Mukenji wa ku Ngondu Bua Dikankamika dia Bansonga, Ngondu wa Muanda Mukulu 2024.
Malanda a Bukola Bupita
Tshipungidi ntshipita diumvuangana, tshipungidi tshidi malanda.
Ntshidi ne foto wa nkuasa ya vert ivua Mukulu Pistone ni Mukulu Morasco basomba pavuabu balongesha dîku dianyi patuvua mu Argentina. Bavua balongesha ne bukola bua mu nyuma ne mukulu’anyi wa bakaji wa bidimu 10 ne mema (bidimu 9), tuvua tusumpakana bua kulenga nkuasa pavuabu baya ni ditekemena dia kupeta bukola ebu pa tuetu.
Nankalonga ne bukola ebu kabuvua buluila ku nkuasa nansha kadi ku dîkala mu malanda a tshipungidi ne Yezu Kilisto.
Tshivulukilu tshia Ditambula dianyi.
Nankenza tshipungidi tshianyi tshia kumpala mu dia 13 Ngondu wa Dikumi ne Umua, 1977. Tshiena ne tshivulukilu tshimpa tshia ditambula dianyi, kadi ndi mvuluka diambuluisha dia Mukulu Pistone mu mâyi ne dijadikibua dianyi kudi Mukulu Morasco nansha muvua nsuki yanyi mitalala ne mâyi. Ndi mvuluka kabidi ne nankumvua disanka pavua balunda bapia-bapia ba mu tshikongu bangela mu bitupa mu mushindu wa bena mu Argentina ne dijinga dinena dimvua nandi dia kuikala muana wa bakaji wa lulamatu kudi Tatu wa mu diûlu.
Muanetu wa Bakaji Spannaus mupuekele (munkatshi) ne baledi bende (ku diabakaji), ne yayenda Silvina (ku diabalume) ne Mukulu Morasco.
Pashisha nankamanya ne disanka dimvua mumvua divua difumina ku dipa dia Nyuma wa Tshijila. Nankkalonga ne pandi ndama ditabuija mu tshipungidi tshianyi ne Nzambi, Nyuma neikala nanyi. Nyuma wa Tshijila udi dimua dia ku mabenesha a bukola adi afuma ku malanda a tshipungidi ne Nzambi ne Yezu Kilisto.
Mpindiewu, nansha kenzela kanyi, ne menji anyi bishikila, ndi ntungunuka ne kuteta mu ditekemena. Bua tshinyi? Bualu kuangata kua biakudia bia tshijila kudi kupepeja diakaja ne dienzelula dia tshipungidi lumingu lonsu. Ndi ne tshimanyinu tshinena tshia dibenesha edi.
Tshipungidi tshia Malanda, a Dinanga.
Misangu mivule tutu tumvua ne Bipungidi ebi bidi malaya a nseka ibidi pankatshi petu ne Nzambi. Nansha biobi bilelela, ki mbionsu to. Mu bulelela “kulama tshipungidi ki ntshimanyanganyi mu dienza bisalu to, kadi malanda a dinanga.”
Mushindu kâyi uwutu wenza tshipungidi tshia malanda a dinanga ne Tatu wa mu diûlu ne Mupandishi? Badi diambedi bakunanga mu bujalama ne bajinga kukubenesha (tangila 3 Nepfi 14:11). Kadi malanda onsu a nseka ibidi adi alomba diba ne dinanga nseka yonsu ibidi.
Udi musua kuikala nabu misangu yonsu anyi? Pawudi wenza bivuabu mua kuenza, udi wenda nabu. Bidi mua kuikala bipepela anu bu patudi tuteleja mulunda patudi mu lutatu, pa kunaya ne muanetu, nansha kubueja munkatshi muetu ewu udi uditshinka nkaya. Matuku mashala â, mvua muenda ne Nzambi mu dikuata dia mêyi a mikenji ne kutuminangana tukanda ne mulunda mu Argentina uvua uditshinka nkaya. Ndi mupangadika kabidi bua kulama kakanda kanyi ka kubuela naku mu tempelu kikala mu matuku aku bua ngikala mpitshisha dîba ne Nzambi mu nzubu wenda wa tshijila. Udi mua kusambila bua upeta ngenyi ya mushindu kayi uwudi mua kupitshisha dîba ne Tatu wa mu diûlu ne Mupandishi weba.
Udi musua kubaleja ne udi mubeyemena anyi? Angata mikenji iwudi mudisuilka bua kunemeka bu mushindu wakubaleja dinanga dieba, kabiyi bu mulongu wa bia kuenza. Tshilejilu, bua kunemeka dîyi dia lungenyi, Nankalonga mua kulamba tshiakudia tshidi tshifila bukola bua mubidi. Mpiendiewu ndi ndongesha bana banyi ba bakaji bua kuikala kuenza momumue. Pawudi ulama mikenji ya Nzambi mu budisuila, dinanga dieba buenda ne bua Mupandishi nedidiunda.
Malanda etu a tshipungidi ne Tatu wa mu diûlu ne Yezu Kilisto neatuambuluisha bua kubamanya bimpa ne kuikala ne mpunga mutambe ku Bukola buabu mu mioyo yetu—bitamba kashidi nkuasa ya vert itudi bua kuelela bantu. Ne bukola ebu budi butushintulula bua kashidi.
© 2024 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, August 2024. Tshiluba. 19342 760