Mo Tiko ena Nona Yasana na Turaga!

Mai vei Elder Ulisses Soares

Ena Vitusagavulu

Eda sa qai taroga ena veisiga, “Sa vakatikori au beka na noqu ivalavala ki na nona yasana na Turaga se nona yasana na meca?”

A kaya ena dua na gauna o Peresitedi Thomas S. Monson: “Meu solia mada e dua na ituvatuva rawarawa mo ni lewa rawa kina na digidigi o ni na sotava. E rawarawa na kena nanumi: ‘E sega ni rawa mo ni donu ni o ni caka cala tiko; e sega ni rawa mo ni cala ke o ni caka dodonu tiko’” (“Na Salatu ki na Bula Uasivi Duadua,” Liaona, Julai 2002, 112). E rawarawa sara ka dodonu na ituvatuva nei Peresitedi Monson. E tautauvata kei na kena dau cakacaka na Liaona a soli vei Liai. Kevaka meda cakacaka ena vakabauta ka yalodina ena talairawarawa ki na ivakaro ni Turaga, ena rawarawa sara na noda kunea na veidusimaki dodonu meda muria, vakabibi ena gauna me da digidigi kina e veisiga.

E vakamasuti keda kina o Paula na iApositolo me baleta na bibi ni noda kakaburaki ena Yalotabu ka qaqarauni meda kakua ni kakaburaki vakayago. A kaya o koya:

“Mo dou kakua ni vakaisini kemudou; a Kalou ena sega ni vakalialiai: na ka kecega sa kaburaka na tamata ena tamusuka talega ko ya.

“Ko koya sa kaburaka na ka ni nona itovo vakayago, ena tamusuka na rusa mai na itovo vakayago; ia ko koya sa kaburaka na ka ni Yalo Tabu, ena tamusuka na bula tawamudu mai na Yalo Tabu.

“Ia meda kakua ni ceguoca ena caka vinaka: ni da na tamusuka ena kena yabaki, kevaka eda sa sega ni oca” (Kalatia 6:7–9).

Na kakaburaki ena Yalotabu sa kena ibalebale me na laveti keda cake na noda vakasama, vosa, kei na itovo ki na nodrau ivakatagedegede vakalou na noda itubutubu vakalomalagi. Ia, na ivolanikalou e tukuna tiko ni veika vakayago sa ituvaki vakatamata se itovo ni tamata sa vakavuravura, ka yaco kina vei ira na tamata mera vakauqeti ena gagano, gagadre, dodomo, kei na mamaqusa ni yalo ka sega ni via vakauqeti ena Yalo Tabu. Kevaka eda sega ni qaqarauni, na veivakauqeti o ya vata kei na veivakasaurarataki ni tevoro ena vuravura oqo ena rawa me vakavuna meda susuga cake na itovo sa butobuto ka veilecayaki ka rawa me sa laki tiki ni noda bula. E na kena gadrevi meda drotani mai na veivakauqeti ca vakaoqori, sa dodonu meda vakamuria ga na veika a vakarota na Turaga vua na parofita o Josefa Simici me baleta na kakaburaki tikoga ena Yalotabu: “Ia dou kakua ni oca ena cakacaka vinaka, raica dou sa tura tiko na yavu ni dua na cakacaka levu. Ia ena tubu mai ena veika lalai na veika lelevu” (V&V 64:33).

Ni gadrevi me laveti cake na yaloda, e gadrevi me “biu tani kece vei [keda] na yaloca, kei na cudrucudru, kei na daunene, kei na veiba, kei na vosa vakacaca, kei na ca kecega sa vakakina” (Efeso 4:31) ka me da “vuku ena nomudou bula oqo [ka] dou biuta tani na no[da] itovo dukadukali kecega” (Momani 9:28).

