The Atonement:
Our Greatest Hope
James E. Faust
Ang atong kaluwasan nag-agad sa pagtuo ug sa pagdawat sa Pag-ula. Ang mao nga pagdawat nagkinahanglan og usa ka nagpadayon nga paninguha sa pagsabut niini sa mas hingpit nga paagi.
Akong minahal nga mga kaigsoonan ug mga kahigalaan, ako mapainubsanong mianhi niini nga pulpito niining buntaga tungod kay ako nagtinguha sa pagpamulong mahitungod sa labing dako nga hitabo sa tanang kasaysayan. Kanang walay makalabaw nga hitabo mao ang dili ikatandi nga Pag-ula sa atong Ginoo ug Manluluwas, si Jesukristo. Kini mao ang labing mahimayaong talagsaon nga buhat nga sukad nahitabo, apan kini ang labing malisud nga sabton. Ang akong rason nga gustong makakat-on kutob sa akong mahimo mahitungod sa Pag-ula sa laing bahin hinakog: Ang atong kaluwasan nag-agad sa pagtuo ug sa pagdawat sa Pag-ula.1 Ang mao nga pagdawat nagkinahanglan og usa ka nagpadayon nga paninguha sa pagsabut niini sa mas hingpit nga paagi. Ang Pag-ula nagpauswag sa atong mortal nga katuyoan sa pagkat-on pinaagi sa paghimo niini nga posible alang sa atong mga kinaiyahan nga mahimong hingpit.2 Tanan kita nakasala ug nagkinahanglan sa paghinulsol aron sa hingpit makabayad sa atong bahin sa utang. Kon kita matinud-anong maghinulsol, ang halangdong Pag-ula sa Manluluwas nagbayad sa nahibilin niana nga utang.3
Mihatag si Pablo og usa ka yano nga pagpasabut alang sa panginahanglan sa Pag-ula: “Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi.”4 Si Jesukristo gitudlo ug giorden nang daan nga mahimong atong Manunubos sa wala pa ang kalibutan maporma. Tungod sa Iyang balaan nga pagkaanak, sa Iyang walay sala nga kinabuhi, sa pagpaagas sa Iyang dugo didto sa Tanaman sa Getsemane, sa Iyang hilabihang kasakit nga kamatayon didto sa krus ug ang nagsunod nga Pagkabanhaw sa Iyang lawas gikan sa lubnganan, nahimo Siya nga dalan sa atong kaluwasan ug mihimo ug usa ka hingpit nga Pag-ula alang sa tanan nga mga katawhan.5
Ang pagsabut unsay atong mahimo sa Pag-ula ug sa Pagkabanhaw nagtabang kanato nga makaangkon og kahibalo kabahin Kaniya ug sa Iyang misyon.6 Bisan unsay pagtubo sa atong pagsabut kabahin sa Iyang maulaong sakripisyo nagdala kanato nga mas maduol ngadto Kaniya. Sa tinuod, ang Pag-ula nagpasabut nga mahimong “usa” uban Kaniya. Ang kinaiya sa Pag-ula ug ang mga epekto niini hilabihan ka mahangturon, hilabihan ka dili makab-ut sa abilidad sa tawo sa pagsabut, ug hilabihan ka lawom nga kini lapas sa kahibalo ug pagsabut sa mortal nga tawo. Mapasalamaton ako kaayo alang sa baruganan sa makaluwas nga grasya. Daghang mga tawo ang naghunahuna nga gikinahanglan lamang kanila ang pag-angkon nga si Jesus mao ang Kristo ug dayon sila maluwas pinaagi sa grasya lamang. Kita dili maluwas pinaagi sa grasya lamang,“kay kami nasayud nga pinaagi sa grasya kami maluwas, human sa tanan nga atong mabuhat.”7
Pila ka tuig ang milabay, si Presidente Gordon B. Hinckley miingon “usa ka butang ingon og sambingay” mahitungod sa “usa ka eskwelahan nga usay lawak didto sa mga kabukiran sa Virginia diin ang batang mga lalaki hilabihan ka maldito nga walay magtutudlo nga nakahimo sa pagdumala kanila.
