Ikotakiia Kaain Iteraera Aika a Uamaenako

Russell M. Nelson

Man te Kooram n Abotoro n te Tengaun ma Uoman

Ti ibuobuoki n ikotiia ake e rineiia te Uea n iteran te rabuna aika uoua.

Tariu ao mwaneu aika kam tangiraki, kam rabwa ibukin ami onimaki, nanomi ae korakora, ao ami tangira. Ti tibwaua te tibwanga ae korakora n riki bwa aomata aika a tangira te Uea ao ni karaoa te bwai ae E tangiria bwa ti na karaoia. Ngaira bon mwakoron te mwaingiing ae korakora—ikoikotakin Iteraera ae uamaenako. I taetae iaon te reirei aei n te bong aei ibukin kakawakina ae onoti n ana babaire te Atua ae akea tokina.

Ana Berita ae Tabu Aberaam

N taai ake ngkoa, te Uea e kakabwaia te Karo ae Aberaam ma te berita bwa e na karikiia ana kariki bwa aomata aika rineaki.¹ Rongorongon nako te berita aei e kuneaki rinanon booki aika tabu. Inanona bon berita bwa Natin te Atua e na roko rinanon ana kariki Aberaam, ao aaba tabeua ana kaainaki, ao ana kakabwaiaaki botanaomata ma baronga n te aonaaba rinanon kanoaia, ao a mwaiti riki.² Ngkai tabeua mwakoron te berita ae tabu anne a tia ni koro bukiia, e reireiniira Ana Boki Moomon bwa te berita ae tabu aei nakon Aberaam e na ti korobukina ni boong aika kaitira!³ E katuruturuaki naba bwa ngaira ni kabane bon ana aomata ni berita te Uea aika tabu.⁴ Tabera bwa ti na iri ni kakoroi nanon berita aikai. Ai kamimiira te tai ni maiu aei!

E Uamaenako Iteraera

Ngkai ana kariki Aberaam, aia baronga kaain Iteraera ake ngkoa a kona ni karekea te kariaia n te nakoanibonga ao kakabwaia n te euangkerio, ma n tokina aomata a kaaitara. A tiringiia burabeti ao a katuaeaki iroun te Uea. A uotaki baronga ake tengaun nako Aturia bwa buure. Mai ikanne are a bua iai nakon aia rekooti aomata. (E mataata, bwa baronga ake tengaun aki bua iroun te Uea.) Nikiraia baronga aika uoua a tiku n reitinako n te tai ae uarereke ao ngkanne, ibukin aia kakaitara, a uotaki bwa buure nako Bwaburon.⁵ Ngke a oki, a tangiraki riki iroun te Uea, ma a manga aki Karinea naba. Aki butimwaia ao a Kabuakakaa. Te karo ae tatangira ma e nanokawaki e motikia, “N na kamaenakoko nako buakoia botanaomata,”⁶ ao anne ae E karaoia—nakon aaba ni kabane.

Iteraera e na Ikoikotaki

Ana berita te Atua n ikotakiia Iteraera aika maenako e bon kabwarabwaraaki n ae mataata.⁷ Itaia, ibukin te katooto, e a kaman noora anne ni boong aika kaitira are e na kanakoia te Uea “taan uarongorongo aika a waekoa” nakon te botanaomata ae “e maenako ao n uruaki.”⁸

Te berita aei ibukin te ikoikotaki, a kuneaki inanon booki aika tabu, a na kakoroaki bukiia n aron are e kakoroaki nanon taetae ni burabeti ibukin kamaenakoaia Iteraera.⁹

Ana Ekaretia Iesu Kristo i Nukan te Tai ao Kitanan te Koaua

Imwain Taurakina, te Uea Iesu Kristo e a tia ni katea Ana Ekaretia. Iai inanona abotoro, burabeti, itingaun, taan reirei, ao a mwaiti rikii.¹⁰ Ao te Tia Reirei e kanakoia Ana reirei nakon te aonaaba bwa ana tataekina Ana euangkerio.¹¹

