Binulan a Mensahe ti Para iti Pigsa dagiti Agtutubo , Agosto 2024
Maysa a Nabileg a Relasion
Ti katulagan ket ad-adda pay ngem iti maysa a kontrata; relasion daytoy.
Adda pay laeng ladawanko dagiti berde a tugaw a nagtugawan da Elder Pistone ken Elder Morasco bayat ti panangisuroda iti pamiliak iti pagtaenganmi idiay Argentina. Nangisuroda a napnuan unay iti naespirituan a bileg a ti agtawen iti sangapulo a kabsatko a babai ken siak (agtawen iti 9) ket agtaraykami a mangsagid kadagiti tugaw kalpasan ti ipapanawda, a mangnamnama a maiparikna dayta a bileg kadakami.
Di nagbayag naammuak a saan a naggapu ti bileg kadagiti tugaw no di ketdi naggapu iti naitulag a relasion iti Dios ken ni Jesucristo.
Ti Padasko iti Panagbuniag
Inaramidko ti umuna a katulagak idi Nobiembre 13, 1977. Diak unay malagip maipapan iti panagbuniagko, ngem malagipko ni Elder Pistone a tumultulong kaniak a bumaba iti danum ken ni Elder Morasco a mangkumkumpirma kaniak idinto a nabasa pay laeng ti buokko. Malagipko pay ti rag-o a nariknak bayat ti panangted dagiti baro a gagayyem iti ward kadagiti arakup ken agek kas nakaugalian iti Argentina ken ti napigsa a tarigagay a nariknak nga agbalin a napudno nga anak a babai ti Nailangitan nga Ama.
Ni ubing a Sister Spannaus (tengnga) kadua dagiti dadakkelna (kannigid), ti kabsatna a ni sister Silvina (adayo a kanawan), ken ni Elder Morasco.
Idi agangay naamirisko a ti rag-o a nariknak naggapu iti sagut ti Espiritu Santo. Nasursurok a bayat ti simamatalek a panagtungpalko kadagiti katulagak iti Dios, adda kaniak ti Espiritu. Maysa laeng ti Espiritu Santo kadagiti nabileg a bendision nga aggapu iti natulagan a relasion iti Dios ken ni Jesucristo.
Ita, uray no agkurang dagiti motibok, kapanunotak, ken tignayko, adda namnamak nga agtultuloy a mangpadas. Apay? Gapu ta ti pannakiranud iti sakramento ti mamagbalin a posible kaniak tapno mangpabaro kadagiti katulagak ken mangaramid kadagiti baro a katulagan iti tunggal lawas. Agyamanak unay iti dayta a bendision.
Maysa a Nabara, Natulagan a Relasion
Masansan a mangngegtayo a dagiti katulagan ket dua a wagas a kari iti nagbaetantayo ken ti Dios. Idinto a pudno dayta, saan laeng a daytoy ti maaramidda. Iti kinapudnona, “ti panagtungpal iti katulagan ket saan a nalamiis a pannakipulapol ngem maysa a nabara a relasion.”
Ngarud kasano a mangparnuaykayo iti natulagan a relasion iti Nailangitan nga Ama ken ti Mangisalakan? Naan-anay nga inayatdakayon ken kayatda a bendisionandakayo (kitaen iti 3 Nephi 14:11). Ngem ania man a dua a wagas a relasion ket agkasapulan iti panawen ken ayat manipud iti agsumbangir.
Kayatyo kadi ti mangbubos iti ad-adu pay a panawen a kaduayo Ida? No aramidenyo dagiti banag nga aramidenda, makipagpagnakayo Kadakuada! Mabalin a kasla simple dayta a kas iti panagdengngeg iti gayyem bayat ti narigat a panawen, panangipaay iti panawen a makiay-ayam iti kabsat, wenno panangiraman iti maysa a tao a makarikna a nabaybay-an. Iti nabiit pay, binubosko ti panawen a pannakipagna iti Dios babaen ti panangirekord kadagiti voice messages ken panangipatulod kadagiti teks iti maysa a gayyem iti Argentina a malidlidayan. Inkeddengko pay a kanayon a pagtalinaedek nga aktibo ti rekomendak ti templo tapno makabubosak iti panawen a kaduak ti Apo iti nasantuan a balayna. Mabalinyo nga ikararagan dagiti kapanunotan a makatulongto kadakayo a mangbubos iti panawen a kaduayo ti Nailangitan nga Ama ken ti Mangisalakanyo.
Kayatyo kadi nga ipakita Kadakuada a maseknankayo? Tratuenyo dagiti bilin nga intulagyo a tungpalen kas wagas a pangyebkasanyo ti ayatyo, a saan a maysa a listaan dagiti annuroten. Kas pagarigan, tapno agtungpal iti Word of Wisdom, nasursurok no kasano ti agluto kadagiti makapasalun-at a taraon. Ita isursurok dagiti annakko a babbai nga aramidenda met ti kastoy. No siaayatkayo nga agtungpal kadagiti bilin ti Dios, dumakkel ti panagayatyo Kenkuana ken iti Mangisalakan.
Ti natulagan a relasiontayo iti Nailangitan nga Ama ken ni Jesucristo ti mangtulongto kadatayo a mangammo Kadakuada a nasaysayaat ken maaddaan iti ad-adda a pannakagun-od iti bilegda iti biagtayo—awan patinggana nga ad-adda ngem iti ania man nga asmang nga idiaya dagiti berde a tugaw. Ken balbaliwannatayo dayta a bileg iti agnanayon!
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, August 2024. Ilokano. 19342 864