O Le Avea ma Se Itutino, o Lo Tatou Tofi Paia Lea
Bonnie D. Parkin
Peresitene Aoao o le Aualofa
Ou te molimau atu ua tatau ai mo outou, o outou o se itutino o le Aualofa---o le lafu a le Leoleo Mamoe Lelei mo tamaitai.
Uso e, ua ou olioli ua tatou mafuta faatasi i lenei po. Faafetai i le anoanoai o a outou galuega agaalofa, o a outou molimau tuputupu pea, o a outou sapalai e le uma o kuka manogi mo e moomia! Ua outou faia se eseesega ma o le lasusulu mo le agaga!
I nei taimi faigata, ou te maua le mafanafana i le folafolaga e faapea “afai ua [tatou] saunia o le a [tatou] le matata’u ai lava.”1 E fesoasoani le Aualofa e saunia i tatou---e le mo na o le faaletino, ae ma le faaleagaga foi. Ae e le mafai ona fesoasoani le Aualofa ia tatou sauniuniga e aunoa ma lo tatou auai i le faatinoina! Ou te popole nei manatu nisi o outou faapea e le fetaui outou mo le Aualofa, e le o outou o ni itutino [o le Aualofa]! Pe tou te manatu ua outou laiti tele pe ua matutua tele, ua mauoa tele pe matitiva tele, popoto tele pe maualalo tele le tulaga o aoaoga, e leai lava se tasi o i tatou ua ese naua e le mafai ai ona avea ma se itutino [o le Aualofa]! Afai e mafai ona ou tau atu le faananauga sili o lo’u loto, ou te manao ia tofu lagona e outou uma taitoatasi ua matua tatau ai lava mo outou, ma o outou foi o ni itutino [o le Aualofa]. Ou te molimau atu ua fetaui lelei mo outou, o outou o se itutino o le Aualofa---o le lafu a le Leoleo Mamoe Lelei mo tamaitai.
Ou te faamamafa atu faatasi ma Peresitene Iosefa F. Samita ina ua ia saunoa i le 1907, “O nei aso ua matua toatele naua tamaitai talavou, malolosi, ma atamamai ua latou lagona e faapea e na o loomatutua e tatau ona mafuta ma le Aualofa.” Ona ia tautino mai lea, “O se mea sese lenei mea.”2
Sa ou asiasi talu ai nei i Itiopia, ma sa ma feiloai ai ma Jennifer Smith. Afai e i ai se tamaitai e mafai ona faapea mai e le fetaui mo ia, o Sister Smith. Fai mai a ia: “Sa le pei a’u o isi [uso] uma i le matou paranesi. O a matou gagana, lavalava, aganuu, sa foliga uma mai e i ai [se] avanoa [i lo matou va. Peitai] ina ua matou talanoa e uiga i le Faaola … sa faaitiitia le va. Ina ua matou talanoa e uiga i se Tama Faalelagi alofa … sa leai se va.” Sa faaauau lana tala, “E le mafai ona tatou suia pe aveesea avega a isi, ae e mafai ona tatou faaaofia ma avea ma itutino o le tasi ma le isi i le alofa.”3
Sa maua e nei uso se fasi vaega o Siona i le tasi o latou loto ma o latou manatu.”4 Aua “afai e lē tasi outou,” ua fetalai mai ai le Alii, e lē a a’u outou.”5 Na saunoa Peresitene Hinckley e faapea afai o le a tatou lotogatasi ma tautatala atu ma le leo e tasi, o le a le mafaatusalia lo [tatou] malosi.”6 I le avea ai ma ni uso i Siona, e faapefea ona avea i tatou ma e tasi? O le ala lava e tasi tatou te avea ai ma se itutino o se to’alua po o se aiga: tatou te fefaasoaai o tatou faasinomaga--o o tatou lagona, o tatou mafaufauga, o o tatou loto.
I se tasi uarota, e faafeiloai atu e tina a latou tama teine i le Aualofa i se sauniga i le Aso Sa pe a atoa lo latou ta’i 18. Na faaalia e se tasi tina ma le agaga momomo le ala na faafaileleina ai e uso o le Aualofa o ia mai le amataga o lana faaipoipoga: “Sa latou aumaia taumafa ma ni opo i taimi o le faanoanoa, talie, ma le lagolago mo aso faamanatu. Sa latou aoaoina a’u i le talalelei e ala i le asiasi mai ia te au ma faataga a’u matou te asiasi faatasi. Sa latou faatagaina a’u e faia ni sasi i o latou taimi.” Ona faamalamalama mai lea e lea tina i lana tama teine le ala na oo mai ai fugalaau o teisi i le latou togalaau mai ia Karoline, o lili mai ia Venice, o laau samasama mai ia Pauline. Sa ofo lana tama teine. Sa tali atu lona tina, “O nei tamaitai, o o’u uso i itu uma, ma ou te matua faafetai e aumaia oe i la latou vaavaaiga.”
