Te Kakaitau nakon te Atua

Iroun Unimwaane Russell M. Nelson

Man te Kooram n Abotoro n te Tengaun ma Uoman

A na mwaitira tamaroana ngkana ni kabane ataa riki mwakan ao ana tangira te Atua ao n anga te kakaitau anne Nakoina.

Tariu ao mwaneu aika kam tangiraki, ti kaitaui ngkami ibukin ami boutoka ao nanomi aika korakora. Ti anga ara kakaitau ao ara tangira nakoimi n tatabemani ngkami nako.

N te tai ae aki maan n nako, Titita Nelson ao ngai ti kukurei n noori iika aika tikiraoi inanon ana tabo ni kawakin iika temanna te aomata. Te ika ma matan kuniia aika a takiakia ma teiia ao buburaia aika kakaokoro ni uaua ni waekoa ni waerake ao ni rikaaki. I tuanga te tia mwakuri ae kaan irarikiu, “Antai ae karekea te amwarake ibukiia iika aika tikiraoi aikai?”

E kaeka, “ngai.”

Ngkanne I titiraki, “A tia ni kaitauko?”

E kaeka neiei,, “A tuai!”

I iangoia tabeman aomata aika I kinaia aika aki ata aia tia Karikibwai ao koauan aia “berena ni kamaiu.”¹ A maeka ni katoabong n akea atakin te Atua ao Raoiroina nakoia.

A na mwaitira tamaroana ngkana ni kabane ataa riki mwakan ao ana tangira te Atua ao n anga te kakaitau anne Nakoina. E reirei Ammon, “Ti na karabwarabwa nakon te [Atua], bwa e mwakuria te raoiroi n tainako.”² Mwaitin ara kakaitau e kaota mwaitin ara tangira Nakoina.

Bon Ngaia Taman tamneira.³ Iai Rabwatana ae mimitong, ae te iriko ao te rii ae kororaoi.⁴ Ti maeka ma Ngaia i karawa imwaain are ti bungiaki.⁵ Ao ngke E karikiira n rabwatara, ti karikaki ni katotongan te Atua, ma rabwatara n aomata.⁶

Iangoa te amwarake ae ko na maiu ao ni marurung iai. E bon nako-mai i karawa. Reken te eea, te amwarake, ao te ran a bane n roko nakoira bwa bwaintangira mairoun Tamara are i Karawa ae tangira. E karikaki te aonaaba bwa e na buoka mwanangara n te maiu ae mamate.⁷ Ti bungiaki ma te kona n rikirake, tangira, mare, ao ni katei utu.

Te mare ao te utu a tabu iroun te Atua. Te utu bon te kabanea ni kakawaki n iunite n te tai aei ao n te tai are akea tokina. Ibukin ana babaire ae kakukurei te Atua, utu a kona ni kabaeaki n te tembora ao ni katauraoia n oki ni maeka n Ana tabo ae tabu n aki toki. Anne te maiu ae akea tokina! E kakoroa nanon are e kariaria tamnein te aomata—te nano ae e uaiakinaki ibukin te reitaki ae akea tokina ma kaain ana utu te aomata anne.

Ngaira bon mwakoron Ana kantaninga ae mai ieta: “Au mwakuri ao mimitongiu,” E taku, ni “karekea te aki mamate ao te maiu ae akea tokina.”⁸ N te aro bwa e na koro nanon kouru aikanne, “Ba E tangiriia aomata te Atua n te aro are E anga Natina ae te riki temanna iai, ba e aonga n aki mate ane onimakinna, ma e na reke i rouna te maiu are aki toki.”⁹ Te mwakuri anne bon kakouaan ana tangira te Atua mai ieta. “Bukina bwa [E] aki kanakomaia Natina te Atua nako aon te aba ba E na kabuakaka te aba; ma E kanakomaia ba e na kamaiuaki te aba i Rouna.”¹⁰

Te bwai ae kakawaki nakon ana babaire te Atua ae akea tokina bon ana mition Natina, Iesu Kristo.¹¹ E roko bwa e na kaboia natin te Atua.¹² Ibukin Ana Mwakuri ni kamaiu te Uea, te mangauti (ke te aki mamate) e riki bwa te bwai ae koaua.¹³ Ibukin te Mwakuri ni kamaiu, e riki te maiu ae akea tokina bwa te bwai ae kona ni karaoaki ibukiia ni kabane aika a na kona n tau. E kabwarabwara Iesu:

“‘Boni Ngai te manga-uti, ao te maiu, ane e onimakinai, ngkana tao e boni mate, ao e na boni manga maiu:

“‘Ao ane maiu ma n onimakinai ao e na bon aki mate.”¹⁴

Ibukin ana Mwakuri ni kamaiu te Uea ao Ana bwaintangira ae te mangauti—ibukin te rongorongo ae tikiraoi aei n te itita—te kaitau nakon te Atua!