Ni da vulica na ivolanikalou, eda kila kina ni veiyalayala e cakava na Turaga vei keda ena vakatau kina na noda talairawarawa ka vakauqeta na bula dodonu. Na yalayala oqori me na vakabulabulataka na yaloda, ka kauta mai vei keda na inuinui meda vakayaloqaqataki meda kakua ni guce ena gauna mada ga ni noda sotava na bolebole ni veisiga ni da bula tiko ena dua na vuravura sa takali tiko kina na itovo dodonu kei na yavunibula savasava, ka ra sa vakauqeti na tamata mera kakaburaki cake ga vakalevu ena veika vakayago. Ia eda na vakadeitaka rawa vakacava ni sa vukei keda tiko na noda digidigi meda kakaburaki ga ena veika vakayalo ka kakua ena veika vakayago?

A kaya kina ena dua na gauna o Peresitedi George Albert Smith, ni taumuria tiko na ivakasala mai vei tukana: “E tiko e dua na laini ka vakamatatataka tiko na iyala e wasea na yasana e nona na Turaga mai vua na vuni ca. Kevaka mo na tiko ena nona yasana na Turaga, ko na sotava tiko na nona veivakayarayarataki, ka o na sega ni vinakata mo caka cala; ia kevaka mo sa na toki ki na nona yasana na vuni ca ena dua mada ga na idi, ko sa lewai sara ga mai na nona kaukauwa, ka kevaka me sa na rawai iko ko koya, ko sa na sega ni rawa ni vakasama vakadodonu se vakatulewa vakavinaka baleta ni ko sa na vakayalia na Yalo ni Turaga” (Nodra iVakavuvuli na Peresitedi ni Lotu: George Albert Smith [2011], 191).

O koya gona, eda sa qai taroga ena veisiga, “Sa vakatikori au beka na noqu ivalavala ki na nona yasana na Turaga se nona yasana na meca?”

A vakadreti ira na nona tamata o Momani me baleta na bibi ni kena tiko vei ira na kaukauwa mera kila na ka vinaka mai na ka ca:

“A ka kecega sa vinaka, sa mai vua na Kalou; ia na ka kecega sa ca, sa mai vua na tevoro; a sa meca ni Kalou na tevoro, ka sa valuti koya tiko ga, sa veivakauqeti ka veitemaki tiko ga ki na sala tani kei na ivalavala ca.

“Ia na Kalou sa vakauqeti ira ka sureti ira na tamata me ra ivalavala vinaka tikoga” (Moronai 7:12–13).

E dodonu me na vukei keda na Rarama i Karisito vata kei na itokani ni Yalo Tabu meda kila rawa kevaka sa vakatikori keda tiko na noda ivalavala ni bula ki na nona yasana na Turaga se sega. Kevaka e vinaka na noda ivakarau, sa veivakauqeti kina na Kalou, ni veika vinaka kece sa mai vua na Kalou. Ia, kevaka e ca na noda ivakarau, eda sa vakauqeti tiko mai vua na meca baleta ni dau vakauqeti ira na tamata mera caka ca.

Au vakauqeti vakalevu sara mai vei ira na lewei Aferika ena vuku ni nodra yalodina kei na gugumatua mera tiko ga ena yasana ni Turaga. Ena gauna mada ga ni nodra bula dredre, o ira era ciqoma na veisureti mera gole mai vua na Karisito era sa yaco mera rarama ki na vuravura oqo. Ena vica na macawa sa oti ena dua na veisiko ki na dua vei ira na tabanalevu mai Sauca Aferika, a noqu madigi meu tomani rau tu e rua na bete cauravou, o nodrau bisopi, kei nodratou peresitedi ni iteki mera laki sikovi na cauravou lewe ni nodrau kuoramu era luluqa tu vakalotu. Au qoroya na nodrau yaloqaqa ka yalomalumalumu oi rau na bete oqo ni rau sa tekivu sureti ira lesu ki lotu na cauravou luluqa tu vakalotu oqo. Ni rau sa veivosaki kei ira na cauravou luluqa tu vakalotu oqo, au raica ni rau sa serauni ena rarama ni iVakabula kei na gauna vata oqori era serauni vakakina ena rarama o ira kece era tiko voliti rau. Rau sa cakava tiko na nodrau itavi mera “vukei ira sa malumalumu, vakaukauwataka na liga sa wadamele, kei na duru sa malumalumu” (V&V 81:5). Na nodrau ivakarau na bete o ya rau sa vakatikori kina ena yasana ni Turaga, ka rau sa veiqaravi me iyaya ni cakacaka ena liga ni Turaga ni rau sa sureti ira eso mera mai cakava vakakina.