O le eseese o fugalaau i se togalaau e saofaga i lona matagofie---tatou te manaomia ni teisi ma lili ma laau samasama; tatou te manaomia ni faitogalaau e fuiina, faafailele, ma tausia. Ae paga lea, e iloa e Satani o le fefaasoaai e soofaatasi ai le usoga faatamaitai i aso uma e oo i le faavavau. Na te iloaina o le manatu faapito o le a amata ai ona faataumaoia le fefaasoaai, lea e faataumaoia ai le lotogatasi, lea e faataumaoia ai Siona. Uso e, e le mafai ona tatou faatagaina le fili e vaevaeina i tatou. Tou te silafia, “O se tasi e atoatoa, “na saunoa ai Poliika Iaga, “o le a laveaiina ai se nuu.”7 Ma ou te faaopoopo atu e faapea o se tasi e atoatoa, o le a laveaiina ai lo tatou sosaiete.
Na faamanatu mai ia i tatou e Peresitene Boyd K. Packer e faapea “ua toatele naua tuafafine ua manatu o le Aualofa ua na o se vasega e o i ai. … Tuafafine,” na ia fautua mai ai, “e tatau ona outou o ese mai mafaufauga faapea e na ona e alu i le Aualofa, i le lagona faapea o oe o se itutino o le Aualofa!”8 O lo tatou lagona o le avea ai ma se itutino, e amata i le Aso Sa pe a tatou faalogo i leo o le tasi ma le isi. E le tatau i se faiaoga ona tuu atu lana lesona i se vaega o uso e gugū, aua o le lesona o la tatou lesona.
O le avea o se itutino o le manaomia lea, alofagia, ma misia pe a e le i ai; o le avea o se itutino o le manaomia, alofagia ma le misia o i latou ua le i ai. O le eseesega lena o le auai ma le avea o se itutino. O le Aualofa ua le na o se vasega i le Aso Sa; o se meaalofa faalelagi ia i tatou o tamaitai.
O mafuaaga nei e lua ou te lagona ai o au o se itutino o le Aualofa---ma e le ua na ona o lo’u valaauga i le taimi nei! Sa ou lotovaivai lava i le masina ua te’a ina ua o mai o’u faiaoga asiasi. O Sue ua tatala lana faaipoipoga, a o Keiti o se tasi o a’u Lora sa i ai. Sa la aumaia le savali ma se tatalo. Ae sa la aumaia foi le popolega moni lava. Sa ou lagonaina le siitia o a’u ma le alofaina.
Sa faia e se tasi o o’u uso i le Aualofa se tatalo e lei leva atu ma sa ole atu ai i le Tama Faalelagi e faamanuia a’u---sa ta’u lou igoa---i o’u tiutetauave. Na te lei iloaina mea patino sa ou manaomia, ae sa ia iloa lo’u loto.
O le taimi nei, atonu e lei o mai talu ai nei ou faiaoga asiasi, pe atonu foi e lei faia se tatalo mo oe e ta’u ai lou igoa. Ou te faamalie atu pe afai o le tulaga lena. Ae e le tau asia oe ia aoao ai e avea o se faiaoga asiasi lelei, e le tau tatalo foi mo oe ia e tatalo. E ui i o tatou eseesega, afai o le a tatou fefaasoaai ma le lotofoai ma le faamaoni, o le a faasoa mai foi o tatou uso; o le a tatou iloaina le loto o le tasi ma le isi, ma o lo tatou avea ai ma itutino, o le a fuga mai e pei o se togalaau. Sa aoaoina e Sister Smith ma o tatou uso i Itiopia e faapea o eseesega e le afaina, aua o le avea ai ma se itutino, o le alofa mama lea, le alofa mama a’ia’i o Keriso, i le faatinoga. Ma e le uma le alofa.
Pe o tatou galulue i le Peraimeri po o Tamaitai Talavou, pe o tatou toaaga mai pe leai, pe ua tatou faaipoipo pe nofofua, pe o tatou o ni tamaimoa o le tautotogo po o ni matuamoa o le tautoulu, o i tatou uma lava o ni itutino o le Aualofa. O a’u o se matuamoa o le tautoulu, ae ou te lagona pei au o se tamaimoa o le tautotogo! Matou te manaomia o outou siufofoga, o outou lagona, o outou loto. E manaomia outou e le Aualofa. Ma e te iloa oe? Ete manaomia le Aualofa. A e le auai ai i le faatinoina, ua e faaogea oe lava ma ua e faaogea foi le Aualofa.