Bwaintituaraoi n Rabwata

Tamara are i Karawa e tangiriia Natina.¹⁵ E a tia ni kakabwaiaia n tatabemaniia ma bwaintituaraoi n rabwata ao n tamnei. N na taetae iaon aekaia n tatabeua nako. Ngkana ko anenea “Ngai Natin te Atua,” iangoa Ana bwaintituaraoi nakoim ae bon oin rabwatam. Katein rabwatam aika mwaiti aika kamimi a kaota koauan “arom ae mai iroun te Atua.”¹⁶

Ana okan rabwatam n tatabeua nako bon te bwaintituaraoi mairoun te Atua aika kamimi. Iai ana lens te mata ae kabongana n noraba iai. Iia ao mwatireti a tararuai maata ake uoua ni katamneia ae bon tein rabwatan te bwai. A reitaki maata nakon te kaburoro, are e taua mwiin te bwai ae noria.

Buroom bon te bwam ae moan te kamimi arona.¹⁷ Iai inanona aua baibu aika a kona n uki ao n iin (valves) are e tararua aron birin te rara. Baibu aikai a uki ao a in riaon 100,000 te tai n te bongina—36 te mirion te tai n te ririki. Ma, ti ngkana a bitaki man te man n aoraki, a kona ni kaitarai aeka ni kangaanga aikanne n akea tokina.

Iangoa aron ana tititem te rabwata ni kaitarai aoraki. Ni kamanoa bwa e na aki uruaki, e namakina te maraki. Ni kaekaan te aoraki, e kakorakora tautian te rabwata. Te kun e karekea te kamanoaki. E kauring ibukin te ikoaki are e na karika te kabuebue ke te mwaitorotoro ae korakora.

Te rabwata e na kaboui oin ana cells ake aikoa kabonganaki ao n taua mwaitin karinanin bwaai ake a kakawaki. Te rabwata e kamaoi ikoaki, mwakoro, ao rii aika mwaoto. Ana konabwai ni manga kariki bon te bwaintangira ae tabu mairoun te Atua.

Ti kainnanoia ni kauringaki ae te rabwata ae kororaoi e aki kainnanoaki bwa e na karekea maiun te aomata ae akea tokina. Ni koauana, tabeman tamnei aika a tamaroa a rabwatanaki n rabwata aika aki toamau ke rabwata aika aki kororaoi. N angin te tai te korakora ae bati n te tamnei e reke irouia aomata ake iai aia kangaanga n rabwataia, bukina raoi bwa a korakora katakiia.

Ane e kamatebwaia aron mwakurin rabwatan te aomata ni koauana e a tia n “noora te Atua ngke e mwaing i nanon ueana ao mwaakana.”¹⁸ Bukina bwa te rabwata e tautaekanaki n tuua mai ieta, ngkana e reke te kamaiuaki e reke man te ongeaba nakon te tua are e boto iaona.¹⁹

Ma tabeman aomata a kairua ni iangoia bwa bwain nako te rabwata aika kamimi aikai a riki ni manenanti ke n riki bwa bon imwiin aron rikin te aonaaba. Titirakiniko, “E kona te rebwetaua n te tabo ni bwereeti ni karekea te rikitinare?” Aron rekena e na taraa ni kangaanga. Ma ngkana ngaia anne, e aki kona ni katomatomai ana iteraniba aika raeuaaki ke ni manga karekea oin ana kaobi ae boou riki!

Ngkana korakoran te rabwata ibukin aron mwakurina, kamanoana, karaoana, mwakuriana, ao manga karaoana a na reitinako n akea tiaia, te maiu ikai e na reitinako n akea tokina. Eng, ti na aki kona ni kitana te aonaaba aei! Ibukin nanoangaakira, ara tia karikibwai e karika ae ti na kara ao waaki riki tabeua are n tokina e na riki te mate n rabwatara. Te mate, n aron te bungiaki, bon iteran te maiu aei. A reirei booki aika tabu, ae “e bon aki riai bwa te aomata e na manga kaokaki man te mate n rabwata aio, bwa e na bon uruaki iai te babaire ni kakukurei are e korakora.”²⁰ Te okirikaaki nakon te Atua rinanon te kawai ae ti atongnga bwa te mate bon te kakimwareirei ibukiia naake E tangiriia ao a tauraoi ni kaitibo ma Ngaia.²¹ N tokina e na roko te tai ngkana te “tamnei ao … te rabwata ana manga kaokaki …nakon teia ni koaua; baai ma wae ma toman te rabwata ana manga kaoaki nakon teia ni koaua,”²² n aki kona ni manga raurenako. Ibukin bwaintituraoi n rabwata aikai, ti na anga ara kaitau nakon te Atua!

