இளைஞரின் பெலனுக்காக மாதாந்தர செய்தி, ஆகஸ்ட் 2024
ஒரு வல்லமையான உறவு
ஒரு உடன்படிக்கை ஒரு ஒப்பந்தத்தை விட மேலானது; அது ஒரு உறவு.
அர்ஜென்டினாவில் எங்கள் வீட்டில் என் குடும்பத்திற்கு போதித்தபோது மூப்பர் பிஸ்டோனும் மூப்பர் மொராஸ்கோவும் அமர்ந்திருந்த பச்சை நாற்காலிகளின் படம் இன்னும் என்னிடம் உள்ளது. அவர்கள் மிகுந்த ஆவிக்குரிய வல்லமையுடன் கற்பித்தனர், என் 10 வயது சகோதரியும் நானும் (வயது 9) அவர்கள் வெளியேறிய பிறகு நாற்காலிகளைத் தொட ஓடுவோம், அந்த வல்லமை எங்கள் மீதும் ஒட்டிக்கொள்ளும் என்று நம்பினோம்.
வல்லமை நாற்காலிகளிலிருந்து வரவில்லை, ஆனால் தேவனுடனும் இயேசு கிறிஸ்துவுடனும் உடன்படிக்கை உறவைக் கொண்டிருப்பதிலிருந்து வந்தது என்பதை நான் விரைவில் கற்றுக்கொண்டேன்.
என் ஞானஸ்நான அனுபவம்
நவம்பர் 13, 1977 அன்று நான் எனது முதல் உடன்படிக்கையை செய்தேன். என் ஞானஸ்நானத்தைப் பற்றி எனக்கு அதிகம் ஞாபகம் இல்லை, ஆனால் மூப்பர் பிஸ்டோன் எனக்கு தண்ணீருக்குள் உதவி செய்ததும், என் தலைமுடி ஈரமாக இருக்கும்போது மூப்பர் மொராஸ்கோ என்னை திடப்படுத்தியதும் எனக்கு நினைவிருக்கிறது. புதிய தொகுதி நண்பர்கள் அவர்களின் அர்ஜென்டினிய முறையில் கட்டிப்பிடித்து முத்தமிட்டபோது நான் உணர்ந்த மகிழ்ச்சியையும், பரலோக பிதாவின் உண்மையுள்ள குமாரத்தியாக இருக்க நான் உணர்ந்த பலமான வாஞ்சையையும் நான் நினைவுகூர்கிறேன்.
இளம் சகோதரி ஸ்பன்னாஸ் (நடுவில்) தனது பெற்றோர் (இடது), அவரது சகோதரி சில்வினா (வலது), மற்றும் மூப்பர் மொராஸ்கோ உடன்.
நான் உணர்ந்த சந்தோஷம் பரிசுத்த ஆவியின் வரத்திலிருந்து வந்தது என்பதை நான் பின்னர் புரிந்து கொண்டேன். தேவனுடனான என் உடன்படிக்கைகளை நான் உண்மையுடன் கைக்கொள்ளும்போது, ஆவியானவர் என்னோடு இருப்பார் என்பதை நான் கற்றுக்கொண்டேன். தேவனுடனும் இயேசு கிறிஸ்துவுடனும் உடன்படிக்கை உறவிலிருந்து வரும் வல்லமையுள்ள ஆசீர்வாதங்களில் ஒன்று பரிசுத்த ஆவியானவர் ஆவார்.
இப்போது, என் நோக்கங்கள், எண்ணங்கள் மற்றும் செயல்கள் குறைபட்டாலும், தொடர்ந்து முயற்சி செய்வேன் என்ற நம்பிக்கை எனக்கு உள்ளது. ஏன்? ஏனென்றால் ஒவ்வொரு வாரமும் திருவிருந்தில் பங்கேற்பது எனது உடன்படிக்கைகளை புதுப்பிப்பதையும் புதிய உடன்படிக்கைகளை செய்வதையும் எனக்கு சாத்தியமாக்குகிறது. அந்த ஆசீர்வாதத்திற்கு நான் மிகவும் நன்றியுள்ளவளாக இருக்கிறேன்.