Ena Vunau kei na Veiyalayalati 20:37, e vakavulica vei keda na Turaga na ibalebale ni kakaburaki ena Yalotabu kei na veika cava ena vakatikori keda ki na yasana ni Turaga, me vaka oqo: meda vakayalomaluataki keda e mata ni Kalou, lako yani ena yalo raramusumusu kei na yalo sa bibivoro, vakadinadinataka ki na Lotu ni da sa veivutunitaka vakaidina na noda ivalavala ca taucoko, ka taura vei keda na yaca i Jisu Karisito, ka yalodina sara meda qaravi Koya ki na ivakataotioti, vakaraitaka ena noda cakacaka ni da sa ciqoma na Yalo i Karisito, ka ciqomi ena papitaiso ki na Nona Lotu. Ni sa yaloda dina meda vakayacora na veiyalayalati oqo ena vakarautaki keda meda laki bula vata kei na Kalou ka meda sa tamata vakalou. Na kena nanumi na veiyalayalati oqo e dodonu me dusimaki kina na noda ivakarau ni bula ena loma ni noda matavuvale, ena noda veimaliwai kei ira na tamata, ka vakabibi na noda veimaliwai tiko kei na iVakabula.

A tauyavutaka o Jisu Karisito na ivakarau uasivi duadua ni bula e rawa ni da tara cake kina na noda itovo me rawa ni da vakayacora kina na veiyalayalati tabu oqo. E tagutuva na iVakabula mai na Nona bula na veivakauqeti cava ga ena rawa me kauta laivi na nona raica vakatabakidua tiko na Nona ilesilesi vakalou, vakabibi ena gauna a temaki kina mai vei koya na meca se mai vei ira era dau muri Koya ena gauna a veiqaravi tiko kina e vuravura. E dina ga ni sega ni bau ivalavala ca o Koya, e yalomalumalumu ka yalo raramusumusu, ka sinai ena loloma ena vukuna na Tamada Vakalomalagi kei ira na tamata kecega. A vakamalumalumutaki Koya ena mata ni Tamada Vakalomalagi, ka sega ni cakava na lomana me cakava ga na veika sa kerea Vua o Tamana ena veika kecega me yacova na ivakataotioti. Ena gauna mada ga ni rarawa bibi vakayago ka vakayalo, a colata na nodra ivalavala ca na kawatamata kecega e tabana ka bunotaka na dra, ka qai kaya vei Tamana, “Ia me kakua ga ni vaka na lomaqu, me vaka ga na lomamuni” (Marika 14:36).

Sa noqu masu, kemuni na taciqu kei na ganequ, ni da na nanuma tiko na noda veiyalayalati o ya meda sa vakaukauwataki keda tiko meda valuta “na gasau vidi ni ca” (1 Nifai 15:24), ka muria tikoga na ivakaraitaki ni iVakabula me rawa ni da kakaburaki ena Yalotabu ka tiko ga ena nona yasana na Turaga. Meda qai nanuma tiko na ituvatuva nei Peresitedi Monson: “E sega ni rawa mo ni donu ke o ni caka cala tiko; e sega ni rawa mo ni cala ke o ni caka dodonu tiko.” Au sa cavuta na veika kece oqo ena yaca i Jisu Karisito, emeni.