Imwiin te tai te Ekaretia are e kateaki iroun te Uea e bwaka inanon mamaran te maiu n tamnei. Ana reirei a bitaki; Ana otenanti a bitaki. Kitanan te Koaua ae korakora e riki n aron are e a kaman taekinaki iroun Bauro, are e ataia bwa e na aki oki moa te Uea “ma ti ngkana e tuai roko te kekerikaki arei.”¹²

Kitanan te koaua ae korakora aei e ira te baeten are e kaota tokin mwioko n tararua ake mai imwaina. Te moan bon n ana tai Atam. Imwiina te mwioko n tararua n ana tai Enoka, Noa, Aberaam, Mote, ao tabeman riki. Iai tabeia mai ieta burabeti n tatabemaniia nako n reirei kakannaton ao reirein ana ekaretia te Uea Iesu Kristo. Inanon ririki nako a nanonaki reirei aikai bwa ana buokiia aomata. Ma aia aki ongeaba e a karika kitanan te koaua. Ngaia are, mwioko n tararua ake imwaina a tianaki n te tai ao n te tabo. A tianaki n te tai ibukina bwa a bane n toki imwiin kitanan te koaua. A tianaki n aia tabo ni kaineti ma uarereken mwakoron te aonaaba.

Kaokan Bwaai ni Kabane

Ngaia ae e kainnanoaki kaokan bwai n ae tabwanin. Te Atua te Tama ao Iesu Kristo a wetea te Burabeti Iotebwa Timiti bwa e na riki bwa te burabeti inanon te mwioko n tararua ngkai. Mwaaka mai ieta ni kabane ake man mwioko n tararua ake mai imwaina a na manga kaokaki rinanona.¹³ Te mwioko n tararua ni kororaoin bongina e na aki tianaki n te tai ke n te tabo. E na aki toki man reken kitanan te koaua, ao e na kaonrakea te aonaaba.¹⁴

Ikotakin Iteraera—Mwakoron Kaokan Bwaai ni Kabane aika Kakawaki

N aron are e taetae ni burabetiaki iroun Betero ao Bauro, ana bane bwaai ni kaokaki inanon te mwioko n tararua aei. Ma ngaia are, e na riai n roko, bwa mwakoron kaokan bwai, te ikotaki are e a kaman kariariaaki ibukiia Iteraera aika maenako.¹⁵ Bon te bwai ae riai ni karaoaki imwain Kauaokin te Uea.¹⁶

Te reirei n te ikoikotaki bon teuana te reirei ae kakawaki n Ana Ekaretia Iesu Kristo Ibukiia Aika Itiaki ni Boong aika Kaitira. E a tia te Uea ni katanoata: “I angani ngkami te kanikina … are N na ikotia iai, man maenakoia n te tai ae maan, au botanaomata, O te bata are Iteraera, ao N na katea ibuakoia au Tion.”¹⁷ Rokon Ana Boki Moomon bon te kanikina nakon te aonaaba are e a tia te Uea ni wakina ikoikotakia kaain Iteraera ao ni kakoroi nanon berita aika tabu ake E karaoi nakon Aberaam, Itaaka, ao Iakobwa.¹⁸ Ti aki ti reirei te reirei aei, ma iai tibwangara inanona. Ti karaoia ngkai ti buoka ikotiia ake e rineiia te Uea ikai iaon te aba ao n te aonaaba n tamnei.

Ana Boki Moomon e kakawaki n te mwakuri aei. E katanoata te reirei iaon te ikoikoti.¹⁹ E karikiia aomata bwa ana reirei taekan Iesu Kristo, ni kakoaua Ana euangkerio, ao ni kaaina Ana Ekaretia. N koauana, ngke arona bwa akea Ana Boki Moomon, te berita n ikoikotakiia Iteraera e na bon aki koro bukina.²⁰

Nakoira karinean aran Aberaam e bon kakawaki. E taekinaki inanon kiibu aika mwaiti riki ni booki aika tabu ni Kaokan Bwaai nakon kibun te Baibara ni kabane.²¹ E reitaki Aberaam nakoia kaain Ana Ekaretia Iesu Kristo Ibukiia Aika Itiaki ni Boong aika Kaitira.²² E a tia te Uea ni manga kamatoa ana berita ae tabu nakon Aberaam n ara bong rinanon te Burabeti Iotebwa Timiti.²³ Inanon te tembora ti karekei ara kabanea ni kakabwaia, ngkai ngaira ana kariki Aberaam, Itaaka, ao Iakobwa.²⁴