ஒரு இதமான, உடன்படிக்கை உறவு
உடன்படிக்கைகள் நமக்கும் தேவனுக்கும் இடையில் இருவழி வாக்குத்தத்தங்கள் என்று நாம் அடிக்கடி கேட்கிறோம். அது உண்மை என்றாலும், அவை அது மட்டுமே இல்லை. உண்மையில்,உடன்படிக்கையைக் கைக்கொள்வது ஒரு வெறுமையானவணிக ஒப்பந்தம் அல்ல, ஆனால் ஒரு இதமான உறவு.”
ஆகவே பரலோக பிதாவுடனும் இரட்சகருடனும் ஒரு உடன்படிக்கை உறவை நீங்கள் எவ்வாறு உருவாக்குவீர்கள்? அவர்கள் ஏற்கனவே உங்களை பரிபூரணமாக நேசிக்கிறார்கள், உங்களை ஆசீர்வதிக்க விரும்புகிறார்கள் (3 நேபி 14:11 பார்க்கவும்). ஆனால் எந்தவொரு இருவழி உறவுக்கும் இரு பக்கங்களிலிருந்தும் நேரமும் அன்பும் தேவை.
அவர்களுடன் அதிக நேரம் செலவிட விரும்புகிறீர்களா? அவர்கள் செய்யும் காரியங்களை நீங்கள் செய்யும்போது, நீங்கள் அவர்களுடன் நடக்கிறீர்கள்! கடினமான நேரத்தில் ஒரு நண்பருக்கு செவிசாய்ப்பது, உடன்பிறப்புடன் விளையாட நேரம் ஒதுக்குவது அல்லது கைவிடப்பட்டதாக உணரும் ஒருவரைச் சேர்த்துக்கொள்வது போன்ற எளிமையானதாக இருக்கலாம். சமீபத்தில், அர்ஜென்டினாவில் தனிமையாக உணர்ந்த ஒரு நண்பருக்கு குரல் செய்திகளை பதிவு செய்வதன் மூலமும், உரைகளை அனுப்புவதன் மூலமும் தேவனுடன் நடந்து நேரத்தை செலவிட்டேன். நான் எப்போதும் என் ஆலய பரிந்துரையை செயலில் வைத்திருக்க முடிவு செய்துள்ளேன், அதனால் நான் கர்த்தருடன் அவரது பரிசுத்த வீட்டில் நேரத்தை செலவிட முடியும். பரலோக பிதாவுடனும் உங்கள் இரட்சகருடனும் நேரத்தை செலவிட உதவும் யோசனைகளுக்காக நீங்கள் ஜெபிக்கலாம்.
நீங்கள் அக்கறை கொண்டுள்ளீர்கள் என்பதை அவர்களுக்குக் காட்ட விரும்புகிறீர்களா? நீங்கள் கைக்கொள்ளும்படி உடன்படிக்கை செய்த கட்டளைகளை உங்கள் அன்பை வெளிப்படுத்துவதற்கான ஒரு வழியாக கருதுங்கள், விதிகளின் பட்டியலாக அல்ல. உதாரணமாக, ஞான வார்த்தையின்படி வாழ, ஆரோக்கியமான உணவை எவ்வாறு சமைப்பது என்பதை நான் கற்றுக்கொண்டேன். இப்போது என் மகள்களுக்கும் அதையே கற்றுக் கொடுக்கிறேன். தேவனின் கட்டளைகளை நீங்கள் விருப்பத்துடன் கைக்கொள்ளும்போது, அவர் மீதும் இரட்சகர் மீதும் உங்கள் அன்பு வளரும்.
பரலோக பிதாவுடனும் இயேசு கிறிஸ்துவுடனும் நமது உடன்படிக்கை உறவுகள் அவர்களை நன்கு அறிந்துகொள்ள உதவும், மேலும் நமது வாழ்வில் அவர்களின் வல்லமையை அதிகமாகப் பெறவும் உதவும்—பச்சை நாற்காலிகள் வழங்கக்கூடிய எதையும் விட எல்லையற்ற அதிகமாய். அந்த வல்லமை நம்மை நிரந்தரமாக மாற்றும்!
© 2024 by Intellectual Reserve, Inc. All rights reserved. அ.ஐ.நாட்டில் அச்சிடப்பட்டது. ஆங்கில அங்கீகாரம்: 6/19. மொழிபெயர்ப்பு அங்கீகாரம்: 6/19. இளைஞரின் பெலனுக்காக மாதாந்தர செய்தி, ஆகஸ்ட் 2024 மொழிபெயர்ப்பு. Tamil. 19342 418