona. O itse gore ka dinako dingwe re tshwenyega ka isago. Mme o a re mo go nna le wena, fela jaaka a ne a boleletse balatedi ba Gagwe bogologolo:

“A pelo tsa lona di se fuduege.”⁸
“Ke Nna tsela [le] boammaaruri”⁹
“Ntshaleng Morago.”¹⁰

Fa o na le ditlhopho tse di botlhokwa tse o tshwanetseng go di dira, Jeso Keresete le efangele ya Gagwe e e tsosolositsweng ke tlhopho e e molemo. Fa o na le dipotso, Jeso Keresete le efangele ya Gagwe e e tsosolositsweng ke karabo e e molemo.

Se ke sone Ke ratang Ya Nonofo ya Banana: Kaelo ya go Dira Ditlhopho. E re supetsa kwa go Jeso Keresete gore re ka amogela thata ya Gagwe. Ke baya moriti wa yone mo kgwatlheng ya me ka nako tsotlhe. Fa ke kopana le batho mo lefatsheng lotlhe ba ba batlang go itse gore ke eng re, jaaka maloko a Kereke ya ga Jeso Keresete, re dira se re se dirang, Ke abelana le bone kaelo e.

Ya Nonofo ya Banana e ruta boammaaruri jwa bosakhutleng ka Mmoloki le tsela ya Gagwe. E go laletsa go dira ditlhopho go ikaegile mo boammaaruring joo. Mme e abelana ditshegofatso tse di solofeditsweng tse a di neelang bao ba ba Mo salang morago. Tsweetswee, bala, atlhaatlhanya, mme o abelane kaelo e!

Mo Laletse gore A tsene

Jeso Keresete o batla go nna karolo ya botshelo jwa gago—ka dinako tsotlhe, letsatsi le letsatsi, mo metlheng e e monate le e e botlhoko. Ga ema fela kwa bofelong jwa tsela, a go emetse go Mo tshwara mo tseleng. O tla tsamaya le wena kgato nngwe le nngwe ya tsela. Ene ke Tsela!

Fela ga a kake a pateletsa tsela ya Gagwe mo botshelong jwa gago. O A molaletsa, ka ditlhopho tsa gago. Ke sone se kaelo ya go dira ditlhopho, jaaka Ya Nonofo ya Banana, e leng botlhokwa jaana. Nako nngwe le nngwe e o dirang tlhopho e e siameng e e ikaegileng mo boammaaruring jwa bosakhutleng jwa Mmoloki, o supa gore o Mo batla mo botshelong jwa gago. Ditlhopho tseo di bula dikgoro tsa legodimo, mme nonofo ya Gagwe e tshologela mo botshelong jwa gago.¹¹

Dira Kgolagano e e Tiileng

O ka gakologelwa gore Mmoloki o ne a tshwantshanya bao ba ba mo utlwang le go dira mafoko a Gagwe le monna yo o botlhale, yo o neng “a aga ntlo ya gagwe mo lefikeng.” O ne a tlhalosa:

“Mme pula ya fologa, le merwalela ya tla, le diphefo tsa foka, mme tsa itaya ntlong eo; mme ya seka ya wa, gonne e ne e thaetswe mo lefikeng.”¹²

Ntlo ga e falole mo letsubutsubung gonne ntlo e tiile. Le gone ga e falolele fela ka gore lefika le tiile. Ntlo e falola matsubutsubu gonne e e kgomaretse thata mo lefikeng leo le le tiileng. Ke nonofo ya go golagana le lefika le le botlhokwa.

Fela jalo, fa re ntse re aga matshelo a rona, go botlhokwa go dira ditlhopho tse di molemo. Mme go botlhokwa go tlhaloganya boammaaruri jwa bosakhutleng jwa Mmoloki. Fela nonofo e re tla e tlhokang go fenya matsubutsubu a botshelo e tla fa re golaganya ditlhopho tsa rona le Jeso Keresete le thuto ya Gagwe. Ke seo Ya Nonofo ya Banana e re thusang go se dira.

Sekai, ditsala tsa gago di ka tswa di itse gore o leka go sa dirise puo e e kgopisang kgotsa e e utlwisang botlhoko. Ba ka go bona o fitlhelela ngwana yoo sekolong yo batho ba bantsi ba mo tlhokomologang fela kgotsa le go mo kgerisa. Mme a ba itse gore o dira ditlhopho tse gonne Jeso Keresete o rutile gore “batho botlhe ke bakaulengwe le bokgaitsadio ba gago—go akaretsa … batho ba ba farologaneng le wena”?¹³

Ditsala tsa gago di ka itse gore o ya kerekeng Sontaga sengwe le sengwe. Ba ka lemoga fa o o tima pina nngwe kgotsa o gana taletso ya go lebelela filimi nngwe. A mme ba itse gore o dira ditlhopho tse gonne o na le kamano e e “itumedisang ya kgolagano le Rara wa Legodimo le Jeso Keresete,” le gore e le karolo ya maikemisetso a go sala Mmoloki morago, o itumelela “go nna le Mowa o o boitshepo e le mopati wa gago wa nako tsotlhe”?¹⁴

Batho ba ka tswa ba itse gore ga o nwe nnotagi kgotsa go goga motsoko kgotsa go dirisa diritibatsi tse dingwe tse di diphatsa. Mme a ba itse gore o dira ditlhopho tse ka ntlha ya gore Jeso Keresete o rutile gore “mmele wa gago o boitshepo,” “mpho e e gakgamatsang go tswa mo go Rara wa Legodimo,” e e dirilweng mo setshwanong sa Gagwe?¹⁵

Ditsala tsa gago di ka tswa di itse gore ga o kake wa tsietsa kgotsa go aka le gore o tsaya thuto ka tlhwaafalo. Mme a ba itse gore sena ke ka gore Jeso Keresete o rutile gore “boammaaruri bo tla go golola”?¹⁶

Mo go tsotlhe, a ditsala tsa gago di itse gore ka dinako tse dingwe o dira ditlhopho tse di sa rategeng go nna boammaaruri mo mekgeleng ya ga Keresete gonne o itse gore “Jeso Keresete ke nonofo ya gago”?¹⁷

Ke Nonofo ya Gago

Ke lo neela bopaki jwa me jwa nnete gore Jeso Keresete ke Tsela go isa kwa isagong e e phatsimang le e e galalelang—isago ya gago. Mme le Ene ke Tsela go isa kwa mphong e e phatsimang le e e galalelang. Tsamaya mo tseleng ya Gagwe mme o tla tsamaya le wena. O ka dira se!

Ditsala tsa me tse di rategang, Jeso Keresete ke nonofo ya lona. Tswelela o tsamaya le Ene, mme O tla go thusa go tlhatloga “ka diphuka jaaka bontsu”¹⁸ go ya kwa boitumelong jwa bosakhutleng jo A go bo baakanyeditseng.

© 2024 ka Intellectual Reserve, Inc. All rights reserved. Printed in USA. Tetla ya Sekgoa: 6/19. Tetla ya thanolo: 6/19. Thanolo ya Molaetsa wa Ya Nonofo ya Banana wa Kgwedi le kgwedi, Mopitlwe 2024. Tswana. 19356 763