Te Mwioko n Tararua ni Kororaoin Bongina

Te mwioko n tararua ni kororaoin bongina e a kaman noraki iroun te Atua bwa te tai ni botaki, i karawa ao iaon te aba. E ataia Betero bwa imwiin tain te bwaka, ao e na manga roko kaokan bwaai. Teuare, e a tia ni mena ma te Uea iaon te Maunga ni Bitaki, e katanoata:

“Ma ngaia ae kam na raraoma, ma n rairi nanomi, ba a na kamaunaki ami bure, ba a aonga n roko boong ni kamaiu mai matan te Uea; …

“Are e riai ba e na mwaneia karawa ni karoko bongini kaetani bwaai ni kabane, ake E taekin te Atua ni wiia ana burabeti ake a raoiroi ni kabaneia ake iai ma ngkoakoa.”²⁵

N taai aikai Abotoro aika Betero, Iakobo, ao Ioane a kanakoaki mai iroun te Uea ma “kiingin [Ana] abanuea, ao te mwioko n tararua n te euangkerio n te kabanea n tai; ao ibukin bwaninin taai,” are E na “boti bwaai ni kabane aika bwain karawa, ao bwain aonaaba.”²⁶

N te ririki 1830 te Burabeti Iotebwa Timiti e reirei taekan te tia uarongorongo mai ieta ae arana Eria, are iai irouna kiingin “kakoroan bukin bwaai ni kabane.”²⁷

Onoua te ririki imwiina e a katabuaki te Kirtland Tembora. Imwiin are butimwaea te auti ae tabu anne te Uea, taan uarongorongo mai i karawa a roko ma kiingin te nakoanibonga. Mote e kaoti²⁸ “ao n anganiira … kiingin ikotakiia Iteraera man mwakoron te aonaba ake aua, ao kairaia tengaun baronga man te aba are i meang.

I mwin aei, e kaoti Eriati, ao n anganiira te mwioko n tararua n te euangkerio are e anganaki Aberaam, n taekinna bwa iroura ao ara kariki n rooro ni kabane i mwira a na kakabwaiaki.”²⁹

Ngkanne Eria te burabeti e roko ao ni katanoata, “Nooria, e a roko raoi te tai, are e taekinaki man wiin Maraki—ni kakoaua bwa ngaia [Eria] e na kanakoaki, i mwain rokon ana bong are e kakannato ma ni kakamaku te Uea—n raira nanoia taama nakoia natiia, ao naati nakoia taama, bwa e kaawa n oreaki te aonaba ni kabuta n te maraia.”³⁰

A riki bwaai aikai n Eberi 3, 1836,³¹ ae ngaia ae e kakoroa nanon ana taeka ni burabeti Maraki.³² Kiing aika tabu ibukin te mwioko n tararua aei a kaokaki.³³

Ikotakin Tamnei n Iteran te Rabuna are Teuana

Ma te nanoanga ae korakora, te kakao bwa ti na “nakomai nakon Kristo”³⁴ e kona naba ni karababaaki nakoia naake a mate n akea ataakin te euangkerio irouia.³⁵ Iteran aia katauraoi e kainnanoa aia ibuobuoki tabeman n te aonaaba. Ti ikotii tiata ibukin rikiia kain te utu, karaoi beeban utu n te kurubu, ao ni karaoi mwakuri n te tembora n tei ibukiia tabeman n ikotiia n tatabemaniia nakon te Uea ao nakon aia utu.³⁶

Ni Ira Buakon te Ikoikoti: Te Motinnano n te Berita ae Tabu

Ikai iaon te aba, te mwakuri ni mitinare e bon rang kakawaki nakon ikotakin Iteraera. Te euangkerio e na uotaki moa nakoia “tiibu ake a bua ake ana utu Iteraera.”³⁷ N tokina, ana toro te Uea a tia n nako ni katanoata taekan Kaokan Bwaai. N aaba aika mwaiti a tia ara mitinare ni ukoukoriia kaain Iteraera ake a maenako; a tia ni ukoukoriia “mai inanon bangabangani bwaa”; ao a tia n akawaiia n aron boong ake ngkoa.³⁸

