Vakavulici Ira na Luveda Me ra Kila

Mai vei Cheryl A. Esplin

iKarua ni Daunivakasala ena Mataveiliutaki Raraba ni Lalai

Noda vakavulici ira na luveda mera kila e sega ni o koya na vosa walega. Sa ikoya na noda vukei ira na luveda mera conaka na ivunau e yalodra.

Ni sivi yani na veiyabaki, sa kataremoremo yani vakalevu eso na veika matailalai ni noqu bula, ia eso na vakanananu e dau makare vinaka tu ga vei au na nodra sucu mai na luvei keirau yadua. E vaka me voleka cake mai na lomalagi, kevaka au na tovolea, e voleka sara ga niu vakila tale na yalo vata ni vakarokoroko kei na qoroqoro ena veigauna yadua e dau soli kina ki ligaqu e dua vei ira na gone talei oqori.

O ira na noda “gone era sa nona isolisoli na Kalou” (Same 127:3). E kilai ira ka lomani ira yadua ena loloma e uasivi sara (raica na Moronai 8:17). Sa dua na itavi tabu e vakataqara vei keda na Tamada Vakalomalagi ni da itubutubu ka itokani vata kei Koya ena nodra vukei ira na Nona isolisoli digitaki mera yacova na vanua e kila o Koya ni dodonu mera yaco kina.

Na dodonu vakalou oqo ni nodra susugi cake na luveda sa dua na itavi cecere cake mai na veika e rawa ni da cakava duadua ga ka sega ni veivuke kina na Turaga. E kila vinaka sara tu ga o Koya na veika e dodonu m ra kila na luveda, na veika e dodonu mera cakava, kei na ituvaki e dodonu mera tu kina me rawa ni ra lesu tale mai ki na Nona iserau. Sa solia o koya vei ira na tama kei na tina na idusidusi bibi eso kei na veituberi mai na ivolanikalou, o ira na Nona parofita, kei na Yalo Tabu.

Ena dua na ivakatakila ni gauna oqo mai vua na Parofita o Josefa Simici, sa vakaroti ira kina na itubutubu na Turaga me ra vakavulici ira na luvedra me ra kila na ivunau ni veivutuni, vakabauti Karisito, papitaiso, kei na isolisoli ni Yalo Tabu. Raica e sega ni kaya walega na Turaga meda “vakavulica na ivakavuvuli”; na Nona ivakaro meda vakavulici ira na luveda mera “kila na ivakavuvuli.” (Raica na V&V 68:25, 28; vakaikuritaki.)

Ena Same eda wilika kina, “Mo ni vakavukui au kina, kau na qai cakava na nomuni ivunau; Io, kau na vakabauta e lomaqu taucoko” (Same 119:34).

Noda vakavulici ira na luveda mera kila e sega ni o koya na vosa walega. Sa ikoya na noda vukei ira na luveda mera conaka na ivunau e yalodra, ena kena ivakarau me yaco kina me tiki ni nodra bula ka vakavotukana ena nodra ivakarau ni bula kei na nodra itovo ena nodra bula taucoko.

E vakavuvulitaka o Nifai ni itavi ni Yalo Tabu sa ikoya me kauta mai na ka dina “ki na yalodra na luve ni tamata” (2 Nifai 33:1). Na noda itavi vakaitubutubu sa ikoya meda cakava na veika kece sara eda rawata me tarai cake kina e dua na itikotiko mera vakila kina na luveda na veivakauqeti ni Yalotabu ka vukei ira mera kila ka vakadeitaka na veika era vakila tiko.

Au nanuma e dua na qiri a lako mai vei au ena vica na yabaki sa oti mai vei luvei keirau yalewa, o Michelle. Ena yaloluluvu e kaya mai, “Na, e dua na ka vakasakiti e cakava o Ashley.” O Ashley na luvena yalewa, yabaki lima tiko ena gauna o ya. E vakamacalataka o Michelle ni dua na mataka o ya erau veileti kina vakalevu o Ashley kei Andrew yabaki tolu—e dua e sega ni via solia, ka veiroba o kena ikarua. Ni oti nona vakameautaki rau, a lako o Michelle me raica na gonelailai.

Sega ni dede sa cici yani i loma o Ashley, e cudru ni sega ni via solia o Andrew e dua na ka. A vakananuma vei Ashley o Michelle na yalayala eratou sa vakayacora ena lotu vakamatavuvale me ratou dau veilomani vakataki iratou.

