Ennaan eo an N̄an Kōkajoorļo̧k Jodikdik ro Kajjojo Allōn̄, O̧kwōj 2024
Juon Jemjerā Ekajoor
Juon bujen eļapļo̧k jān juon koņ; ej juon jemjerā.
Ej pād wōt ippa pija in jea ko remaroro Elder Pistone im Elder Morasco raar jijet ie ilo aer kar katakin baam̧le eo aō ilo m̧weo im̧ōm ilo Argentina. Raar katakin kōn ekanooj ļap kajoor in jetōb jon̄an leddik eo jeiū 10 iiō dettan im n̄a (9 iiō) kōm nej ettōrļo̧k im jibwe jea ko ālkin aer ilo̧k, kōjatdikdik bwe kajoor eo enaaj itok n̄an kōm.
Ejjab to ikar jeļā bwe kajoor eo ekar jab itok jān jea ko ak jān bōk juon bujen jemjerā ippān Anij im Jisōs Kraist.
Iien Peptaij Eo Aō
Ikar kōm̧m̧ane bujen eo aō kein kajuon ilo Nobōm̧ba 13, 1977 eo. Ijjab keememej eļap kōn peptaij eo aō, bōtaab ij keememej an Elder Pistone jipan̄ eō n̄an lowaan dān eo im Elder Morasco ej kapen eō ke koļan bōra ekar ņok wōt. Ij barāinwōt keememej lan̄lōn̄ eo ikar en̄jake ilo an ro m̧ōtta rekāāl ilo ward eo kar atbakwōj im mejān ma ki n̄a ilo jekjek eo an armej in Argentina im en̄jake juon en̄jake ekajoor n̄an erom juon leddik eo nejin Jemādwōj Ilan̄ etiljek.
Sister Spannaus eo edik (ioļap) ippān ro jinen im jemān (ituanmiin̄), leddik eo jein Silvina (ituambwijmron̄ jabōn), im Elder Morasco.
Tokālik Ikar kile bwe lan̄lōn̄ eo ikar en̄jake ekar itok jān menin letok eo an Jetōb Kwojarjar. Ikar katak bwe ilo aō tiljek n̄an kōjparok bujen ko aō ippān Anij, Jetōb eo enaaj pād ippa. Jetōb Kwojarjar eo ej juon iaan kōjeraam̧m̧an ko rekajoor me ej itok jān juon bujen jemjerā ippān Anij im Jisōs Kraist.
Kiiō, jekdo̧o̧n n̄e ellowetak ko aō, ļōmņak ko, im m̧akūtkūt ko rej lijkab, ewōr ippa kōjatdikdik eo n̄an kajjieon̄ wōt. Etke? Kōnke bōk kwojkwoj eo ej kōm̧m̧an an pidodo n̄an n̄a n̄an kōkāāl bujen ko aō im kōm̧m̧an bujen ko rekāāl kajjojo wiik. Ij kanooj in kam̧m̧oolol kōn kōjeraam̧m̧an jab in.
Juon Bujen Jemjerā, Emāāņān
Emakijkij ad ron̄ bwe bujen ko rej ruo jekjek in kallim̧ur ko ikōtaad im Anij. Ilo an men in m̧ool, ejjab aolepān in. Ilo m̧ool, “kōjparok bujen ejjab juon jerbal in kareel an juon make ak juon jemjerā emāāņān.”
Kōn menin ekōjkan am̧ ejake juon bujen jemjerā ippān Jemādwōj Ilan̄ im Rilo̧mo̧o̧r eo? Em̧ōj kadede aer iakwe eok kōn aolepen Aer im kōņaan kōjeraam̧m̧an eok (lale 3 Nipai 14:11). Bōtaab jabdewōt jemjerā ruo ial kōtaer ebōk iien im iakwe jān er jim̧or.
Kwoj ke kōņaan joļo̧k eļapļok iien Ippāer? N̄e kwoj kōm̧m̧ani men ko Renej kōm̧m̧ani, kwoj etetal Ippāer! Emaron̄ in ļam waan in wōt ron̄jake juon m̧ōttam̧ ilo juon iien epen, kōm̧m̧an iien n̄an ikkure ippān ro jeiūm̧ im jatūm̧, ak kobaiktok juon eo ej en̄jake an make iaan. Raan ko lak, ikar joļo̧k iien etetal ippān Anij ilo aō rekoote juon ennaan iim jilkinļo̧k jet naan ilo talboon n̄an juon m̧ōtta ilo Argentina eo ekar en̄jake an ajimakeke. Iar barāinwōt jokāālet n̄an dāpij wōt an peba in mālim in tampeļ eo aō kāāl bwe in maron̄ joļo̧k iien ippān Irooj ilo m̧weo ekwojarjar Im̧ōn. Kwomaron̄ jar kōn wāween ko renaaj jipan̄ eok joļo̧k iien ippān Jemādwōj Ilan̄ im am̧ Rilo̧mo̧o̧r.
Kwoj kōņaan ke kwaļo̧k n̄an Er kwoj kea? Kautiej kien ko kwar bujen n̄an kōjparoki āinwōt juon wāween n̄an kwaļo̧k am̧ iakwe, im ejjab ilo juon laajrak in kakien ko. N̄an waanjon̄ak, n̄an mour kōn Naan in Māletlet, ikar katak kilen kōmat m̧ōn̄ā ko rōūne. Kiiō ij katakin leddik ro nejū n̄an kōm̧m̧an ejja āinwōt in. Ilo am̧ m̧ōņōņō in kōjparok kien ko an Anij, am̧ iakwe n̄an E im Rilo̧mo̧o̧r eo enaaj eddōk.
Bujen jemjerā ko ad ippān Jemādwōj Ilan̄ im Jisōs Kraist renaaj jipan̄ kōj jeļāļok kake Er im ļapļo̧k ad bōk kajoor eo Aer ilo mour ko ad—ilo ejjeļo̧k jem̧ļo̧kin jān jabdewōt men juon pea in jea maroro ko remaron̄ letok. Im kajoor in ej ukōt n̄an indeeo!
© 2024 jān Intellectual Reserve, Inc. All rights reserved. Būriin ilo USA. Kōmālim ilo kajin In̄lij: 6/19. Kōmālim ukook eo: 6/19. Ukook eo an Monthly For the Strength of Youth Message, August 2024. Marshallese. 19342 874