Te rinerine n roko nakon Kristo tiaki ibukin ae e mena iia am tabo; bon ti man aia motinnano aomata n tatabemaniia nako. A kona aomata ni “kairaki nakon ataakin te Uea””³⁹ n aki kitan oin abaia. E koaua, bwa n taai ake rimoa n te Ekaretia, te rairaki e nanonaki naba ae kitanan am tabo. Ma ngkai te ikoikotaki e karaoaki n aaba ni kabane. E a tia te Uea ni katanoata katean Tion⁴⁰ inanon oin aia tabo are E a tia n anganiia Ana aomata Aika Itiaki bwa a bungiaki iai ao abaia. E a kaman taekinaki ni booki aika tabu bwa aomata “a na manga botaki ni mwengaia iaon aban rikiia, ao a na manga tei iaon abaia ni berita ni kabane.”⁴¹ “Ni kabane aaba bon te tabo ni botaki ibukiia aia aomata.”⁴² Te tabo ni ikoikotaki ibukiia Aika Itiaki i Brazil bon i Brazil; te tabo ni botaki ibukiia kaain Nigeria bon i Nigeria; te tabo ni botaki ibukiia kaain Korea Aika Itiaki bon i Korea; ao e nako riki. Tion bon “ake a itiaki nanoia.”⁴³ Tion bon te tabo ake a mena iai Aika Itiaki aika raraoi. Beeba ni kaongora, waaki n reitaki, ao botaki n taromauri a kona ngkai angiia ni kabane membwa a kona n reke irouia reirei, kiing, otenanti, ao kakabwaia n te euangkerio, n aki tabe ma te tabo ae a mena iai.

Kamaiuakira n tamnei e na irekereke n tainako ma aron maiun temanna, tiaki n te tabo ae maeka iai temanna. Aika Itiaki n aba nako a bane ni kona ni karekei ana kakabwaia te Uea.

Ana mwakuri te Atua ae Moan te Mwaaka aei e bon koaua. E maiu. Iesu bon te Kristo. Aio bon Ana Ekaretia, ae kaokaki bwa e na karokoira n tokin kawaira ae mairoun te Atua, n raonaki ma te berita n ikotakiia Iteraera. Beretitenti Gordon B. Hinckley bon ana burabeti te Atua n te bong aei. I kakoaua n aran Iesu Kristo, amen.

1. Taraa Karikan Bwaai 12:1–2; R&B 132:29–32; Aberaam 2:6–11.

2. Taraa Karikan Bwaai 26:1–4, 24, 28; 35:9–13; 48:3–4; Ioane 8:33, 39; Mwakuri 3:25; 1 Nibwaai 17:40; 2 Nibwaai 29:14; Iakobwa 5; Ita 13:7–8; R&B 52:2.

3. Taraa, ibukin te katooto, 1 Nibwaai 15:12–18.

4. Taraa 1 Nibwaai 14:14; 15:14; 2 Nibwaai 30:2; Motiaea 24:13; 3 Nibwaai 29:3; Moomon 8:15; R&B 133:26–34.

5. Kaain te baronga are Rewi a katauraoia ibonga ibuakoia aomata ao e na aki warekaki bwa te baronga ke ni karekei bwaibwaia ni baronga. Uoman natin Iotebwa, Manate ao Eberaim, a anganaki aban rikiia. A warekaki ibuakoia baronga, imwiin aia karo, Iotebwa. Mwaitiia baronga ake tengaun ma uoman a tiku n aroia.

6. Nakoaia Ibonga 26:33; taraa naba Neemia 9:16.

7. Taraa Karikan Bwaai 22:16–18; 3 Nibwaai 20–22; Aberaam 2:10–11.

8. Itaia 18:2, 7.

9. Taraa Nakoaia Ibonga 26:44; Te Tua-Kaua 4:27–31; 28; 29; 30:2–5; Neemia 1:9; Itaia 11:11–12; Ieremia 31:7–8, 10–12; Etekiera 37:21–22; Amota 9:14–15; Mataio 24:31; Iakobwa 6:2; taraa naba Russell M. Nelson, “The Exodus Repeated,” Liahona, Eberi. 2002, 30–39; Ensign, Turai 1999, 6–13.

