Bosoom bosoom For the Strength of Youth Amandzɛɛbɔ, Dzifuu 2024
NkitahodziA Tum Wɔ Mu
Ahyɛmudzi kyɛn nhyehyɛɛ, ɔyɛ nkitahodzi.
Meda ho wɔ ngua ahaebun no a Elder Pistone na Elder Morasco tsenaa do no ber a wɔkyerɛkyerɛɛ m’ebusua adze wɔ hɛn fie wɔ Argentina no ne mfonyin. Wɔdze sunsum mu tum kyerɛkyerɛe ara ma wɔkɔ n’ekyir no emi (mfe 9) na me mfe 10 akyerɛbaa tu mbirika kosuosuo ngua no mu a, nna hɛn enyidado nye dɛ tum no bi bɛba hɛn hɔ.
Annkyɛr na musũae dɛ tum no mmfi ngua no mu mbom ofi enye Nyankopɔn na Jesus Christ renya ahyɛmudzi nkitahodzi mu ba.
M’Enuma Sũahu
Midzii m’ahyɛmu a odzi kan no wɔ Ɔberɛfɛw 13, 1977. Mennkaa beberee fa m’enuma ho, mbom mekaa Elder Pistone a ɔroboa me ma maakɔ nsu no mu na Elder Morasco a orisi me pi ber a nna me tsinhwi da ho afɔw. Mesan kaa dɛwdzi nkã a metsee ber a ward anyɛnkofo afofor tui fuaa me na wofifew m’afon ho dɛ ma Argentinafo wɔyɛ no na pɛ dzendzen nkã a mtsee dɛ mebɛyɛ Ɔsor Egya ne ba basiaba.
Akyerɛbaa Kumabaa Spannaus (finimfin) nye n’awofo (bankum), n’akyerɛbaa Silvina (nyimfa no ho), na Elder Morasco.
Ekyir no muhun dɛ dɛwdzi a nna metse no fi Sunsum Krɔnkrɔn n’akyɛdze no bae. Musũae dɛ sɛ nokwar mu ara mesie m’ahyɛmu horow a menye Nyankopɔn edzi a, Sunsum no nye me bɛtsena. Sunsum Krɔnkrɔn no yɛ nhyira no kor ara a tum wɔ mu na ofi yɛnye Nyankopɔn na Jesus Christ renya ahyɛmu nkitahodzi mu ba.
Afei, sɛ me nkenyan, adwendwen, na ndzeyɛe mpo tɔ sin a, mowɔ enyidado dɛ monkɔ do mbɔ mbɔdzen. Dɛn ntsi a? Osiandɛ miridzi sacrament no ma me kwan ma meyɛ m’ahyɛmudzi horow no afofor na meyɛ ahyɛmudzi horow afofor dapɛn biara. M’enyi sɔ dɛm nhyira no dodow.
Ahyɛmudzi Nkitahodzi, A Ɔyɛ Ahomka
Yɛtaa tse dɛ ahyɛmudzi horow yɛ anohoba a odzi dwuma afã ebien mu na ɔda hɛn na Nyankopɔn ntamu. Ber a dɛm yɛ nokwar no, nnyɛ ne nyinara nye no. Nokwar ankasa, “eresie ahyɛmudzi nnyɛ dza wɔnnkyɛn aso mma wo mbom ɔyɛ nkitahodzi a ɔyɛ ahomka.’’
Ntsi no isi dɛn nye Ɔsor Egya na Agyenkwa no nya ahyɛmudzi nkitahodzi? Wɔdɔ wo dada emudzi mu ara na wɔpɛ dɛ Wohyira wo (hwɛ 3 Nephi 14:11). Naaso afã ebien nkitahodzi gye mber na ɔdɔ fi afã ebien no hɔ.
Ana epɛ dɛ idzi mber yie wɔ Hɔn nkyɛn a? Sɛ eyɛ ndzɛmba a Wɔyɛ a, nna enye Hɔn nam! Dɛm no botum ayɛ dɛ ɔyɛ mberɛw dɛ eretsie nyɛnko bi wɔ ahokyer mu, enya adagyer nye wo nua ridzi agor, anaa afa obi a ɔayɛ dɛ ankonam nyɛnko. Ɔnnkyɛree, na midzii mber dɛ menye Nyankopɔn nam ber a motwee me ndze mu nsɛm guu efir do na medze text horow kɛmaa me nyɛnko bi a ɔwɔ Argentina a nna ɔayɛ ankonam. Maasan abɔ adwenpɔw dɛ aber nyina me temple recommend nnkɛpa ho ama meetum nye Ewuradze edzi mber wɔ Ne fie krɔnkrɔn. Ibotum abɔ mpaa dze enya adwenhorow a ɔbɔboa wo ma enye Ɔsor Egya na w’Agyenkwa edzi mber.
Ana epɛ dɛ ekyerɛ Hɔn dɛ Hɔnho hia wo a? Suo mbrasɛm no a idzii ho ahyɛmu dɛ ibesie no yie fa kyerɛ wo dɔ, nnyɛ dɛ mbra a wɔakyerɛw ara. Mfatoho, dɛ medze Enyansasɛm no bɔbɔ bra no, musũaa mbrɛ wosi yɛ edziban a ɔma apɔwmudzen. Afei merekyerɛkyerɛ me mbasiamba dɛ wɔbɛyɛ dɛmara. Sɛ ɔpɛ mu ara idzi Nyankopɔn ne mbrasɛm do a, wo dɔ ma Ɔno na Agyenkwa no nyin.
Yɛnye Ɔsor Egya na Jesus Christ ahyɛmudzi nkitahodzi no bɔboa hɛn ma yeehu Hɔn yie na yeenya Hɔn tum ho kwan wɔ hɛn abrabɔ mu—ɔmmbɔadze da koraa kyɛn biribiara a ngua ahaebun wɔ dze ma. Na dɛm tum no sesa hɛn afebɔɔ.
© 2024 by Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly For the Strength of Youth Message, August 2024 ne nkyerɛase. Fante. 19342 502