“Dayon usa ka adlaw usa ka walay kasinatian nga batan-ong magtutudlo mi-apply. Gisultihan siya nga ang matag magtutudlo nakadawat og makalisang nga pagbunal, apan ang magtutudlo midawat sa risgo. Sa unang adlaw sa klase ang magtutudlo mihangyo sa batang mga lalaki sa paghimo sa ilang kaugalingon nga mga lagda ug ang silot alang sa pagsupak sa mga balaod. Ang klase nakahimo og 10 ka mga lagda, nga gisulat diha sa pisara. Dayon ang magtutudlo nangutana, ‘Unsay atong buhaton sa usa nga mosupak sa mga lagda?’
“‘Bunalan siya sa buko-buko og napulo ka mga higayon nga walay gisul-ob nga jacket,’ miabut ang tubag.
“Usa ka adlaw o maingon niana ka gidugayon, … ang paniudto sa usa ka dako nga estudyante, ginganlan og Tom, gikawat. ‘Ang kawatan nakit-an—usa ka gutom nga gamay nga bata, mga dyes anyos ang panuigon.’
“Samtang miduol si Little Jim sa pagdawat sa iyang bunal, mihangyo siya nga dili hubuon ang iyang jacket. ‘Huboa ang imong jacket,’ miingon ang magtutudlo. ‘Mitabang ka sa paghimo sa mga lagda!’
“Ang batang lalaki mihubo sa iyang jacket. Siya walay gisul-ob nga kamisin ug nakita ang bukogon og gamay nga piang nga lawas. Samtang ang magtutudlo miukon-ukon dala ang dako nga bunal, si Big Tom daling mibarug ug miboluntaryo sa pagdawat sa bunal sa batang lalaki.
“‘Maayo kaayo, adunay usa ka piho nga balaod nga usa ka tawo makahimo sa pagpuli alang sa lain. Kamo bang tanan mouyon?’ ang magtutudlo nangutana.
“Human sa lima ka bunal sa buko-buko ni Tom, nabali ang bunal. Ang klase nagdanguyngoy. ‘Si Little Jim mikinto ug migakos ni Tom uban sa duha ka bukton nga giliyok sa iyang liog. “Tom, pasayloa ko nga akong gikawat ang imong paniudto, apan ako hilabihan sa kagutom. Tom, higugmaon ko ikaw hangtud ako mamatay tungod sa pagpabunal alang kanako! Oo, ako mohigugma kanimo hangtud sa kahangturan!”’”8
Dayon si Presidente Hinckley mikutlo ni Isaias:
“Sa pagkamatuod gipas-an niya ang atong kasakitan, ug gipas-an niya ang atong mga kasub-anan. …
“… Siya ginasamaran tungod sa atong kalapasan, siya napangos tungod sa atong mga kasal-anan: ang silot sa atong pakigdait diha sa ibabaw niya; ug tungod sa iyang mga labod kita nangaayo.”9
Walay tawo nga nakahibalo unsa gyud kasakit ang gipas-an sa atong Manluluwas apan pinaagi sa gahum sa Espiritu Santo kita makahibalo og usa ka butang kabahin sa balaang gasa nga Iyang gihatag kanato.10 Sa mga pulong sa atong himno sa sakramento:
Giantus Niya ang tumang kasakit, “sa dili matukib nga paghingutas,” ug “makabuntog nga pagdagmal”12 alang kanato. Ang iyang mahinuklugon nga pag-antus didto sa Tanaman sa Getsemane, diin Siya midala diha sa Iyang Kaugalingon sa tanang mga sala sa tanang uban nga mga mortal, nakahimo kaniya sa “pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu.”13 “Ug ingon nga anaa sa pag-antus mas kinasingkasing siya nga nag-ampo,”14 nga nag-ingon, “Amahan ko, kon ugaling dili man mahimo nga ikasaylo kini gawas kon akong imnon, nan, maoy matuman ang imong kabubut-on.”15 Siya giluiban ni Judas Iscariote ug wala angkuna ni Pedro. Gibiaybiay Siya sa halangdong mga pari [sacerdote nga punoan] ug sa mga anciano; Siya gihuboan, gibunalan, gilud-an, ug gipurongpurongan og sampinit diha sa balay hukmanan.16