Bwain Tangira n Tamnei

N aron kakawakin te rabwata, e tei bwa kanga te tabaenako ibukin tamnein temanna ae akea tokina. E a kaman maiu tamneira imwain te maiu aei²³ ao e na retinako ni maiu imwiin maten te rabwata.²⁴ Te Tamnei e katauraoa te rabwata ma te taneiai n te maiu ao aroarom.²⁵ N te maiu aei ao are imwiina, te tamnei ao te rabwata, ngkana a ikotaki, a riki bwa tamnei aika maiu ae e rietaata kakawakiia.

Bukina bwa tamnein temanna e rangi ni kakawaki, rikirakena bon iai kakawakina ae akea tokina. E kakorakoraaki ngkana ti reitaki n te tataro ae nanorinano ma Tamara are i Karawa ae tangira.²⁶

Kateira aika a na motikaki iai taekara n te bong teuana a bane n riki ni maiura n tamnei.²⁷ A raonaki aikai ma te tangira, te tamaroa, te kokoaua, te nanoanga, ao te ibuobuoki nakoia tabeman.²⁸ Tamneim, n raonaki ma ao ni maeka n rabwatam, e kona n rikirake ao ni karaoi aroaro aikai ni kawai aika a kakawaki nakon rikirakem ae akea tokina.²⁹ Te rikirake n tamnei e reke rinanon kawai n te onimaki, rairannano, bwabetito, ana bwaintangira n te Tamnei ae Raoiroi, ao te kekeiaki nakon te toki, n raonaki ma otenanti n te entaunmente ao te kabaebae n te tembora ae tabu.³⁰

N aron are e kainnanoia te rabwata ni kamwarakeaki ni katoa bong ibukin te maiu, te tamnei e kainnanoa naba te kamwarakeaki. Te tamnei e amwarake man koaua aika akea tokiia. N te ririki ae nako ti bukamarua ana ka 400 n ririki a na rairairi King James n te Baibara ae Tabu. Ao ti a tia ni karekea Ana Boki Moomon inanon ae kaniia 200 te ririki. E a tia ngkai ni bane n rairaki inanon 107 taetae aika rineaki. Ibukin aei ao booki aika tabu ake tabeua, ti ataia iai ae te Atua bon Tamara ae Akea Tokina ao Natina, Iesu Kristo, bon ara Tia Kamaiu ao Te Tia Kabooi maiura. Ibukin bwaintituaraoi n tamnei aikai, ti na anga te kakaitau nakon te Atua!

Bwaintangira n te Euangkerio

Ti ataia bwa burabeti ni boong aika mwaiti, n aron Atam, Noa, Mote, ao Aberaam, a bane n reirei aroia n atua Tamara are i Karawa ao Iesu Kristo. N ara bong n te mwioko n tararua e anga Tamara are i Karawa ao Iesu Kristo ngke a kaoti nakon te Burabeti Iotebwa Timitin n te 1820. E kateaki te Ekaretia n 1830. Ngkai, 182 te ririki imwiina, ti teimatoa n tiku iaan te berita bwa ti na uota te euangkerio nakoia “aaba, reeti, neewe, ao aomata ni kabaneia.”³¹ Ngkana ti karaoia, a na kakabwaiaki iai taan anga ao taan karekea.

Tabera bwa ti na reireiniia Natina ao ni kaota nakoia atakin te Atua. N taai ake ngkoa, e taku te Uea Beniamina:

“Kakoaua te Atua; kakoaua taekana, ma bwaai ni kabane ake e a tia ni kariki, i karawa ao i aonaaba; kakoaua bwa iai irouna te wanawana ae bwanin, ma te mwaaka ni kabane, i karawa ao i aonaaba; …

“… Kakoaua bwa kam na rairananomi man ami bure ao n aki manga karaoi, ao karinanoingkami imatan te Atua; ao butiia ma te nanorinano ni koaua bwa e na kabwarai ami bure; ao ngkai, ngkana ko kakoauai bwaai aikai ni kabane ao tarai bwa kam na karaoi.”³²

Te Atua ti tebo ngkoananoa, ngkai, ao n aki toki, ma ngaira tiaki. Ni katoabong, tabera bwa ti na karekea mwakan te Mwakuri ni kamaiu bwa ti aonga ni bitaki, n riki n aron Kristo, ao n tau ni karekea te bwaintangira ni karietataaki ao ni maeka n akea tokina ma te Atua, Iesu Kristo, ao ara utu.³³ Ibukin mwaaka aikai, inaomata, ao ana bwaintangira te tamnei, ti na kakaitau nakon te Atua!

