Mesaj Mansyèl Pou Fòs Jèn yo, Septanm 2024

Èske w Pè Repantans?

Jessica Zoey Strong

Revi Legliz yo

Dapre Prezidan Russell M. Nelson, men poukisa ou pa ta dwe pè.

Kisa ou pè? Kawousèl? Klas matematik? Eseye konprann Ezayi?

E osijè repantans? Si panse pou w repanti a fè w anvi kache anba dra ou oswa manje twòp chokola, atik sa a se pou ou.

“Tanpri, pa pè ni ranvwaye repanti,” Prezidan Russell M. Nelson te di. Epi gen bon rezon pou sa. Men kèk bagay ke repantans ye ak sa l pa ye, dapre Prezidan Nelson.

Ilistrasyon Corey Egbert

Repantans se: Pou tout moun.

Repantans se PA: Sèlman pou “move” moun.

“‘Èske tout moun bezwen repanti?’ Repons la se wi.”

“Repantans obligatwa pou chak moun responsab ki vle gen laglwa etènèl. Pa gen okenn eksepsyon. … Repanti se kle pou pwogrese.”

Repantans se: Yon fason pou amelyore chak jou.

Repantans se PA: Yon evènman ra sèlman pou “gwo” peche yo.

“Fè eksperyans pouvwa fòtifyan repantans lan chak jou—nan fè epi vin yon ti jan pi byen chak jou.

“Lè nou chwazi pou nou repanti, nou chwazi pou nou chanje! Nou pèmèt Sovè a transfòme nou vin yon pi bon vèsyon tèt nou. …

“… Senyè a pa atann pèfeksyon nan men nou nan pwen sa a nan pwogresyon etènèl nou an. Men, Li espere n ap vin gradyèlman pi pur.”

Repantans se: Yon fason pou santi lapè ak lajwa.

Repantans PA: La pou fè ou santi ou wont ak laperèz.

“Repantans … se kle pou bonè ak lapè despri. …

“Lè nou chwazi repanti, … nou chwazi grandi espirityèlman epi resevwa lajwa —lajwa redanmsyon an nan [Jezikri].” (Gade tou Alma 36:17–23.)

Repantans se: Yon benediksyon Papa nou ki nan Syèl la ak Sovè a, ki renmen nou.

Repantans se PA: Yon pinisyon.

“Twòp moun konsidere repantans kòm yon pinisyon—yon bagay pou yo evite sof nan sitiyasyon ki pi grav yo. Men, santiman pinisyon sa a anjandre pa Satan. Li eseye bloke nou pou nou pa gade Jezikri, ki kanpe avèk bra L yo ouvri, avèk espwa ak volonte pou L geri, padone, pwòpte, fòtifye, pirifye, ak sanktifye nou.”

Ou se: Eleman Nesesè nan Legliz Senyè a.

Ou PA: Ale twò lwen pou w pa repanti.

“Si petèt ou santi ke w pèdi kite chemen alyans lan twò lwen oswa twò lontan, kite m asire ou ke se pa vre. Gras a Sakrifis Ekspyatwa Jezikri a, avni ou ka klere—menm briyan. Pale avèk paran ou ak evèk oswa prezidan branch ou. … Tanpri, retounen nan lajwa ak sekirite chemen alyans lan. Nou bezwen w avèk nou.”

Aksepte Kado Pafè Bondye a

Konsa, èske w pare pou w mete konfyans ou nan Sovè a pou w simonte krent ou genyen pou repantans lan? Ou pap regrèt sa.

Prezidan Nelson di: “Paske mond lan te bezwen sove, e paske nou menm avèk mwen bezwen sove, [Papa nou ki nan Syèl la] te voye yon Sovè pou nou.

“… An nou aksepte kado pafè ak presye Bondye a. An nou lage fado ak peche nou yo nan pye Sovè a epi fè eksperyans lajwa ki soti nan repantans ak chanjman an.”

© 2024 by Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly For the Strength of Youth Message, September 2024. Haitian. 19047 036

Remak

1. Russell M. Nelson, “Pouvwa Elan Espirityèl la,” Konferans Jenaral Avril 2022 (Lyawona, Me 2022, 98).

2. Russell M. Nelson, “Nou Ka Fè Pi Byen epi Vin Pi Bon,”konferans jeneral Avril 2019 (Ensign oubyen Liahona, Me 2019, 67).

3. Russell M. Nelson, “Pouvwa Elan Espirityèl la” (98).

4. Russell M. Nelson, “Nou Ka Fè pi Byen epi Vin pi Bon” (67–68).

5. Russell M. Nelson, “Nou Ka Fè pi Byen epi Vin pi Bon” (67).

6. Russell M. Nelson, “Nou Ka Fè pi Byen epi Vin pi Bon” (67).

7. Russell M. Nelson, nan “Jou Temwayaj Mondyal: Mwen Ka Fè Tout Bagay atravè Kris la,” broadcasts.ChurchofJesusChrist.org.

8. Russell M. Nelson, Instagram, 24 desanm 2021, instagram.com/russellmnelson.