Gidala Siya ngadto sa Golgota, diin gilansang ang Iyang mga kamot ug mga tiil. Nagbitay Siya sa kasakit sulod sa mga oras diha sa kahoy nga krus nga nagdala sa ulohan nga gisulat ni Pilato: “SI JESUS NGA TAGA-NAZARET ANG HARI SA MGA JUDEO.”17 Ang kangitngit miabut, ug “sa may ikatulo na ang takna sa hapon si Jesus mituwaw sa makusog nga tingog, nag-ingon, Eli, Eli, lama sabactani? nga sa ato pa, Dios ko, Dios ko, nganong gitalikdan mo ako?”18 Walay makatabang Kaniya; Siya nagtunob sa intusan sa bino nga nag-inusara.19 Dayon si “Jesus miusab pagtuwaw sa makusog nga tingog ug unya mitugyan sa iyang espiritu.”20 Ug “usa sa mga sundalo midughang og bangkaw sa iyang kilid, ug gilayon dihay miagay nga dugo ug tubig.”21 “Ang yuta mikurog” ug “sa diha nga ang kapitan, ug ang iyang mga kauban, nga nagbantay kang Jesus, nakakita sa linog, ug sa mga butang nga nagkahitabo, sila nangahadlok pag-ayo, ug miingon, Sa pagkatinuod kini Siya Anak sa Dios.”22 Diha sa mga pulong sa himno,“Ginoo, di ko kalimtan, Nimo gipakamatyan, Kasingkasing mo nabugto, Didtos krus sa Kalbaryo.”23 Ako naghunahuna kon pila kaha ka mga tulo sa dugo ang gipaagas alang kanako.
Unsa ang Iyang gibuhat mahimo lamang mabuhat sa Dios. Isip ang Bugtong Anak sa Amahan diha sa unod, napanunod ni Jesus ang balaanong mga hiyas. Siya ang bugtong tawo nga natawo sukad dinhi sa mortalidad kinsa makahimo niining labing importante ug balaang buhat. Isip ang bugtong Tawo nga walay sala kinsa sukad mipuyo dinhi sa yuta, dili Siya ubos sa espiritwal nga kamatayon. Tungod sa Iyang pagkadios, Siya usab adunay gahum labaw sa pisikal nga kamatayon. Busa Siya mihimo alang kanato unsa ang dili mahimo kanato alang sa atong mga kaugalingon. Gibuntog Niya ang pisikal nga kamatayon. Gihimo usab Niyang posible alang kanato nga makabaton sa labing taas ug malinawong kahupayan nga gasa sa Espiritu Santo.24
Ang Pag-ula ug ang Pagkabanhaw naghimo og daghang mga butang. Ang Pag-ula naglimpyo kanato sa sala nga nag-agad sa atong paghinulsol. Ang Paghinulsol mao ang kahimtang nga ang kalooy gilugway.25 Human sa tanan natong mahimo sa pagbayad sa katapusang sintabo ug sa pagtarung sa atong mga sayop, ang grasya sa Manluluwas maanaa sa atong mga kinabuhi pinaagi sa Pag-ula, nga nagputli kanato ug makahimo kanatong hingpit.26 Ang Pagkabanhaw ni Kristo mibuntog sa kamatayon ug mihatag kanato og kasigurohan sa kinabuhi human sa kamatayon. Siya miingon: “Ako mao ang pagkabanhaw, ug ang kinabuhi: ang mosalig kanako, bisan siya mamatay, mabuhi