Bosome bosome De ma Mmabunu Ahoɔden Nkransɛm, Ɔpɛnima 2024

Yesu Awoɔ

Ɔkasafoɔ yɛ David A. Edwards

Asɔre Nsɛmma nwoma ahoroɔ

Sua fa Buronya tebea a wonim yi ho ne sɛdeɛ ɛboa ma yɛde yɛn ani si Agyenkwa no so.

Nkyerɛkyerɛmu firi Caroline Vibbert hɔ

Betlehem

Betlehem kyerɛ “paanoo fie” wɔ Hebrifoɔ kasa mu. Ɛtɔ mmerɛ bi a wɔfrɛ no Dawid kuro, a wɔhyɛɛ nkɔm sɛ Mesaia no bɛfiri n’abusua mu aba (hwɛ Yeremia 23:5; Yohane 7:42). Samuel sraa Dawid sii no hene wɔ Betlehem (hwɛ 1 Samuel 16:1–13). Wɔhyɛɛ nkɔm sɛ wɔbɛwo Mesaia no wɔ hɔ (hwɛ Mika 5:2).

“Hwɛ sɛdeɛ na ɛfata, sɛ [Yesu Kristo], ‘nkwa paanoo’ no bɛfiri ‘paanoo fie’ aba.”

Titenani Russell M. Nelson, “Wɔ Asase Kronkron Yi So,” Liahona, Ɔgyefuo 1991, 13.

ahɔhodan

Greek asɛmfua a wɔde gyina hɔ ma ahɔhodan no bɛtumi akyerɛ berɛ tiaa mu dabrɛ biara, a ahɔhodan ka ho. Maria “de [Abɔfra Kristo no] too mmoa adididaka mu; ɛfiri sɛ wɔannya kwan wɔ ahɔhodan no mu” (Luka 2:7). (Joseph Smith Nkyerɛaseɛ no ka sɛ “ahɔhodan ahodoɔ.”) “Dan biara nni hɔ” bɛtumi akyerɛ sɛ wɔannye wɔn anaasɛ ebia baabiara a na wɔbɛtumi atena no nni dan a wɔbɛwo abadoma wom. Sɛdeɛ ɛteɛ biara no, wɔkɔɔ baabi a na mmoa adididaka wɔ.

Mmoa adididaka

Mmoa adididaka yɛ adaka anaasɛ akoradeɛ a wɔapagya a wɔde mmoa aduane gu mu. Wɔ tete Yudea no, na wɔtaa de aboɔ na ɛyɛ eyinom. Na ahɔhodan ahodoɔ wowɔ adiwo a mmoa adidinnaka wowɔ mfimfini, ɛna na afie bebree nso wowɔ mmoa adidinnaka wɔ adan akɛseɛ mu sɛdeɛ wɔbɛtumi de mmoa agu hɔ anadwo.

Ntoma a wɔde kyekyere abadoma

Ɛnanom akyekyere mmadoma (de wɔn ahyehyɛ kuntu anaasɛ ntoma mu) mfeɛ pii. Yei ma wɔn ho dwo wɔn na ɛkyekye wɔn werɛ wɔ ahodwiri a ɛba berɛ a wɔfiri awotwaa no mu akyi no. Ebia na ntoma a Maria de kyekyeree no no wɔ ahyɛnsodeɛ bi a ɛyɛ sononko ma abusua no.

Maria ne Yosef

Na wɔyɛ nnipa pa ne ateneneefoɔ, ɛna wɔn baanu nyinaa yɛ Dawid asefoɔ. Na ɔbɔfoɔ akɔsra wɔn mu biara de asiesie no ama Agyenkwa no awoɔ (hwɛ Mateo 1:18–25; Luka 1:26–38). Wɔtuu kwan kilomita 100–140 (akwansin 60–90) kɔɔ Betlehem. Na Maria nyem wɔ akwantuo no mu.

Nnwanhwɛfoɔ

Na nnwanhwɛfoɔ rehwɛ wɔn nnwan wɔ baabi a ɛbɛn Betlehem. Nwomanimfoɔ binom kyerɛ sɛ, nnwan a na wɔde wɔn bɔ afɔreɛ wɔ tɛmpol nko ara na na wɔma kwan ma wɔyɛn wɔn bɛn kuro bi. Enti bɛyɛ sɛ na nnwanhwɛfoɔ yi rehwɛ nnwan a na ɛbɛgyina hɔ ama Yesu Kristo afɔrebɔ ma yɛn (hwɛ Moses 5:6–7). Wɔgyaa wɔn nnwan no hɔ kɔhwɛɛ Mesaia a ne mpata afɔrebɔ bɛyi mmoa afɔrebɔ afiri hɔ no.

Abɔfra Kristo

Yesu Kristo ne ade titire wɔ N’Awoɔ tebea no—ne yɛn abrabɔ mu.

“Mewɔ anidasoɔ sɛ wobɛgye berɛ wɔ Buronya berɛ yi mu atena hɔ komm kakra na woama Agyenkwa no Honhom no akanyan wo na ama wo awerɛhyem. Wo ne abadoma ketewa no ntena hɔ komm na nya honhon mu ahoɔden. Ma saa berɛ no nyɛ ahomegyeɛ ne ahoɔden ne awerɛhyem ne foforɔyɛ berɛ.

“Onyankopɔn mma wo saa nhyira no wɔ Buronya yi mu berɛ a wo ne me di Agyenkwa Yesu Kristo ho adanseɛ—hia a Ne ho hia wɔ yɛn abrabɔ mu, wɔ nnipa abrabɔ nyinaa mu, ne asetena tirimpɔ ankasa mu.”

Elder D. Todd Christofferson a ɔka Asomafoɔ Dummienu Kuo no ho, “Be at Peace,” Liahona, Ɔpɛnimma 2015, 37.

© 2024 by Intellectual Reserve, Inc. Wɔakora hokwan ahodoɔ nyinaa so. Wɔtintimm wɔ USA Borɔfo Kasa ho kwan-ma: 6/19. Nkyerɛaseɛ ho kwan-ma: 6/19. Nkyeraseɛ ma Bosome bosome De ma Mmabunu Ahoɔden Nkrasɛm, Ɔpɛnimma 2024. Twi. 19346 503

Atwerɛ.

1. Joseph Smith Nkyerɛaseɛ, Luka 2:7 (wɔ Luka 2:7, aseɛ atwerɛ b).

2. Hwɛ Andy Mickelson, “Ahɔhodan a Ɛrentumi Nyɛ Yie: Ntwerɛeɛ ne Amammerɛ a Ɛfa ho Luka 2:7,” Studia Antiqua ɔfa 14, nɔma 1 (Kɔtɔnimma 2015).

3. Hwɛ Andy Mickelson, “Ahɔhodan a Ɛrentumi Nyɛ Yie.”

4. Hwɛ Russell M. Nelson, “The Peace and Joy of Knowing the Savior Lives,” Liahona, Ɔpɛnimma 2011, 19–20.

5. Hwɛ Alfred Edersheim, The Life and Times of Jesus the Messiah, 8th ed. (1907), 1:186.