Binulan a Mensahe ti Para iti Pigsa dagiti Agtutubo , Disiembre 2024

Ti Pannakayanak ni Jesus

Ni David A. Edwards

Dagiti Magasin iti Simbaan

Ammuem ti maipapan iti daytoy pamiliar a pasamak iti Krismas ken no kasano a makatulong daytoy kadatayo a mangipamaysa iti Mangisalakan.

Panangiladawan ni Caroline Vibbert

Betlehem

TiBetlehem kaipapananna ti “balay ti tinapay” iti Hebreo. Maawagan dayta no dadduma kas siudad ni David, a manipud iti kapuonanna, naipadto a nagtaudan ti Mesias (kitaen iti Jeremias 23:5; Juan 7:42). Dinutokan ni Samuel ni David kas ari idiay Betlehem (kitaen iti 1 Samuel 16:1–13). Naipadto a mayanak sadiay ti Mesias (kitaen iti Mikias 5:2).

“Anian a maitutop nga isu [ni Jesuscristo], ti ‘tinapay ti biag,’ ket agtaud iti ‘balay ti tinapay.’”

Presidente Russell M. Nelson, “In This Holy Land,” Liahona, Peb. 1991, 13.

Pagdagusan

Ti Griego a sao para iti pagdagusan mabalin a kaipapananna ti aniaman a temporario a pagdagusan, agraman ti siled dagiti sangaili. Ket ni Maria “impaiddana [ti Ubing a Cristo] iti maysa a kulluong; gapu ta awan ti siled para kadakuada iti pagdagusan” (Lucas 2:7). (Kuna ti Patarus ni Joseph Smith “dagiti pagdagusan.”) “Ti kaawan ti siled” kaipapananna a saanda a mapalubosan a mapan wenno awan ti siled a pagyananda a mabalin a pakaipasngayan ti maladaga. Uray kaskasano, napanda iti maysa a lugar nga ayan ti maysa a kulluong.

Kulluong

Ti kulluong ket maysa a nangato a kahon wenno pagurnongan ti taraon dagiti animal. Iti nagkauna a Judea, kaaduanna a naaramid dagitoy iti bato. Dagiti pagdagusan addaanda kadagiti sentral a paraangan nga addaan kadagiti kulluong, ken adu a pagtaengan ti addaan met kadagiti kulluong iti dakkel a kangrunaan a siledda tapno mabalin a maturog sadiay dagiti animal iti agpatnag.

Dagiti Lampin

Rinibu a tawenen nga ar-aramiden dagiti inna ti pananglampin kadagiti kappasngay (panangbungon kadakuada iti ules wenno lampin). Daytoy ti mangpakalma ken mangliwliwa kadakuada kalpasan ti pannakariribukda a pimmanaw iti aanakan. Mabalin nga addaan iti naidumduma a marka ti lupot nga inusar ni Maria a naisangsangayan iti pamilia.

Da Maria ken Jose

Naimbag ken nalintegda a tattao, ken agpadada a kaputotan ni David. Tunggal maysa ket sinarungkaran ti maysa nga anghel kas panagsagana iti pannakayanak ti Mangisalakan (kitaen iti Mateo 1:18–25; Lucas 1:26–38). Nagdaliasatda iti 100–140 km (60–90 milia) nga agturong idiay Betlehem. Masikog idi ni Maria bayat ti panagdaliasatda.

Dagiti agpaspastor

Adda idi dagiti pastor a mangay-aywan kadagiti arbanda iti asideg ti Betlehem. Sigun iti dadduma nga eskolar, dagiti laeng karnero a nairanta a maidaton iti templo ti mapalubosan a mataraken iti asideg ti maysa a siudad. Isu a mabalin nga agay-aywan dagitoy a pastor kadagiti karnero a mangirepresentar iti daton ni Jesucristo maipaay kadatayo (kitaen iti Moises 5:6–7). Pinanawanda dagiti arbanda tapno kitaenda ti Mesias, a ti pannubbot a sakripisiona ikkatenna ti panagidaton kadagiti animal.

Ti Cristo nga Ubing

Ni Jesucristo ti kangrunaan a karakter iti pasamak ti Pannakayanak—ken ti biagtayo.

“Sapay koma ta mangbusboskayto iti tiempo iti daytoy a panawen ti Paskua tapno agtugawkayo iti sumagmamano a naulimek a kanito ken bay-anyo a ti Espiritu ti Mangisalakan ti mangpabara ken mangpatalged kadakayo. … Agtugawkayo a siuulimek a kadua dayta bassit a maladaga ket sumurotkayo a napabileg iti naespirituan. … Bay-an a dayta a kanito a maysa a panaginana ken pannakabang-ar ken pammatalged ken pannakapabaro.

“Ipaay ti Dios kenka dayta a bendision iti daytoy a Krismas bayat a sika, a kaduak, ti mangsaksi iti Mangisalakan a ni Jesucristo—ti kinapategna iti biagtayo, iti amin a biag ti tao, ken iti mismo a panggep ti panagbiag.”

Ni Elder D. Todd Christofferson ti Korum dagiti Sangapulo-ket-dua nga Apostol, “Be at Peace,” Liahona, Dis. 2015, 37.

© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, December 2024. Ilokano. 19346 864

Dagiti Nagadawan

1. Patarus ni Joseph Smith, Lucas 2:7 (iti Lucas 2:7, footnote b).

2. Kitaen iti Andy Mickelson, “An Improbable Inn: Texts and Tradition Surrounding Lucas 2:7,” Studia Antiqua vol. 14, no. 1 (Mayo 2015).

3. Kitaen iti Andy Mickelson, “An Improbable Inn.”

4. Kitaen iti Russell M. Nelson, “The Peace and Joy of Knowing the Savior Lives,” Liahona, Dis. 2011, 19–20.

5. Kitaen iti Alfred Edersheim, The Life and Times of Jesus the Messiah, 8th ed. (1907), 1:186.