I kakoaua bwa E maiu, ao Iesu bon te Kristo, ao bwa aio Ana Ekaretia, ae kaokaki ni boong aika kaitira ni kakoroa nanon kateana ae mairoun te Atua. Ti kairaki n te bong aei iroun Beretitenti Thomas S. Monson, ae ti tangiria ao ni kamatoa ma nanora ni kabane, n aron ae ti kamatoaia naba ana kauntira ao Abotoro ake Tengaun ma Uoman bwa burabeti, taan mamata, ao taan kaotioti. I kakoaua n aran Iesu Kristo ae tabu, amen.

Bwaai aika a na taraaki

1. Ioane 6:35, 48; taraa naba te kiibu 51.

2. Aramwa 26:8; taraa naba Aramwa 7:23.

3. Taraa Mwakuri 17:27–29.

4. Taraa Reirei ao Berita aika Tabu 130:22.

5. Taraa Ieremia 1:4–5; I-Rom 8:16; Ebera 12:9; Mote 6:51.

6. Taraa Karikani Bwai 2:7; 1 I-Korinto 15:44; Mote 3:7.

7. Taraa 1 Nibwaai 17:36.

8. Mote 1:39.

9. Ioane 3:16.

10. Ioane 3:17.

11. A kamatataaki raoi Ana kantaninga inanon 3 Nibwaai 27:13–22.

12. Taraa Aramwa 11:40.

13. Taraa 2 Nibwaai 9:6–7, 20–22.

14. Ioane 11:25–26.

15. Taraa 1 Ioane 4:10; 1 Nibwaai 17:40.

16. 2 Betero 1:4.

17. E bwamia tao 2,000 te karan te buro (7,570 L) ni katoa bong.

18. Reirei ao Berita aika Tabu 88:47.

19. Taraa Reirei ao Berita aika Tabu 130:21. Ni koauana, te tua mai ieta e bon aki kona ni kakeaki bongana.

20. Aramwa 42:8.

21. Te Tia Otooto e kabwarabwara aron te taratara n Atua: “E kakawaki i matan Iehova mateia ana aomata aika itiaki” (Taian Areru 116:15); taraa naba Te Minita 12:7.

22. Aramwa 11:43; taraa naba Te Minita 12:7; Aramwa 40:23; Reirei ao Berita aika Tabu 138:17.

23. Taraa Reirei ao Berita aika Tabu 93:38.

24. Taraa Aramwa 40:11; Aeberaam 3:18.

25. Te tamnei bon katotongan are ni bwain te rabwata (taraa Reirei ao Berita aika a Tabu 77:2).

26. Taraa 3 Nibwaai 14:9–11.

27. Te tamnei, tiaki te rabwata, bon ngaia ae mwamwakuri, ae taua aron nako te tamnei. N akean te tamnei, te rabwata e mate (taraa Iakobo 2:26). Bon te tamnei, ae, e rinea te raoiroi ke te buakaka ao e na bukintaeka ibukina te aroaro ae raoiroi ke ae buakaka ae iai irouna n te kabanea ni Motikitaeka (taraa Aramwa 41:3–7).

28. Anua n te maiu n tamnei a raonaki naba ma te “onimaki, te raoiroi, te atatai, te taubaang, te taotaonakin nano, te akoi imarenami, te aro n Atua, te tangira ae kororaoi, te karinanoia, [ao] te nanomatoa” (Reirei ao Berita aika Tabu 4:6).

29. Taraa 2 Nibwaai 2:11–16, 21–26; Moronaai 10:33–34.

30. Aio ana reirei Kristo (taraa 2 Nibwaai 31:11–21).

31. Motiaea 15:28; taraa naba 1 Nibwaai 19:17; 2 Nibwaai 26:13; Motiaea 3:20; 15:28; 16:1; Aramwa 37:4; Reirei ao Berita aika Tabu 1:18–23; 77:11; 133:37.

32. Motiaea 4:9–10.

33. “Te maiu ae akea tokina … te bwai n tituaraoi ae moan te korakora mai i buakon ana bwai n tituaraoi te Atua” (Reirei ao Berita aika Tabu 14:7).