Bulanan nga Mensahe sa Para sa Kusog sang mga Lamharon, Septyembre 2024

Nahadlok ka Maghinulsol?

Jessica Zoey Strong

Mga Magasin sang Simbahan

Suno kay Pangulong Russell M. Nelson, ari ang mga rason nga indi ka dapat mahadlok.

Ano ang imo ginakahadlukan? Mga tsubibo? Klase sa math? Pag-intiendi sang sinulatan ni Isaias?

Paano ya ang paghinulsol? Kon ang panghunahuna nga maghinulsol nagapakulba sa imo nga gusto mo na lang manago ukon magkaon sang damo-damo nga tsokolate, para gid sa imo ining artikulo.

“Palihog indi pagkahadluki ukon pagpadugayi ang paghinulsol,” siling ni Pangulong Russell M. Nelson. Kag may rason ina. Ari ang pila ka butang nga matuod kag indi matuod, parte sa paghinulsol siling ni Pangulong Nelson.

Mga drowing ni Corey Egbert

Ang paghinulsol: Para sa tanan.

Ang paghinulsol INDI: Para lang sa “malain” nga mga tawo.

“‘Kinahanglan bala sang tanan nga maghinulsol?’ Ang sabat, huo.”

“Ang paghinulsol ginapangayo sa tagsa ka may-salabton nga tawo nga nagahandum sang wala katapusan nga himaya. Wala ini sing pili. … Ang paghinulsol yabi padulong sa progreso.”

Ang paghinulsol: Isa ka paagi nga magprogreso adlaw-adlaw.

Ang paghinulsol INDI: Panalagsa nga hilimuon para lang sa “dalagko” nga mga sala.

“Batyaga ang nagapabakod nga gahum sang adlaw-adlaw nga paghinulsol—sa paghimo kag pagtinguha nga mangin mas maayo sa kada adlaw.

Kon ginapili naton nga maghinulsol, ginapili naton nga magbag-o! Ginatugotan naton ang Manluluwas nga bag-uhon kita sa pinakamaayo nga bersyon sang aton mga kaugalingon. …

“… Ang Ginuo wala nagapaabot nga mangin perpekto kita sa sini nga tion sa aton wala katapusan nga pag-uswag. Pero nagapaabot Sia sa aton nga mangin mas matinlo.”

Ang paghinulsol: Paagi para makabatyag sang kalinong kag kalipay.

Ang paghinulsol WALA: Gintuga para mahuya ka kag makulbaan.

“Ang paghinulsol … amo ang yabi sa kalipay kag kalinong sa hunahuna. …

“Kon pilion naton nga maghinulsol, … ginapili naton nga magtubo sing espirituhanon kag magbaton sang kalipay—ang kalipay sang pagtubos ni [Jesucristo].” (Tan-awa man sa Alma 36:17–23.)

Ang paghinulsol: Bugay sang Amay nga Langitnon kag sang Manluluwas, nga nagapalangga sa aton.

Ang paghinulsol INDI: Isa ka silot.

“Tuman kadamo sang nagakabig sang paghinulsol bilang silot—nga dapat likawan luwas sa pinakaseryoso nga mga sirkumstansya. Pero ini nga balatyagon nga ginasilotan gintuga ni Satanas. Ginatinguhaan niya nga punggan kita sa pagtulok kay Jesucristo, nga nagatindog nga bukas ang mga butkon, nagalaum kag handa mag-ayo, magpatawad, magtinlo, magpabakod, magpaputli, kag magpakabalaan sa aton.”

Ikaw: Kinahanglanon sa Simbahan sang Ginuo.

Ikaw INDI: Sobra ka makasasala para maghinulsol.

“Kon pamatyagan ninyo kalayo na ukon kadugay na sa inyo nga nahilayo sa dalan sang kasugtanan, ginapasalig ko sa inyo nga indi ina matuod. Paagi sa Pagbayad-Sala ni Jesucristo, ang inyo palaabuton mahimo nga mangin masanag—ukon nagasiga. Istoryaha ang imo mga ginikanan kag ang imo bishop ukon branch president. … Palihog, balik na sa kalipay kag kasegurohan sang dalan sang kasugtanan. Kinahanglan namon kamo diri.”

Batuna ang Perpekto nga Regalo sang Dios

Ti, handa ka na bala nga magsalig sa Manluluwas para malampuwasan ang imo kahadlok sa paghinulsol? Indi ka gid magkanugon.

Siling ni Pangulong Nelson: “Tungod kinahanglan sang kalibutan ang maluwas, kag tungod ikaw kag ako kinahanglan nga maluwas, nagpadala ang [Amay nga Langitnon] sang Manluluwas.

“… Batunon naton ang perpekto kag malahalon nga regalo sang Dios. Ibutang naton ang aton mga palas-anon kag sala sa tiilan sang Manluluwas kag batyagon ang kalipay nga nagahalin sa paghinulsol kag pagbag-o.”

© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, September 2024. Hiligaynon. 19343 861

Mga Tanda

1. Russell M. Nelson, “Ang Gahum sang Espirituhanon nga Buylo,” Abr. 2022 nga pangkabilogan nga komperensya (Liahona, Mayo 2022, 98).

2. Russell M. Nelson, “Sarang Kita Maghimo sing Mas Maayo kag Mangin Mas Maayo,” Abr. 2019 nga pangkabilogan nga komperensya (Ensign ukon Liahona, Mayo 2019, 67).

3. Russell M. Nelson, “Ang Gahum sang Espirituhanon nga Buylo” (98).

4. Russell M. Nelson, “Sarang Kita Maghimo sing Mas Maayo kag Mangin Mas Maayo” (67–68).

5. Russell M. Nelson, “Sarang Kita Maghimo sing Mas Maayo kag Mangin Mas Maayo” (67).

6. Russell M. Nelson, “Sarang Kita Maghimo sing Mas Maayo kag Mangin Mas Maayo” (67).

7. Russell M. Nelson, sa “Worldwide Day of Testimony: I Can Do All Things through Christ,” broadcasts.ChurchofJesusChrist.org.

8. Russell M. Nelson, Instagram, Dis. 24, 2021, instagram.com/russellmnelson.