Uso e, e le mafai ona tatou faia ni fevaevaeaiga i le Aualofa; e ao i “tagata uma ona tutusa le fetausiai o le tasi ma le isi.”9 “Ma pe afai e tiga le itutino e tasi, ia tiga faatasi ai itutino uma lava; po o le faamamaluina foi o le tasi itutino, ia olioli faatasi ma itutino uma lava.”10 Aua “e manaomia e le tino ia itutino taitasi uma ina ia mafai ona faagaeetia uma faatasi, ina ia mafai ona tausi i le atoatoa.”11
Ioe, e mafai ona sili atu le manaia o le Aualofa, sili atu ona olioli ai, sili atu ona lotogatasi. E mafai ona faamamaina a tatou avega, ma faaitiitia a tatou avega. E le atoatoa le Aualofa, aua e leai lava se tasi o i tatou e atoatoa. Ae e mafai ona tatou galulue i ai; e mafai ona tatou faaatoatoaina faatasi pe a tatou faia a tatou lava la’a agai i luma. E faapefea? E ala i le na ona suia o o tatou uiga faaalia: O le ala tatou te talanoa ai e uiga i le Aualofa e aafia ai lagona o isi e uiga i le Aualofa---aemaise lava o tamaitai talavou.
Ia lagolago i o tatou au peresitene ma faiaoga o Aualofa---tuu atu ia i latou e aoao i o tatou taimi (faapei foi ona tatou aoao i o latou). Ia tele atu le lotofaamagalo ae itiiti le faamasinosino. Ia avea o se faiaoga asiasi e lotoalofa, ma faia e le aunoa. Ia auai ma le naunautai i sauniga faatamaoaiga o le fale, aiga, ma faaletagata lava ia. Vaavaai mo mea lelei e uiga i le Aualofa ma atiina ae ai.
Na tuuina mai e Peresitene Iosefa F. Samita se poloaiga e faapea ia “tatou taofi mau i lenei galuega [o le Aualofa] ma le malosi, ma le atamai ma le lotogatasi, mo le fausiaina o Siona.”12 Afai tatou te talitonu ua toefuataiina mai le Ekalesia a le Alii---ma o lo tatou talitonuga lea--ona tatau lea ona tatou talitonu o le Aualofa o se vaega e tatau ai o Lana lafu faalefaalapotopotoga. Ua tatau ona tuu lo tatou fesili pe fetaui mo i tatou---aua e fetaui! E le faapea ua tele naua o tatou eseesega ua le mafai ai ona tatou fausia faatasi Siona.
Toeitiiti atoa se tausaga talu ai, i Pasadena, Kalefonia, sa ma’i tigaina ai Sister Janice Burgoyne i le kanesa. Sa ia faasoa atu ma le agalelei o ia lava ma sa alofagia lava o ia. Sa avatu e ona uso o le Aualofa taumafataga, faamama lona fale, tausi ma vaai lana fanau tama laiti e toalua, fesoasoani i lana tane i le fuafuaina o se falelauasiga. Sa faigata ia Janice ona taliaina lena fesoasoani tele, i lona iloa ai o le a maua e ona uso se fasi falaoa faapa’u magumagu i tua o le nofoa. Sa popole o ia ina ne’i tele atu ni mea e iloa e ona uso nai lo lona loto. Peitai ona sa iloa e ona uso lona loto, sa lei afaina lea. Sa latou faaaogaina a latou taavale mo feoa’iga, fesoasoani i meaa’oga i le fale, tatā lana piano, sui lona moega. Ma sa latou faia i lea aso ma lea aso ma lea aso, e aunoa ma se tomumu, ae faatasi ai ma le alofa mama e le faatuaoia. O lena fefaasoaai na suia ai e faavavau na uso. A o lei maliu o ia, sa liliu atu Janice i se uso o le Aualofa ma fesili atu ma le lotofaafetai ma le maofa, “E faapefea ona oti se tasi e aunoa ma le Aualofa?”
Ia te outou, o’u uso pele--ma o outou o o’u uso—ou te fesili atu, “E faapefea ona ola se tasi e aunoa ma le Aualofa?”
O le avea ma se itutino, o lo tatou tofi paia lea. Maimau e pe ana mafai ona ou afisi outou i o’u lima ma tatou o faatasi i le Aualofa. Maimau e pe ana mafai ona ou iloa o outou loto ma outou iloa foi lo’u loto. Aumai o outou loto, o outou loto alolofa moni, i le Aualofa. Aumai a outou taleni, a outou meaalofa, o outou tagata taitoatasi ina ia mafai ai ona tasi i tatou.
Ou te molimau atu e faapea “o loo valaau mai le leoleo mamoe lelei ia i [tatou] … [e] aumai i [tatou] i lana lafu.”13 Atonu e le o ia i tatou ia tali uma, ae e tatau ona tatou talitonu o le Aualofa o se vaega e tatau ai o Lana galuega, aua
E ui atonu e taamilomilo lo [tatou] ala i mauga,
Na te silafia le vaomu’a [tatou] te aai ai. …
Na te ufitia lautalotalo o le vao,
Na te fagaina tamai mamoe [o] Lana lafu,
Ma o le a Ia faamaloloina i latou o e talitonu ia te Ia,
Ma faia o [tatou] loto e pei o le auro.14
I le suafa, o Iesu Keriso, amene.