A kerei Ashley kevaka e rawa ni masu me kerea na veivuke nei Tamada Vakalomalagi, ia ni se rarawa voli vakalevu na yaloi Ashley, a sauma yani ena “Sega.” Ni tarogi kevaka e vakabauta ni na sauma na Tamada Vakalomalagi na nona masu, e sauma o Ashley ni sega ni kila. A kerei koya o tinana me taura vakamalua na ligana ka tekiduru vata kei koya.

A vakatura o Michelle me kerea o Ashley vei Tamada Vakalomalagi me vukei Andrew me dau solisoli—ka vukei koya me dau yalovinaka. Ni vakasamataka o Ashley ni rawa ni vukei ganena lailai o Tamada Vakalomalagi me dau solisoli, a vakauqeti kina, sa mani tekivu me masu, taumada e kerea na Tamada Vakalomalagi me vukei Andrew me dau solisoli. Ni kerei Koya me vukei koya me dau yalovinaka, sa tekivu me tagi. A tinia o Ashley na nona masu ka laki vakataqara tu na uluna ena vatu ni tabai tinana. A tauri koya o Michelle ka taroga se cava e tagicaka. E sauma o Ashley ni sega ni kila.

E kaya o tinana, “Au vakabauta niu kila na vu ni nomu tagi. Sa vinaka beka na lomamu?” A deguvacu o Ashley, ka tomana o tinana, “Oqori na Yalotabu sa vukei iko tiko me vakaoqori na lomamu. Oqo na sala e tukuna kina vei iko o Tamada Vakalomalagi ni lomani iko ka na vukei iko.”

A tarogi Ashley kevaka e vakabauta na veika oqo, kevaka e vakabauta ni rawa vei Tamada Vakalomlagi me vukei koya. Ni tonawanawa tu na matana lalai, qai kaya mai o Ashley ni vakakina.

Ena so na gauna na sala qaqa duadua mera vakavulici kina na luveda mera kila e dua na ivunau sa ikoya me vakavulici ena ivakarau ni veika vata era sota kaya tiko ena gauna sara ga o ya. Na veigauna oqori e dau yaco ga mai ka sega ni nakiti ka dau lako ga mai ena ivakarau ga ni bula vakamatavuvale ena veisiga. E dau totolo walega na kena yaco mai ka lako sara yani, o koya sa dodonu kina meda dau kidava tiko ka yadrava na gauna e yaco mai kina na gauna eso ni veivakavulici ena nodra dau kauta mai vei keda na luveda na nodra taro kei na nodra lomaleqa, ni dau yaco na duidui ena kedra maliwa kei ira na tacidra se nodra itokani, ni ra gadreva mera lewa na cudru ni yalodra, ni ra cakava e dua na cala, se ena gauna era via vakatauca kina e dua na lewa. (Raica na Na Veituberi, Me iLutua ni Noda Bula: iYaragi Vakavuli ni Veituberi Vakosipeli [1999], 140–41; Marriage and Family Relations Instructor’s Manual [2000], 61.)

Kevaka eda sa vakarau tu ka laiva na Yalotabu me veidusimaki ena veigauna vakaoqo, ena mana vakalevu cake sara na nodra vakavulici na luveda ka ra kila ka.

E vakakina na bibi ni veigauna ni veivakavulici e dau yaco mai ena veigauna namaki eso me vaka na masumasu vakamatavuvale, vuli ivolanikalou vakamatavuvale, lotu vakamatavuvale, kei na itaviqaravi tale eso vakamatavuvale.

Ena veigauna kece ni veivakavulici ena dau susugi cake vakavinaka duadua na vuli kei na kila ka ena dua na draki ni veivakatakatai kei na loloma ka tiko kina na Yalotabu.

Ni vo e rauta ni rua na vula me ratou yabaki walu kina na luvena, ena dau vakarautaka e dua na tama e dua na gauna ena veimacawa me vakarautaki iratou kina ki na papitaiso. E kaya na luvena yalewa ni sa yaco mai na nona gauna, a solia vua e dua na ivolaniveisiga ka rau dabe vata, o rau taurua ga, ka rau veitalanoataka ka wasea vata na nodrau nanuma me baleta na ivakavuvuli ni kosipeli. A kerea o tamana vua me droinitaka e dua na iyaloyalo ni rau toso tiko. Me vakaraitaka na bula taumada, na bula vakavuravura oqo, kei na veikalawa yadua ena gadreva me rawa ni lesu tale ka laki bula vata kei Tamada Vakalomalagi. A wasea na nona ivakadinadina me baleta na ikalawa yadua ni ituvatuva ni veivakabulai ena gauna e vakavulica tiko kina vua.