10. Taraa Ruka 10:1, 17; I-Ebeto 4:11; Taekan te Onimaki 1:6.

11. Taraa Mataio 28:19–20; Mareko 16:15.

12. 2 I-Tetaronike 2:3. “Falling away” e rairaki man te taetae n Erene apostasia, nanona “kitanan te koaua.”

13. Taraa R&B 128:18; 132:45.

14. Taraa Itaia 27:6.

15. Taraa 1 Nibwaai 15:18; taraa naba Ana Boki Moomon atuun te iteraniba, mwakoro 2.

16. Taraa R&B 133:17.

17. 3 Nibwaai 21:1.

18. Taraa Karikan Bwaai 12:2–3; 26:3–4; 35:11–12; ao atuun mwakoro ibukin 3 Nibwaai 21; 29.

19. Reirei aika kaineti ma maenakoia ao ikotakiia kaain te bata are i Iteraera a mena ibuakon reirei ake mai imwaina ake a reireiaki n Ana Boki Moomon: “I mwin kamaenakoan te bata are Iteraera ao e na manga ikotaki riki; … oin mwangan te kai ae te oriwa, ke nikiraia kaain te bata are Iteraera, a na manga kanimwaki, ke a na karekea ataan rongorongon te Mesia ae koaua, are aia Uea ao aia Tia Kaboia” (1 Nibwaai 10:14).

20. Taraa Bruce R. McConkie, A New Witness for the Articles of Faith (1985), 554.

21. E mwaneweaki aran Aberaam inanon 506 kiibu ni booki aika tabu: 216 a reke inanon te Baibara; 290 a reke inanon kibun Manga Kaokan Bwai.

22. E kona naba te berita ae tabu ni manga karekeaki man te tabetabe (taraa Mataio 3:9; Ruka 3:8; I-Karatia 3:26–29; 4:5–7; Aberaam 2:9–10).

23. Taraa R&B 124:58; 132:31–32.

24. Taraa R&B 84:33–40; 132:19; Aberaam 2:11.

25. Mwakuri 3:19, 21.

26. R&B 27:13. Bauro e taetae ni burabetiia naba ara bong “bwa ngkana a koro raoi bongina [te Uea] e na boti bwaai ni kabane, aika bwaini karawa, ma bwain aonaba” (I-Ebeto 1:10).

27. R&B 27:6.

28. E bon riai bwa Mote, are e moan kairiia natin te Atua nakon aban rikiia, bon ngaia are e na anga kiing ibukin ikotakiia Ieraera nakon te Ekaretia ae kaokaki. E a tia Mote n nakon Betero, Iakobo, ao Ioane iaon te Maunga ni Bitaki ao ikekei e katoka iaoia kingin te nakoanibonga naba anne n aia bong. N ana maungatabu te Ekaretia n Eberi 1840, te Burabeti Iotebwa Timiti e rinea Orson Hyde bwa e na nako Ierutarem ni katabua te aba ibukin kaokakiia Iutaia ao Iteraera ae uamaenako. N te Tabati, Okitobwa 24, 1841, Unimwaane Hyde e katorobubua iaon te Maunga are Oriweta ao ni katabua te aba ibukin ikotakiia Iutaia ao Iteraera nakon aia bwai ngkoa.

29. R&B 110:11–12.

30. R&B 110:14–15.

31. Te bwai ae kakawaki bon te koaua ae Mote. Eria, ao Eritai a roko n Tabatin te Itita, ni moan te Toa are te Riao.

32. Taraa Maraki 4:5–6.

33. Taraa R&B 110:16.

34. Iakobwa 1:7; Ominai 1:26; Moronaai 10:30, 32; R&B 20:59.

35. Taraa R&B 137:6–8.

36. Taraa 1 I-Korinto 15:29; 1 Betero 4:6.

37. Mataio 10:6; 15:24.

38. Taraa Ieremia 16:16.

39. 3 Nibwaai 20:13.

40. Taraa R&B 6:6; 11:6; 12:6; 14:6.

41. 2 Nibwaai 9:2.

42. Bruce R. McConkie, in Conference Report, Mexico City Mexico Area Conference 1972, 45.

43. R&B 97:21.