siya.”27 Ang Pagkabanhaw walay kondisyon ug kalabut ngadto sa tanan kinsa sukad mipuyo ug magpadayon sa pagpuyo.28 Kini usa ka walay bayad nga gasa. Gihulagway kini og maayo ni Presidente John Taylor sa dihang siya miingon: “Ang mga lubnganan maabli ug ang mga patay makadungog sa tingog sa Anak sa Dios, ug sila moduol, sila kinsa naghimo og maayo hangtud sa pagkabanhaw sa matarung, ug sila kinsa naghimo og dautan hangtud sa pagkabanhaw sa dili matarung.”29
Kalabut sa atong mortal nga mga lihok ug sa Pag-ula, mihatag si Presidente J. Reuben Clark Jr. niining bililhon nga panan-aw sa dihang siya miingon:
“Ako mibati nga [ang Manluluwas] mohatag niana nga silot nga mao ang labing minos nga gikinahangan sa balaod alang sa atong kalapasan. Nagtuo ako nga iyang dad-on diha sa iyang kaangayan ang tanan nga walay kinutuban ang gugma ug panalangin ug kalooy ug kamabination ug pagsabut nga siya aduna. …
“Ug sa laing bahin, nagtuo ako nga kon kini moabut sa paghimo og mga ganti alang sa atong maayong binuhatan, siya mohatag kanato sa labing dako nga posibleng ikahatag, naghunahuna sa kasaypanan nga atong nabuhat.”30
Ingon sa gisulat ni Isaias, kon kita mobalik ngadto sa Ginoo, “siya mopasaylo sa madagayaon gayud.”31
Kita gisugo sa paghinumdom sa makahuluganon nga mga hitabo sa pagpataliwala, Paglansang diha sa Krus, ug sa Pag-ula pinaagi sa pag-ambit sa sakramento matag semana. Dinasig sa mga pag-ampo sa sakramento, kita nag-ambit sa pan ug tubig agi og handumanan sa lawas ug sa dugo nga gisakripisyo alang kanato, ug kita gikinahanglan nga mohinumdom Kaniya ug maghupot sa iyang mga sugo nga kita unta kanunay nga makabaton sa Iyang Espiritu uban kanato.
Ang atong Manunubos midala diha sa Iyang Kaugalingon sa tanang mga sala, mga kasakit, mga kahuyang, ug mga sakit sa tanan kinsa sukad mipuyo ug magpadayon sa pagpuyo.32 Walay usa sukad nga nag-antus susama sa unsay Iyang nahimo. Nahibalo Siya sa atong mortal nga mga pagsulay pinaagi sa personal nga kasinatian. Kini sama og gamay kanato nga naninguha sa pagsaka sa Bukid sa Everest ug nakasaka lamang sa unang pipila ka mga pye. Apan nasaka Niya ang tibuok 29,000 ka pye ngadto sa tumoy sa bukid. Siya miantus labaw kay sa bisan unsay mahimo sa usa ka tawo.
Ang Pag-ula wala lamang maghatag og kaayohan sa makasasala apan naghatag usab og kaayohan niadtong nakasala batok––sa ato pa, sa mga biktima. Pinaagi sa pagpasaylo “niadtong kinsa naglapas batok kanato” (JST, Mat. 6:13) ang Pag-ula nagdala og igo nga kalinaw ug kahupay ngadto niadto kinsa inosente nga nabiktima pinaagi sa mga sala sa uban. Ang sukaranang tinubdan nga mamaayo ang kalag mao ang Pag-ula ni Jesukristo. Kini tinuod ma-gikan man sa sakit sa usa ka personal nga trahedya o sa makalilisang nga kalamidad sa tibuok nasud sama sa kita nagsinati sa pagka-karon sa New York ug sa Washington D.C., ug duol sa Pittsburgh.