Ni nanuma lesu na luvena yalewa na veika oqo ni sa tubu cake, e kaya kina, “Au na sega vakadua ni guilecava na loloma au vakila mai vei tamaqu ena gauna keirau wasea vata qori. … Au vakabauta ni gauna oqori sa ikoya na vuna levu au rawata kina e dua na noqu ivakadinadina ni kosipeli ena gauna au a papitaiso kina.” (Raica na Na Veituberi, Me iLutua ni Noda Bula, 129.)

Na veituberi me rawa kina na kila ka e gadrevi kina na yalodina kei na sasaga vagumatua. E gadrevi kina na veivakavulici ena ivakavuvuli kei na ivakaraitaki ka vakauasivi ena noda vukei ira na luveda me ra bulataka na veika era vulica.

E vakavuvulitaka o Peresitedi Harold B. Lee, “Kevaka eda se sega ni vakayagataka e dua na ivakavuvuli ni kosipeli, ena… dredre cake sara meda vakabauta na ivakavuvuli o ya” ( Nodra iVakavuvuli na Peresitedi na Lotu: Harold B. Lee [2000], 121).

Au a vulica taumada na masu ena noqu tekiduru vata kei iratou na noqu matavuvale ena masu vakamatavuvale. A vakavulici vei au na ivosavosa ni masu ena noqu vakarorogo vei rau na noqu itubutubu kei na nodrau vukei au ena noqu cavuta na imatai ni noqu masu. Au vulica ni rawa niu vosa vei Tamada Vakalomalagi ka kerea na veituberi.

E sega vakadua ni dau cala ena veimataka, ena nodrau dau vakasoqoni keitou wavolita na teveli ni kana o rau na tinaqu kei na tamaqu ni se bera na katalau, ka keitou dau tekiduru ena masu vakamatavuvale. Keitou dau masu ena veigauna kece ni kana. Ena yakavi ni bera na moce, keitou dau tekiduru vata ena rumu ni gade ka tinia na siga ena masu vakamatavuvale.

E dina ni levu na ka au sega ni dau kila vinaka me baleta na masu niu se gone, sa yaco me tiki tudei ni noqu bula. Au se vuli tikoga, ka sa tubu tikoga na noqu kila na kaukauwa ni masu.

E kaya o Elder Jeffrey R. Holland, “Eda kila kece na qaqa ni itukutuku ni kosipeli e vakatau ena kena vakavulici ka kilai ka qai bulataki ena dua na kena ivakarau meda vakila kina na kena yalayala ni marau kei na veivakabulai” (“Veivakavulici kei na Vuli ena Lotu” [soqoni ni veituberi ni veiliutaki e vuravura raraba, 10 ni Fepe., 2007], Liaona, June 2007, 57).

Noda vulica meda kila vakavinaka sara na ivunau ni kosipeli e dua na ivalavala ni bula taucoko ka dau yaco mai “na vosa ena vosa, na vunau ena vunau, vakalailai eke ka vakalailai e kea” (2 Nifai 28:30). Ni ra vuli na gone ka cakacakataka na veika era vulica, sa rabailevu kina na nodra kila ka, ka na yaco kina na vuli vakalevu cake, cakacakataki vakalevu cake, ka na levu cake sara kina na gugumatua ni kila ka.

E rawa ni da kila ni sa tekivu mera ciqoma na ivunau na luveda ni da raica ni sa vakavotukana mai ena nodra ivakarau ni bula kei na nodra ivalavala ni sega ni ra vakasaurarataki se ra saumi kina. Ni sa tekivu mera kila na luveda na ivunau ni kosipeli, sa yaco mera bula rawati ira ka nuitaki. Sa yaco mera tiki ni iwali ni bolebole ena noda matavuvale ka ra cau vakavinaka ena draki ni bula vakavuvale kei na qaqa ni noda veimatavuvale.

Eda na vakavulici ira na luveda mera kila ka ena noda vakayagataka vakavinaka na veigauna kece ni veivakavulici, sureta na Yalotabu, biuta na ivakaraitaki, ka vukei ira mera bulataka na veika era vulica.

Ni da raica na yaloka ni matana e dua na gone dramidrami, eda na nanuma na sere:

Au luve ni Kalou,

Gadreva meu kila;

Na Nona vosa kecega

Kua tale ni wawa.

Meu tuberi ka liutaki,

Tikotikoga,

Meu vulica rawa tu.

Na bula vou ko ya.

(“Au Luve ni Kalou,” Sere ni Lotu, naba 185; vakaikuritaki)

Meda vakayacora vakakina. Ena yaca i Jisu Karisito, emeni.