“Panamati ken ni Cristo Sakbay ti Yaayna Manen,” Para iti Pigsa dagiti Agtutubo, Abr. 2024.
Binulan a Mensahe iti Para iti Pigsa dagiti Agtutubo , Abril 2024
Panamati ken ni Cristo Sakbay ti Yaayna Manen
Adda pammati dagiti Nephite sakbay ti yaay ti Mangisalakan, ket mabalintayo ti maaddaan iti pammati sakbay ti yaayna manen.
Napanunotyo kadin no ania ti kayat a sawen ti mamati iti Mangisalakan sakbay nga immay Isuna ditoy daga? Kasta ti inaramid dagiti nagkauna a Nephite ti—“agsagana para iti Mesias, ken mamatida kenkuana nga umay a kasla dimtengen” (Jarom 1:11).
Itatta, addaantayo kadagiti nasantuan a kasuratan ken rekord ti pakasaritaan a mangpaneknek a nagbiag, natay, ken nagungar ni Jesucristo. Mamatitayo iti maysa a Mangisalakan nga immayen. Ngem mamatitayo met iti Mangisalakan nga umayto manen.
Sakbay ti Iyaay ni Jesucristo, Addaan dagiti Nephite iti Pammati Tapno:
Mapakawan kadagiti basolda.
“Siasino man a mamati nga umayto ni Cristo, isunto ti umawat iti pannakapakawan iti basolda, ket agrag-onto iti napalalo, a kasla ketdin immayen kadakuada” (Mosiah 3:13; nainayon ti panangyunay-unay).
Pakawanenda ti bagbagida.
“Ket adda timek nga immay kaniak, a kinunana: Enos, napakawanen dagiti basolmo. … Gapuna, napukaw ti manidsidir a basolko. Ket kinunak: Kasano ti pannakaaramidna, Apo? Ket kinunana kaniak; Gapu iti pammatim ken ni Cristo, a dimo pay nangngegan ken nakita. Ket adu a tawen ti naglabas sakbay nga imparangarangna ti bagina iti lasag; … ta inaramidna a naan-anay ti pammatim” (Enos 1:5–8; nainayon ti panangyunay-unay).
Mangaramid kadagiti milagro.
“Ammomi ni Cristo, ken adda namnamami iti dayagna ginasut a tawen sakbay ti yaayna. … Kasta met a pudno a makapagbilinkami iti nagan ni Jesus ket tungpalendakami amin dagiti kayo, wenno dagiti bantay, wenno dagiti dalluyon iti baybay” (Jacob 4:4, 6; nainayon ti panangyunay-unay).
Umawat iti paltiing.
“Ket adu ti aglaplapusanan ti pigsa ti pammatida, uray pay idi sakbay a dumteng ni Cristo, a saan a nailinged iti belo, ngem pudno a nakitada kadagiti matada” (Ether 12:19; nainayon ti panangyunay-unay).
Sakbay ti Iyaay Manen ni Jesucristo, Maaddaantayo iti Pammati Tapno:
Mapakawantayo, pakawanentayo ti bagbagitayo, mangaramid kadagiti milagro, ken umawat iti paltiing (kas kadagiti Nephite).
Isaganatayo ti bagitayo para iti Yaayna.
Bayat ti panangikagumaantayo a mangtungpal kadagiti katulagantayo, agsagsaganatayo nga agbiag iti celestial a pagarian. “Agsipud ta adtoy, daytoy a biag ti panawen a panagsagana ti tao a sumabat iti Dios; wen, adtoy ti aldaw daytoy a biag ti aldaw nga agpaay kadagiti tao a mangaramid iti trabahoda” (Alma 34:32).
Isagana ti lubong para iti Yaayna.
Inawisnatayo ni Presidente Russell M. Nelson a makipaset iti “kadakkelan nga aramid ditoy daga”—ti panangummong ti Israel. “Inlatang ti Nailangitan nga Amatayo ti adu kadagiti kataknengan nga espirituna—nalabit, makunak, ti kasayaatan a buyotna—para iti daytoy maudi a pasetna. Dagidiay a natakneng nga espiritu—dagidiay a kasayaatan nga agay-ayam, dagidiay a bannuar—ket dakayo!”1
Maaddaan iti namnama kadagiti narigat a panawen.
Inton umay manen ti Mangisalakan, agbiagto a sitatalna dagiti nalinteg. Agturayto ti Mangisalakan, ket mailintegto ti kinaawan hustisia. “Ta addanto ti Apo iti tengngada, ket maipaayto kadakuada ti dayagna, ket isunto ti arida ken mangted kadakuada iti paglintegan” (Doktrina ken Katulagan 45:59).
Agtalek iti Panagungar.
Agungarto ti amin a sangatauan. Maaddaantayto kadagiti perpekto, imortal a bagi. Makitatayto manen dagiti ay-ayatentayo a pimmusay. “Agtiponto manen ti Espiritu ken ti bagi iti naan-anay a langana; maisublinto a padapada dagiti saka ken nagsusuopan iti sigud a pannakasukogna, a kas met laeng iti kasasaadtayo iti daytoy a kanito” (Alma 11:43).
Adda pammati dagiti nagkauna a Nephite iti Mangisalakan sakbay nga immay Isuna. Mabalintayo ti maaddaan iti pammati a ti Mangisalakan umayto manen—inton “makitatayto [Isuna] kadagiti ulep iti langit, a nagkawes iti bileg ken naindaklan a dayag” (Doktrina ken Katulagan 45:44; kitaen met iti Dagiti Aramid 1:11). Kasano a ti pannakaammo nga umayto manen Isuna ket balbaliwanna no ania ti aramidenyo ita?
© 2024 by Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, April 2024. Language. 19353 864