Usa ka sister kinsa nakasinati og usa ka masakit nga diborsyo misulat sa iyang kasinatian sa pagkuha og kalig-on gikan sa Pag-ula. Miingon siya: “Ang among diborsyo … wala mobuhi kanako gikan sa obligasyon sa pagpasaylo. Sa tinuod gusto ako nga mopasaylo, apan kini ingon og ako gimandoan sa pagbuhat og usa ka butang nga ako sa yano dili makahimo.” Ang iyang bishop mihatag kaniya og pipila ka maayong tambag: “Pagbutang og lugar diha sa imong kasingkasing alang sa pagpasaylo, ug kon kini moabut, andam sa pagpasaylo.” Daghang mga bulan ang milabay samtang kining pakigbisog sa pagpasaylo mipadayon. Gihinumduman niya: “Atol niadtong dugay, mainampuong mga higayon … ako mikuha ngadto sa usa ka naghatag og kinabuhi nga tinubdan sa kahupayan gikan sa akong mahigugmaong Langitnong Amahan. Akong gibati nga siya wala magbarug nga nadismaya kanako sa wala pa makatuman sa pagpasaylo; hinoon siya nagmagul-anon uban kanako samtang ako mihilak. …
“Human sa tanang paghunahuna, unsa ang nahitabo sa akong kasingkasing alang kanako usa ka makatingala ug milagroso nga ebidensya sa Pag-ula ni Kristo. Kanunay akong nagtan-aw sa Pag-ula isip usa ka paagi sa paghimo sa paghinulsol nga epektibo alang sa makasasala. Wala ako makaamgo nga kini usab naghimo niini nga posible alang sa usa nga nasad-an sa pagdawat ngadto sa iyang kasingkasing sa matam-is nga kalinaw sa pagpasaylo.”33
Ang nasakitan kinahanglan mobuhat unsa ang ilang mahimo sa pag-atubang sa ilang mga pagsulay, ug ang Manluluwas “motabang sa iyang mga katawhan sumala sa ilang mga kahuyang.”34 Siya motabang kanato sa pagpas-an sa atong mga alantuson. Ang ubang mga samad sakit kaayo ug lawom nga kini dili maayo kon wala ang tabang gikan sa mas taas nga gahum ug paglaum alang sa usa ka hingpit nga hustisya ug pagpahiuli sa sunod nga kinabuhi. Kay ang Manluluwas nag-antus sa bisan unsa ug sa tanan nga ato gayud nga mabatyagan o masinati,35 makatabang Siya sa huyang nga mahimong mas malig-on. Nasinati Niya sa personal ang tanan niini. Siya nakasabut sa atong kasakit ug molakaw uban kanato bisan pa sa atong labing mangitngit nga mga takna.
“Nagtinguha kita alang sa katapusan nga panalangin sa Pag-ula—nga mamahimong usa uban Kaniya, nga maanaa sa Iyang balaan nga presensya, aron sa tagsa-tagsa tawagon ang ngalan samtang Siya mainitong moabiabi kanato sa panimalay uban sa malipayon nga pahiyum, mangamay kanato uban sa bukas nga mga bukton aron pagagakson sa Iyang walay kinutuban nga gugma.36 Unsa ka mahimayaong makapabayaw nga kasinatian kini nga mahimo kon mobati kita nga igo ka takus nga maanaa sa Iyang presensya! Ang walay bayad nga gasa sa Iyang gamhanan nga maulaong sakripisyo alang sa matag usa kanato mao lamang ang paagi nga kita mahimaya igo nga makabarug sa Iyang atubangan ug makakita Kaniya nawong sa nawong. Ang madaugon nga mensahe sa Pag-ula mao ang hingpit nga gugma sa Manluluwas alang sa matag usa ug kanatong tanan. Gugma kini nga puno sa kalooy, pailub, grasya, kaangayan, mainantuson, ug, labaw sa tanan, pagpasaylo.
Ang dautang impluwensya ni Satanas moguba sa bisan unsang paglaum nga kita aduna sa pagbuntog sa atong mga sayop. Siya gustong mopabati kanato nga kita nahisalaag ug wala nay paglaum. Agi og kalainan, si Jesus mokab-ut kanato aron sa pagbayaw kanato. Pinaagi sa atong paghinulsol ug sa gasa sa Pag-ula, makapangandam kita nga mamahimong takus sa pagbarug diha sa Iyang presensya. Mopamatuod ako diha sa ngalan ni Jesukristo, amen.